Onun bəyanatlar verərkən səmimiliyinə əmin olmaq mümkün deyil
"Bu günlərdə Ermənistanın baş naziri Nikol Paşinyan media nümayəndələri qarşısında çıxış edərkən birbaşa və ya dolayısı ilə Ermənistan-Azərbaycan münasibətlərinin nizamlanması ilə bağlı bir sıra maraqlı açıqlamalar verib. Paşinyan xüsusilə sərhədlərin delimitasiyası və demarkasiyası ilə bağlı məsələyə toxunub".
Bu fikirləri "Azərbaycan" qəzetinə Milli Məclisin deputatı Kamran Bayramov deyib. O xatırladıb ki, Ermənistan baş naziri delimitasiya və demarkasiya prosesinin davam etdirilməsi məsələsi ilə bağlı Azərbaycana yazılı təklif göndərdiklərini və cavab gözlədiklərini bildirib. "Düşünmürəm ki, çıxılmaz vəziyyət yaranıb və biz bu istiqamətdə ardıcıl işləməyə davam edəcəyik", - Paşinyan deyib. Həqiqətən də, digər məsələlərdən fərqli olaraq, delimitasiya və demarkasiya məsələsi münasibətlərin normallaşması yolunda ən az sual doğurur və bəlkə də ən məhsuldar məsələdir. Paşinyan Ermənistanın üçtərəfli Bəyanata sadiqliyini bir daha bədnam "sülh kəsişməsi"nin bəzi perspektivləri ilə əvəz edərək kommunikasiyaların açılması məsələsindən də danışıb. Bu mənada Paşinyan növbəti dəfə manipulyativ ritorika səsləndirib: "Azərbaycanda deyirlər ki, Ermənistan həll yolu təqdim etmədiyi üçün onlar İran marşrutundan istifadə edəcəklərini qərara alıblar. Bu o deməkdir ki, İran marşrutu və şərtləri onlar üçün məqbuldur, əks halda onlar bu yoldan istifadə etməzdilər. Biz də o cümlədən bu kontekstdə hər şeyi aydın və başadüşülən etmək üçün Ermənistanın ərazisindən eyni yolu təqdim etməyə hazırıq".
K.Bayramov qeyd edib ki, Ermənistanın baş nazirinin bəlkə də ən maraqlı açıqlaması Ermənistan Konstitusiyası ilə bağlı dediyi fikirlər olub: "İllər əvvəl Ermənistan Respublikasının müstəqillik bəyannaməsinin qəbulunun ildönümü ilə bağlı mesajımda demişdim ki, bəyannamənin mətnini öyrənərək, bu mətnin müstəqil, suveren Ermənistanın mövcud olmaması ilə bağlı olduğu qənaətinə gəldim. Və əgər mən bunu deyirəmsə, deməli, Konstitusiyanın yeni mətnində müstəqillik bəyannaməsinə istinadın olmasını bəyan edə bilmərəm. Əksinə, mən deyə bilərəm ki, fikrimcə, konstitusiyanın yeni mətnində müstəqillik bəyannaməsinə istinad olmamalıdır, lakin bununla bağlı Ermənistan xalqı qərar verəcək və təbii ki, siyasi qüvvələr lehinə və əleyhinə arqumentlər irəli sürməli olacaqlar". Həmişə olduğu kimi, bəyanat bir az qarışıqdır, amma mətləbi bəllidir. Yeri gəlmişkən, xatırladım ki, Paşinyan müstəqillik bəyannaməsi haqqında "illər əvvəl" deyil, keçən ilin noyabrında, Ermənistan parlamentində 2025-ci ilin dövlət büdcəsi layihəsinin müzakirəsi zamanı danışıb. Paşinyan o zaman qeyd edib ki, bu bəyannaməni son illər dəfələrlə oxuyub və dəhşətli qənaətə gəlib ki, müstəqillik bəyannaməsinin məzmunu ondan ibarətdir ki, Ermənistan Respublikası mövcud ola bilməz".
Deputat vurğulayıb ki, o, həmin vaxt Ermənistan Konstitusiyasından müstəqillik bəyannaməsinə istinadın çıxarılmasının zəruriliyi ilə bağlı mövqeyini aydın ifadə edib. İndi isə bu fikri yenidən səsləndirən Paşinyan Ermənistan ictimaiyyətini inandırmağa tələsib ki, onun mövqeyi Bakının tələbləri ilə bağlı deyil və bu məsələ Ermənistandakı inqilabdan dərhal sonra gündəmdə olub. Bəli, həqiqətən də, hələ 44 günlük Vətən müharibəsindən əvvəl Paşinyanın komandası Konstitusiyanın dəyişdirilməsi ilə bağlı müzakirələrə başlayıb. Halbuki o vaxt müzakirələr müstəqillik bəyannaməsindən deyil, daha çox Ermənistan dövlətçiliyinin struktur islahatlarından, xüsusən də prezident idarəçiliyi formasına mümkün qayıdışdan gedirdi. Əlbəttə ki, Ermənistan liderinin əsas qanuna dəyişikliklərin edilməsi zərurətini öz cəmiyyətinə nə dərəcədə dəqiq təqdim etməsi bizi maraqlandırmır. Əsas odur ki, bu iş görülsün. Erməni xalqının nə düşündüyünü indi anlamaq bizim üçün çox vacibdir. Əgər seçicilər referendumda Konstitusiyanı dəyişməkdən imtina edərsə, bu o deməkdir ki, sülh çox uzun müddət görünməyəcək.
Deputat bildirib ki, bütövlükdə Paşinyanın çıxışını Konstitusiyanın dəyişdirilməsinin zəruriliyinin təbliği baxımından konstruktiv hesab etmək olar: "Eyni zamanda həmişə nəzərə almaq lazımdır ki, bu irəliləyiş Paşinyanın sülhsevərliyi ilə deyil, rəsmi Bakının Ermənistanı buna məcbur etməsi ilə izah olunur. Üstəlik, Paşinyanın sözləri tez-tez hərəkətlərindən fərqlənir və onun bəyanatlarında səmimi olduğuna əmin ola bilmərik. Ermənistanın fəal silahlanması isə bu fikrimizi gücləndirməyə vadar edir. Nəzərə almaq lazımdır ki, əsas qanuna əlavə və dəyişikliklərlə bağlı səsvermə günündə seçimi Paşinyan yox, Ermənistanın bütün vətəndaşları etməli olacaq. Lakin Ermənistan cəmiyyətinin bu seçimə nə dərəcədə hazır olacağı baş nazirdən asılıdır. Paşinyan erməni cəmiyyətini köhnə ideologiyadan qurtulmağın zəruriliyinə inandırmaqda aktiv və ardıcıl olacaqmı, yoxsa çiyinlərini çəkərək, "özünüz qərar verin" deyimi ilə sadəcə olaraq problemi bəyan edəcəkmi, bunu zaman göstərəcək".
Ə.QARDAŞXANOVA,
"Azərbaycan"
jpg_1763137673.jpg)
