Azərbaycan qadını mərhəmətin, peşəkarlığın və qəhrəmanlığın təcəssümüdür
Tarixboyu qadın və ana adı qoşa çəkilib. Hər zaman şairlər onları vəsf edib, nəğmələrdə tərənnüm olunublar. Ən uca zirvələrin belə çata bilməyəcəyi bir məqama - müqəddəsliyə yüksəldiliblər. Təsadüfi deyil ki, cənnətin belə anaların ayaqları altında olması bəyan edilib, ləpirinin düşdüyü hər qarış yer müqəddəs sayılıb...
Obrazlı ifadə etsək, qadın-ana Yaradanın yerdəki davamçısı, insanlara can bəxş edən, həyatı əbədiləşdirən əvəzedilməz varlıqdır...
Mərhəmət dolu qəlb
Azərbaycan xalqının çoxəsrlik tarixində qadın obrazı həm də milli mənəviyyatın, siyasi iradənin və ictimai tərəqqinin hərəkətverici qüvvəsi kimi çıxış edib. Bizim cəmiyyətimizdə qadına münasibət, sadəcə, bir nəzakət qaydası deyil, min illərin süzgəcindən keçmiş dəyərlər sistemidir. Şərqdə ilk demokratik respublikanı quran və qadına seçki hüququnu bir çox Qərb dövlətindən daha öncə verən bir millətin təmsilçisi olaraq, Azərbaycan qadını bu gün də müasir dünyanın ən parlaq, intellektual və vətənpərvər simalarından hesab olunur.
Müasir Azərbaycan qadınının simvolu dedikdə, göz önünə ilk növbədə Birinci vitse-prezident, Heydər Əliyev Fondunun Prezidenti Mehriban xanım Əliyevanın obrazı gəlir. Mehriban xanım öz fəaliyyəti ilə sübut etdi ki, qadın zərifliyi ilə dövlət idarəçiliyinin qətiyyəti bir nöqtədə birləşəndə böyük möcüzələr yaratmaq mümkündür.
Mehriban xanım Əliyeva həm ölkə daxilində, həm də beynəlxalq müstəvidə Azərbaycan mədəniyyətinin, humanizminin və xeyriyyəçilik ənənələrinin ən böyük himayədarıdır. Onun təşəbbüsləri sayəsində reallaşan təhsil, səhiyyə və sosial layihələr minlərlə insanın taleyini dəyişib. Lakin birinci xanımın ən böyük xidməti Azərbaycan qadınının cəmiyyətdəki yerini və rolunu yeni bir mərhələyə qaldırmasıdır. Mehriban xanım həm bir dövlət xadimi, həm bir ana, həm də xalqın dərdinə yanan bir vətəndaş kimi hər bir azərbaycanlı qadın üçün əsl nümunədir. Humanizm prinsiplərinə söykənən çoxşaxəli fəaliyyəti ilə dünya miqyasında adı ehtiram və hörmətlə çəkilən Mehriban xanım Əliyeva Azərbaycan qadınının mərhəmət dolu qəlbinin dövlət siyasətindəki inikasıdır.
Evdə şəfqətli ana, işdə peşəkar mütəxəssis
Bu gün Azərbaycanda qadınlar elmin zirvələrindən tutmuş ağır sənayeyə, diplomatiyadan idmana qədər hər bir sahədə öz sözlərini qətiyyətlə deyirlər. Azərbaycan qadını artıq, sadəcə, bir icraçı deyil, həm də böyük layihələrin müəllifidir. Ölkəmizdə qadın deputatların, diplomatların, iş adamlarının və ictimai fəalların sayının durmadan artması dövlətimizin yürütdüyü gender siyasətinin və qadın zəkasına verilən yüksək qiymətin göstəricisidir.
Müasir Azərbaycan qadını öz zəhməti və biliyi ilə cəmiyyətimizin inkişafına misilsiz töhfələr bəxş edir. O, evdə şəfqətli ana, işdə isə prinsipial mütəxəssisdir.
Azərbaycan qadınının ən uca zirvəsi isə onun vətənpərvərliyidir. Tarixboyu Tomrislərdən başlayan bu yol davam etdi və İkinci Dünya müharibəsində olduğu kimi, Birinci və İkinci Qarabağ müharibələrində də özünün ən parlaq zirvələrinə ucaldı. Bizim qadınlarımız təkcə arxa cəbhədə deyil, bilavasitə döyüş meydanlarında da igidlikləri ilə tarix yazdılar.
Milli qəhrəmanlarımız Salatın Əsgərova, Gültəkin Əsgərova kimi şəhidlərimiz sübut etdilər ki, qəhrəmanlıq cinsiyyət tanımır. Onlar qələmi silaha dəyişən, xəstəxana palatalarını döyüş meydanına çevirən fədakarlıq timsallarıdır. Eyni zamanda 44 günlük Vətən müharibəsi zamanı da cəbhədə tibb bacısı kimi yaralı əsgərlərimizə can verən qadınlarımızın hər birinin xidməti əvəzolunmazdır. Vətən uğrunda şəhid olan Arəstə Baxışova qürur mənbəyimizdir.
Azərbaycan qadınının fədakarlıq hüdudları sonsuzdur. Bunun ən son və uca örnəklərindən biri Milli Qəhrəman Hökumə Əliyevadır. 2024-cü il dekabrın 25-də Rusiya səmasında sərnişin təyyarəmizin vurulması nəticəsində şəhidlik zirvəsinə ucalan Hökumə Əliyeva öz peşəsinə və insanlığa olan sadiqliyini canı bahasına sübut etdi. Onun bu faciəli hadisə zamanı nümayiş etdirdiyi mətanət Azərbaycan qadınının ən çətin sınaqlar qarşısındakı soyuqqanlılığını və cəsarətini bütün dünyaya nümayiş etdirdi.
Məhz həmin məşum dəqiqələrdə təyyarənin salonunda Hökumə Əliyevanın dilindən səslənən və bu gün də hər birimizin qulağında təkrarlanan "Hər şey yaxşı olacaq!" ifadəsi yaşamla ölüm arasında körpüyə çevrildi. Bu cümlə sərnişinlər üçün, sadəcə, təsəlli deyildi, bu, ümidin özü idi. Azacıq titrək, lakin son dərəcə inamlı səslə deyilən bu sözlər insanları həyata elə möhkəm bağladı ki…
Prezident İlham Əliyevin sərəncamı ilə "Azərbaycanın Milli Qəhrəmanı" adına layiq görülən Hökumə Əliyeva Salatın Əsgərova və Gültəkin Əsgərova kimi qəhrəmanlarımızın açdığı yolu yeni dövrün rəşadəti ilə davam etdirdi.
Xalqımızın əbədi baharı, sönməyən işığı
Məğrur Azərbaycan qadınının simvolunu həm də şəhid analarının simasında görürük. Onlar Vətənə canından can vermiş qəhrəmanların yaradıcılarıdır.
Vətən müharibəsində şəhid anasının mətanəti, onun "Vətən sağ olsun!" deyərək tabutu qarşılaması Azərbaycan qadınının ruhunun sarsılmazlığını bir daha dünyaya nümayiş etdirdi. Bu analar təkcə öz övladlarını deyil, bütöv bir millətin qürurunu çiyinlərində daşıyırlar.
Otuz ilə yaxın yurd həsrəti ilə yaşayan, lakin ümidini heç vaxt itirməyən məcburi köçkün qadınlarımızın fədakarlığı da unudulmazdır. Onlar çadır şəhərciklərində, vaqonlarda, yataqxanalarda çətin şəraitdə övlad böyütdülər, ancaq o övladlara Şuşanı, Ağdamı, Kəlbəcəri elə sevdirdilər ki, həmin gənclər böyüyüb torpaqlarımızı azad etdilər.
Bəli, bu Zəfərin memarlarından biri də məhz o dözümlü qadınlardır.
Azərbaycan qadını həm elmdə, həm siyasətdə, həm də döyüş meydanında daim öz sözünü deyir. Lakin o, hər şeydən öncə anadır, vətənpərvər övladlar yetişdirən, evinin nuru ilə cəmiyyəti aydınladan müqəddəs varlıqdır.
8 Mart - təbiətin oyandığı, baharın ilk nəfəsinin duyulduğu bir bayram günüdür. Azərbaycan qadını da öz varlığı ilə cəmiyyətimizə bahar təravəti, ailəmizə hüzur, dövlətimizə güc qatır. Bu gün Azərbaycan bayrağı azad edilmiş torpaqlarda dalğalanırsa, bu vətən bütövdürsə, bu Zəfərdə məğrur qadınlarımızın da əməyi, duası və sarsılmaz ruhu var.
Bayramın mübarək, Azərbaycan Qadını! Sənin ucalığın Azərbaycanın ucalığıdır.
Yasəmən MUSAYEVA,
"Azərbaycan"
