Uzun illər pedaqoji fəaliyyətlə məşğul olmuşam. Bu yaxınlarda təqaüdə çıxmışam. Hər zaman olduğu kimi, yenə də rayonumuzun ictimai həyatında fəal iştirak etməyə çalışıram.
Qarabağ savaşının zəfərlə başa çatması, 30 il Ermənistan silahlı qüvvələrinin işğalı altında qalan cənnət Qarabağımızın azad edilməsi, müharibənin vurduğu yaraların sağaldılması üçün dövlət səviyyəsində həyata keçirilən möhtəşəm tədbirlər adama sonsuz qürur, yaşamaq həvəsi verir.
Ağdama, Xankəndiyə, Şuşaya, Laçına dəfələrlə səfər etmişəm. Gördüklərim gerçək bir möcüzədir. Hər tərəfdə tikinti-quruculuq işləri gedir. Yeni inşa edilən körpülər, tunellər, fabriklər, zavodlar, kəndlər, şəhərlər vətən sevgisinin ifadəsi kimi məmnunluq doğurur. Prezident İlham Əliyevin Qarabağa və Şərqi Zəngəzura hər səfəri Zəfər salnaməsinin yeni və parlaq səhifələri kimi tarixə həkk olur. Dünən erməni işğalından azad edilən ərazilərimizdə dövlət bayrağını qürurla ucaldan Müzəffər Ali Baş Komandan bu gün müharibənin vurduğu yaralara məlhəm qoyur, yeni yaşayış məntəqələrinin təməlqoyma mərasimlərində iştirak edir, fabrik və zavodların açılış lentlərini kəsir. Allahıma şükürlər edirəm ki, bu günləri görməyi mənə də nəsib etdi.
Tikilən, qurulan, abadlaşan təkcə işğaldan azad edilmiş ərazilər deyil. Bu gün doğma Ağcabədinin də gözəlliyi göz qamaşdırır. Hər yanda səliqə-sahman diqqət çəkir. Rayon mərkəzi də, kəndlər də qayğı ilə əhatə olunub. Rayon icra hakimiyyətinin başçısı Rabil Hüseynov kəndləri qarış-qarış gəzir, ənənəyə çevrilmiş səyyar qəbullarda rayon sakinləri ilə səmimi görüşlər keçirir, hər kəsi diqqətlə dinləyib problemlərini öyrənir. Belə görüşlərin birində mən bizim Avşar kəndinin yolunun bərbad olmasını diqqətə çatdırdım. Aradan bir neçə ay keçdi. Yolun əsaslı təmiri gerçəkləşdi. Rabil müəllim mənə zəng vurub təbrik etdi, xeyir-dua verdi.
Biz xoşbəxtik. Ona görə xoşbəxtik ki, dövlətin xalq üçün çalışdığı bir ölkədə yaşayırıq. Əgər dövlətin başçısı xalqın birnömrəli xidmətçisi olduğunu uca səslə, həm də qürurla bəyan edirsə, bu ölkədə hər zaman ədalət, əmin-amanlıq, firavanlıq hökm sürəcək.
Ədalət HÜSEYNOV,
Ağcabədi rayonunun Avşar kənd sakini
jpg_1734068378.jpg)
