Regionda aparıcı ölkə, söz sahibi olan Azərbaycan həm də dünyada sülhü və təhlükəsizliyi təşviq edən, bu istiqamətdə real addımlar atan dövlət kimi tanınır. Respublikamızın mədəniyyətlər və sivilizasiyalar arasındakı dialoqa verdiyi töhfələr də bu məqsəddən irəli gəlir. Habelə müxtəlif vaxtlarda rəsmi Bakı özünün barışdırıcılıq missiyası ilə dost və tərəfdaş dövlətlər arasında meydana çıxan ziddiyətlərin aradan qaldırılmasına nail olub.

Respublikamız bütün platformalarda qlobal təhlükəsizliyə layiqli töhfələr verib

Respublikamız daim dünyada sülhyaratma prosesinə böyük töhfələr verir, bu istiqamətdə səmərəli təklif və təşəbbüslərlə çıxış edir, öz praktiki fəaliyyəti ilə qlobal səviyyədə təhlükəsizliyin təmin olunmasında fəal rol oynayır. Respublikamız təmsil olunduğu müxtəlif platformalarda da bu məqsədlə real effektiv nəticələri olan fəaliyyət həyata keçirib. Hələ bir neçə il əvvəl BMT Təhlükəsizlik Şurasına üzvlüyü və sədrliyi dövründə  Azərbaycan əsas diqqətini dünyanın müxtəlif yerlərindəki konfliktlərin aradan qaldırılmasına yönəltmişdi. 

Deyilənlərə başqa bir misal olaraq Azərbaycanın Qoşulmama Hərəkatına sədrliyi dövründə gördüyü işləri göstərmək olar. Azərbaycanın bu təşkilata sədrliyi çox çətin bir vaxta, bütün dünyada COVID pandemiyasının tüğyan etdiyi dövrə təsadüf etdi. Buna baxmayaraq Prezident İlham Əliyev Qoşulmama Hərəkatını COVID pandemiyası uğrunda mübarizəyə uğurla səfərbər etdi. COVID pandemiyası zamanı Azərbaycan 80-dən çox ölkəyə maddi və humanitar dəstək göstərdi. Respublikamız peyvəndlərə çıxışla əlaqədar dövlətlər arasındakı qeyri-bərabərliyin aradan qaldırılması üçün qətiyyətli fəaliyyət həyata keçirdi.

Bakı dost və tərəfdaş dövlətlər arasındakı problemlərin həllində də daim fəallıq göstərib

Qeyd etdiyimiz kimi, respublikamız dost və tərəfdaş dövlətlər arasındakı problemlərin həllində də hər zaman fəallıq göstərib. Bir neçə il əvvəl Türkiyə və Rusiya arasındakı münasibətlərdə yaranmış dərin böhranın aradan qaldırılmasında məhz rəsmi Bakı böyük rol oynamış, onların barışmasına töhfələr vermişdi. Türkiyənin keçmiş xarici işlər naziri Mövlud Çavuşoğlu da ölkəsinin Rusiya ilə münasibətlərinin normallaşmasında Azərbaycan Prezidenti İlham Əliyevin rolunu xüsusi vurğulamışdı. 

ADA Universitetində keçirilən "Yeni dünya nizamına doğru" mövzusunda beynəlxalq forumda Prezident İlham Əliyevə verilən suallardan biri də elə bu mövzuda oldu. Almaniyanın Beynəlxalq və Təhlükəsizlik Məsələləri üzrə İnstitutunu təmsil edən Darya İsaçenko Azərbaycanın Türkiyə ilə İsrail arasında gərginliyin azaldılması istiqamətində  hər hansı bir fəaliyyətdə rol oynaması ilə maraqlandı.

Məlum olduğu kimi, həm Türkiyə, həm də İsrail Azərbaycana yaxın dövlətlərdir. Türkiyə respublikamızın müttəfiqidir. İsrail də dost dövlətdir. Ona görə də, Prezident 

İlham Əliyevin qeyd etdiyi kimi, bu iki ölkə arasındakı gərginlik bizim üçün çox narahatlıq doğurur. Təbii ki, Azərbaycan belə vəziyyətdə seyrçi qala bilməzdi. Prezident İlham Əliyev forumda bu barədə danışaraq dedi ki, Türkiyə ilə İsrail arasında ilk uğurlu barışıq müəyyən dərəcədə Azərbaycanın vasitəçiliyi ilə əldə olunub. "İlk böhran zamanı biz ölkələri yaxınlaşdırmağa çalışmaq üçün fəal rol oynadıq. Bu, təkcə Azərbaycan deyildi, lakin deyərdim ki, Azərbaycan bu prosesdə birinci yerdə idi. Yenə də bu, bağlı qapılar arxasında baş verdi. Biz bunu heç vaxt ictimailəşdirmədik. Biz buna görə heç vaxt özümüzü tərifləməyə çalışmadıq. Biz, sadəcə olaraq, müttəfiqimiz və qardaşımız olan Türkiyəyə, dostumuz İsrailə öz əlaqələrini yenidən qurmaq üçün yardım etmək istədik", - deyə Prezident bildirdi.

Bu gün də Azərbaycan Türkiyə və İsrail arasında münasibətlərin normallaşmasına çalışır. Prezident İlham Əliyevin qeyd etdiyi kimi, Azərbaycan prosesə kömək etmək üçün əlində olan hər şeyi edir.

Azərbaycanın dünyada sülhün təmin olunmasına verdiyi töhfələr, həyata keçirdiyi barışdırıcılıq missiyası həm də beynəlxalq miqyasda söz sahibi olması ilə əlaqədardır. Dünyanın aparıcı siyasi və iqtisadi dairələri Azərbaycanın regiondakı liderliyini, Prezident İlham Əliyevin qlobal siyasətdəki rolunu daim yüksək qiymətləndirirlər. Bütün bunlar həm də onu deməyə əsas verir ki, Azərbaycan qlobal səviyyəli məsələlərin həllində fəal iştirakçıdır.

 Rəşad CƏFƏRLİ,

"Azərbaycan"