Piyada keçidləri nəqliyyat axınını tənzimləmək və insanların təhlükəsizliyini təmin etmək üçün vacib infrastruktur obyektləridir. Lakin bu keçidlərin bəzilərinin baxımsız və bərbad vəziyyətdə olması vətəndaşlarda ciddi narahatlıq yaradır. Səliqəsiz, dağılmış döşəmə örtükləri, sınıq məhəccərlər və çirkli şüşələr bu keçidlərin estetik görünüşünü korlamaqla yanaşı, piyadaların hərəkətini də çətinləşdirir.
Baxımsızlıqdan bərbad vəziyyətə düşən yerüstü piyada keçidlərindən biri Abşeron Gənclər şəhərciyi ərazisindədir. İstifadəyə veriləndən bəri bura sanki təmizlik görməyib. Döşəmələr çirk içində, hər tərəf zibillə dolu, şüşələr günlərlə silinmədiyindən ətrafı görmək mümkün deyil, pilləkənlər uçuq-sökük... Hündürlüyü kifayət qədər yüksək olan yerüstü keçiddə eskalatorun və ya lift sisteminin olmaması sakinləri daha böyük problemlə üz-üzə qoyur. Magistral yoldan keçməyin həm qadağan, həm də təhlükəli olduğunu nəzərə alsaq, uşaqlı valideynlər, xəstələr, yaşlılar, fiziki məhdudiyyətli vətəndaşlar nə etməlidirlər? Onlar üçün belə hündür pilləkənləri qalxıb-düşməyin nə qədər çətin olacağı nəzərə alınmayıbsa, onda böyük vəsaitlər hesabına başa gələn və biganəlik qurbanı olan bu keçidə nə ehtiyac var?! Axı keçidlər piyadaların yolu təhlükəsiz və rahat keçməsi üçün nəzərdə tutulur. Bu halda isə heç bir rahatlıqdan söhbət gedə bilməz. Uşaq arabaları ilə yolu keçmək istəyən analar kənardan kiminsə köməyi olmadan keçiddən istifadə edə bilmirlər. Elə yaşlı insanların da necə çətinliklə pilləkənləri qalxması adamın ürəyini ağrıdır. Keçiddə lift sistemi və ya eskalatorun quraşdırılmaması keçidə qalxa bilməyən vətəndaşları bəzən yolu qadağan olunmuş ərazilərdən keçmək məcburiyyətində qoyur ki, bu da avtomobil qəzalarını qaçılmaz edir. Keçidin ətrafındakı antisanitar vəziyyət, baş çatladan üfunət isə başqa mövzudur...
Bu cür baxımsız keçidləri həm də əlaqədar qurumun piyadalara olan münasibəti kimi qəbul etmək olar. Halbuki piyada keçidləri sakinlərin gündəlik həyatının ayrılmaz hissəsidir və onların təmiz, işıqlı və təhlükəsiz olması vacibdir. Müvafiq qurumların bu sahəyə nəzarəti gücləndirməsi və keçidlərin mütəmadi təmir edilməsi, heç olmasa, vaxtlı-vaxtında təmizlənməsi piyadaların xeyrinə olardı.
Ümidvarıq ki, beynəlxalq standartlara cavab verən, müasir texnologiyalar əsasında inşa edilən yerüstü piyada keçidləri ilə vətəndaşların avtomobil yolunu rahat və təhlükəsiz keçmələrini təmin etmək üçün Azərbaycan Avtomobil Yolları Dövlət Agentliyi müvafiq tədbir görəcək.
N.ƏSGƏROVA,
"Azərbaycan"
