Baharın nəfəsi yurdumuza yenidən dirçəliş, sevinc və bərəkət gətirir. Təbiət oyanır, torpaq canlanır, həyatımızın hər anı yeni bir başlanğıc kimi çiçəklənir. Baharın gəlişini, yeni həyatın başlanğıcını, yenilənməni, bolluq və ruzi-bərəkəti simvolizə edən Novruz bayramı yurdumuzun hər guşəsində həmişə böyük coşqu ilə qeyd olunur. Ümummilli Lider Heydər Əliyev 20 mart 1998-ci ildə məcburi köçkünlər üçün keçirilən Novruz şənliyində də bu haqda qeyd etmişdi: "Gün o gün olacaq ki, Novruz bayramını Şuşada, Laçında, Kəlbəcərdə, Ağdamda, Füzulidə, Cəbrayılda, Zəngilanda, Qubadlıda keçirəcəyik. Əminəm ki, belə də olacaqdır". Artıq o gün bu gündür, illərlə həsrətində olduğumuz torpaqlarda, Qarabağda tonqallar alovlanır, qədim adət-ənənələrimiz canlanır, Novruz şənliklərinin sədaları düşmən bağrı çatladır. Ruhumuzun yenilməzlik təntənəsinə çevrilmiş Zəfərimiz yurdumuza əbədi bahar ovqatı bəxş edir.
Bayramın özəlliklərindən biri şənliklərin bir gün deyil, 4 həftə öncə qeyd olunmağa başlanmasıdır. Novruza qədər təntənəli şəkildə keçirilən çərşənbələrin hər birinin öz adət-ənənələri, ritualları var. Xalqımız əsrlərdir o adət-ənənələri yaşadır, unudulmağa qoymur. İlin Novruzdan əvvəlki dörd çərşənbəsi - Su çərşənbəsi, Od çərşənbəsi, Yel çərşənbəsi və Torpaq çərşənbəsi müqəddəs sayılır. İlaxır çərşənbə adlanan Torpaq çərşənbəsi bəzi bölgələrdə daha təmtəraqlı, böyük ruh yüksəkliyi ilə keçirilir.
Saflıq, təmizlik, həmrəylik, barışıq bayramı olan Novruz bayramı münasibətilə Azərbaycanın Şuşada, Laçında və işğaldan azad edilmiş bütün torpaqlarında təşkil olunan şənliklər, xalq oyunları, milli rəqslər və əsrarəngiz muğam sədaları Qarabağın əzəmətli tarixinə yeni bir səhifə yazacaq. Novruzun əsas rəmzlərindən biri olan tonqallar həm baharın gəlişini, həm də Azərbaycanın bütövlüyünü simvolizə edir.
Əsrlər boyu xalqımızın həm təbiətə, həm də milli dəyərlərə bağlılığını ifadə edən bu bayram bir neçə ildir ki, bütöv Azərbaycanda təntənəli şəkildə qeyd olunur. Bu il də alovlanan Novruz tonqalları xalqımızın birlik, qələbə və firavanlıq arzusuna şahidlik edəcək, düşmənin işğalçılıq ruhunu yandıracaq.
Nərminə ƏSGƏROVA,
Foto İlham BABAYEVİNDİR,
“Azərbaycan”
