Avropa Birliyinə üzvlük Türkiyə üçün strateji hədəf olaraq qalır. Türkiyə rəhbərliyinin bu məsələdə siyasi iradəsi dəyişməyib.
AZƏRTAC xəbər verir ki, bu barədə cümə günü, yanvarın 24-də Ankarada Türkiyənin xarici işlər naziri Hakan Fidan Avropa İttifaqının xarici işlər üzrə ali nümayəndəsi Kaya Kallas ilə birgə mətbuat konfransında bildirib.
Türkiyə diplomatiyasının rəhbəri vurğulayıb ki, qərəzli münasibətdən əl çəkmək bütün tərəflərin maraqlarına uyğundur.
“Ankara Brüsselin Türkiyə ilə yeni Dialoq Konsepsiyasını dərc etməsini gözləyir. Türkiyənin Aİ-yə daxil olmaqla bağlı müraciəti mövzusundan manipulyasiya və ayrı-ayrı Avropa ölkələrinin daxili siyasi gündəmini formalaşdırmaq üçün istifadə olunması qəbuledilməzdir. Belə addımlar geosiyasi itkilərlə doludur”, - deyən Fidan Ankara ilə Brüssel arasında iqtisadi sahədə də daxil olmaqla əlaqələrin daha da genişləndirilməsinin vacibliyinə diqqət çəkib.
Bununla bağlı Hakan Fidan Türkiyə-Avropa İttifaqı Gömrük razılaşmasının yenilənməsini, həmçinin Türkiyə vətəndaşları üçün viza maneələrinin aradan qaldırılmasını istəyib.
Fidan daha sonra bəyan edib ki, Ankara bölgədəki böhranların həlli istiqamətində Brüssellə əməkdaşlığa hazırdır.
Türkiyənin xarici işlər naziri Ukraynadakı vəziyyətə diqqət çəkərək müharibənin uzunmüddətli ədalətli razılaşma yolu ilə bitməli olduğunu vurğulayıb. “Ukraynada müharibəyə son qoymaq üçün danışıqlar prosesini bərpa etmək lazımdır” –deyə o qeyd edib.
Hakan Fidan, həmçinin anti-Suriya sanksiyalarının ləğvinin vacibliyini vurğulayıb ki, bu da qonşu ölkənin bərpasına müsbət təsir göstərəcək və qaçqınların vətənlərinə qayıtmasını sürətləndirəcək. “Bütün dünya ölkələri Suriyadakı yeni hakimiyyətlə əlaqə yaratmalıdır”, -deyə Fidan vurğulayıb.
Onun sözlərinə görə, Ankara Suriyada və terrorla mübarizə məsələsində yeni hökumətin addımlarını dəstəkləməyə hazırdır.
Kaya Kallas, öz növbəsində, Bolu vilayətindəki otellərdən birində baş verən yanğında həlak olanların ailələrinə və yaxınlarına başsağlığı verib.
O, Türkiyəni “Aİ-nin əhəmiyyətli tərəfdaşı və NATO-nun mühüm üzvü” adlandırıb.
Suriyadakı vəziyyətə toxunan Kallas qeyd edib ki, Avropa İttifaqı bu ölkənin bərpasına töhfə verməyə hazırdır.
Aİ diplomatik xidmətinin rəhbəri qeyd edib ki, Brüssel Suriyaya qarşı sanksiyaların mərhələli şəkildə ləğvinə hazırdır. O əlavə edib: “Suriya üçün ümidli gələcək Avropa Birliyinin maraqlarına uyğundur”.
Ukraynadakı müharibə ilə bağlı Kallas bildirib ki, beynəlxalq ictimaiyyət bu ölkədə uzunmüddətli sülhün tərəfdarıdır. Onun sözlərinə görə, hazırda Rusiyanın sülhə hazır olması üçün heç bir ilkin əlamət yoxdur.
Kallas qeyd edib ki, Avropa İttifaqı Kiyevə 134 milyard avro yardım ayırıb, eyni zamanda 75 min ukraynalı hərbçiyə təlim keçməyi öhdəsinə götürüb.
Aİ diplomatı Ukraynada tezliklə sülhün bərqərar olacağına ümid etdiyini bildirib.
