Aİ və AŞPA ikili standartları ilə Azərbaycan xalqının haqlı nifrətini qazanıblar
İkili standartlar, böhtan, şantaj kampaniyası bu gün bir çox beynəlxalq təşkilatı, parlamentləri, siyasətçiləri çıxılmaz vəziyyətə salıb. Avropa İttifaqı və AŞPA bu baxımdan xüsusilə fərqlənir.
Bu təşkilatların İkinci Qarabağ müharibəsindən sonra Azərbaycana qarşı apardıqları çirkin böhtan kampaniyaları, ikili standartlar prinsipləri ilə yanaşma məsələləri daha da genişlənib. Xüsusilə də Fransa ölkəmizə qarşı həyata keçirilən siyasətin başında duraraq Cənubi Qafqazda yaranmış sabitliyin pozulması üçün əlindən gələni edir. Azərbaycanın öz ərazi bütövlüyünü və suverenliyini tam bərpa etməsi müəyyən beynəlxalq dairələri, o cümlədən Fransanı ciddi narahat edir. Çünki dövlətimizin erməni işğalçılarını torpaqlarımızdan qovması ilə Fransa kimi ölkələrin Cənubi Qafqazdakı planları pozulub. Bu səbəbdən də rəsmi Paris davamlı olaraq ölkəmizə qarşı qərəzli mövqe nümayiş etdirir. Fransa ermənilərdən çox ermənilik edərək hər fürsətdə ölkəmizlə bağlı qərəz və böhtan dolu mövqe ortaya qoyur. Bu ölkənin Avropa və xarici işlər naziri Jan-Noel Baronun Avropa İttifaqının XİN başçılarının iclasında Azərbaycan haqqında birtərəfli və ermənilərin mövqeyinə uyğun fikirlər səsləndirməsi də bunun göstəricisidir. Azərbaycanın Xarici İşlər Nazirliyi məsələyə münasibətini bildirib və fransız nazirin iddialarını rədd edərək pisləyib. Bəyanatda qeyd olunduğu kimi, Fransanın siyasətindəki ikili yanaşma, yəni sülh niyyətini bəyan edərkən münaqişəyə sürükləyən davranışlar narahatlıq doğuran uyğunsuzluğu nümayiş etdirir. Belə ikiüzlü siyasət isə regionda davamlı sülh perspektivlərinə mane olur. Bu gün də Qərb, Avropa İttifaqı, AŞPA və bəzi beynəlxalq təşkilatlar öz haqqını, ədaləti bərpa edən, düşməni torpaqlarından çıxaran, sülhə, əmin-amanlığa, Cənubi Qafqazda təhlükəsizliyi təmin etməyə çalışan Azərbaycana qarşı düşmən mövqeyindədirlər.
Aprelin 12-də AŞPA prezidenti Teodoros Rusopulosun "Alpha News" qəzetinə müsahibəsi zamanı Azərbaycan əleyhinə səsləndirdiyi iddialar da bir daha təsdiq etdi ki, "xristian klubları" sifarişlər əsasında Azərbaycana qarşı çirkin kampaniya həyata keçirir.
Onu da qeyd edək ki, AŞPA-da Azərbaycan nümayəndə heyətinin səlahiyyətlərinin dayandırılması barədə ədalətsiz və hüquqi cəhətdən suallar doğuran təşəbbüsü dəstəkləyən 76 nəfər AŞPA üzvü kimi Teodoros Rusopulosun da adı qara siyahıya daxil edilib. Onun Azərbaycanla bağlı səsləndirdiyi fikrə Xarici İşlər Nazirliyinin mətbuat katibi Ayxan Hacızadə dərhal reaksiya bildirərək ölkəmizin mövqeyini bəyan etmişdi. Qeyd edilmişdi ki, Avropa Şurası nizamnaməsinin pozulması, AŞPA tərəfindən səlahiyyətlərin aşılması nəticəsində ölkəmiz əleyhinə atılan addımdan sonra belə Azərbaycan tərəfinin dialoqa açıqlığını nümayiş etdirməsinə baxmayaraq, Rusopulos, Şvabe və onlar kimi bir sıra şəxslərin davamlı şəkildə ölkəmizin beynəlxalq hüquqa və ədalətə söykənən mövqeyinə kölgə salmağa çalışdıqları məlumdur.
Həqiqətən də, əgər AŞPA sədri diktator axtarırsa, diktatorun ən böyüyü Fransa Prezidentidir, çünki o, siyasi rəqiblərinə qarşı müharibə elan edib, "sarı jiletli"lərə, vətəndaşlara qarşı da belə davranıb. Əlcəzairdə nə qədər insanın qanını töküblər. Bu kimi nə qədər faciələr törədiblər. Yaxşı olar ki, bu təşkilat ölkəmizi ittiham etməkdənsə özlərinə baxsın, Azərbaycana qarşı apardığı çirkin siyasətə son qoysun.
Elə məhz bu səbəbdən də AŞPA Azərbaycan xalqının haqlı nifrətini qazanıb.
Fransa Aİ-dəki səlahiyyətindən istifadə edərək Azərbaycana qarşı sanksiyaların qəbul edilməsinə can atır. Hayastanı yenidən revanşizmə sürükləyir. Fransanın Ermənistanı öldürücü silahlarla təmin etməsi Cənubi Qafqazda sülh üçün ən böyük təhdidlərdən biridir.
Avropa İttifaqının "mülki missiyası"nın səlahiyyət müddətinin uzadılması və bu fonda "müşahidəçi"lərin Azərbaycan-Ermənistan sərhədlərində yenidən aktivləşməsi regiona yaxşı heç nə vəd etmir və Cənubi Qafqazda yeni təxribatlara hazırlığın göstəricisidir. Təbii ki, nə missiyanın səlahiyyət müddətinin uzadılması, nə də missiyanın yenidən fəallaşması təsadüf hesab edilməlidir. Bütün bunlar Azərbaycana qarşı aparılan çirkin kampaniyanın, ikili standartların tərkib hissəsidir.
Lakin regionun lider dövləti olaraq Azərbaycana heç bir təzyiq göstərmək mümkün deyil. Cənubi Qafqazda sülhün təminatçısı kimi Azərbaycan öz yolu ilə irəliyə doğru inamla addımlayır. Heç bir təzyiq, təhdid ölkəmizi öz yolundan döndərə bilməz. Bunu ölkənin lideri Prezident İlham Əliyev yerli və xarici ölkələrin KİV-inə müsahibələrində, beynəlxalq forumlar və konfranslardakı çıxışlarında dəfələrlə bəyan edib.
Rəşad BAXŞƏLİYEV,
"Azərbaycan"
jpg_1773660552.jpg)
