Azərbaycan-Qırğızıstan münasibətləri son illərdə yüksək dinamika ilə inkişaf edərək keyfiyyətcə yeni mərhələyə yüksəlib. Bu münasibətlərin təməlində dövlətlərarası siyasi etimadla yanaşı, Azərbaycan və qırğız xalqlarını birləşdirən ortaq tarix, dil, mədəniyyət və mənəvi dəyərlər dayanır. Dövlət başçıları arasında formalaşmış sıx və qarşılıqlı etimada əsaslanan dialoq ikitərəfli əlaqələrin bütün istiqamətlər üzrə inkişafına mühüm impuls verib. Bu baxımdan Azərbaycan-Qırğızıstan münasibətləri yalnız iki dövlət arasındakı əlaqələr deyil, həm də Türk dünyasında həmrəyliyin möhkəmləndirilməsi, Mərkəzi Asiya ilə Cənubi Qafqaz arasında siyasi, iqtisadi və humanitar bağların gücləndirilməsi baxımından strateji əhəmiyyət daşıyır.
Bu fikirləri AZƏRTAC-a açıqlamasında Milli Məclisin deputatı Mehriban Vəliyeva söyləyib. Deputat bildirib ki, Azərbaycan-Qırğızıstan münasibətləri hazırda yüksələn dinamika ilə inkişaf edən və çoxşaxəli xarakter alan strateji tərəfdaşlıq kimi qiymətləndirilə bilər. Dövlət başçıları arasında intensiv siyasi dialoq əlaqələrin bütün istiqamətlər üzrə inkişafına ciddi impuls verib. Azərbaycan və Qırğızıstan türk dövlətləri arasında həmrəyliyin möhkəmləndirilməsini, siyasi və iqtisadi əlaqələrin genişləndirilməsini, nəqliyyat-kommunikasiya imkanlarının artırılmasını və humanitar münasibətlərin dərinləşdirilməsini fəal şəkildə dəstəkləyir. Prezident İlham Əliyevin Qırğızıstan və digər Mərkəzi Asiya dövlətləri ilə əlaqələrin inkişafına verdiyi önəm nəticəsində qarşılıqlı səfərlər, yüksəksəviyyəli siyasi təmaslar və yeni əməkdaşlıq mexanizmləri daha intensiv xarakter alıb.
“Azərbaycanın Orta Dəhlizin inkişafına verdiyi strateji əhəmiyyət Qırğızıstanla əməkdaşlığa da yeni məzmun qazandırır. Mərkəzi Asiya ilə Cənubi Qafqazı birləşdirən nəqliyyat və logistika imkanlarının genişləndirilməsi həm Azərbaycan, həm Qırğızıstan, həm də bütövlükdə Türk dövlətləri üçün yeni iqtisadi imkanlar yaradır.
Azərbaycanın Şərq-Qərb və Şimal-Cənub nəqliyyat dəhlizlərinin inkişafındakı mövqeyi ölkəmizi Mərkəzi Asiya ilə Avropa arasında mühüm bağlantı məkanına çevirir. Qarşılıqlı investisiyaların təşviqi, sahibkarlar arasında birbaşa əlaqələrin qurulması və birgə müəssisələrin yaradılması da ikitərəfli iqtisadi münasibətlərin daha dayanıqlı və uzunmüddətli xarakter almasına imkan verə bilər.
Azərbaycan-Qırğızıstan münasibətlərinin mühüm xüsusiyyətlərindən biri qarşılıqlı siyasi və mənəvi dəstəyin konkret addımlarla müşayiət olunmasıdır. Qırğızıstan Azərbaycanın ərazi bütövlüyünü dəstəkləməklə yanaşı, Qarabağda aparılan bərpa prosesinə də əməli töhfə verib. Ağdam şəhərində Qırğızıstanın təşəbbüsü və dəstəyi ilə məktəb layihəsinin həyata keçirilməsi bunun mühüm nümunələrindən biridir.
Humanitar sahə də Azərbaycan-Qırğızıstan münasibətlərinin mühüm istiqamətlərindən biridir. Təhsil, elm, mədəniyyət, incəsənət, gənclər və idman sahələrində əlaqələrin genişləndirilməsi xalqların bir-birinə daha da yaxınlaşmasına xidmət edir. Universitetlərarası əlaqələrin inkişafı, tələbə və müəllim mübadilələrinin artırılması, birgə elmi layihələrin həyata keçirilməsi, rəqəmsal təhsil və müasir texnologiyalar üzrə əməkdaşlıq bu sahədə yeni imkanlar yaradır. Mədəni əlaqələrin inkişafında isə ortaq ədəbi və tarixi irsin öyrənilməsi, mədəniyyət günlərinin keçirilməsi, kino və teatr layihələrinin təşkili, sənətçilər arasında mübadilənin genişləndirilməsi mühüm əhəmiyyət daşıyır”,- deyə deputat əlavə edib.
Mehriban Vəliyeva Qırğızıstanın böyük yazıçısı Çingiz Aytmatovun irsinin də bu baxımdan xüsusi əhəmiyyət daşıdığını qeyd edib. O vurğulayıb ki, Aytmatovun yaradıcılığı Azərbaycan oxucusu üçün də doğmadır və yazıçının əsərləri Türk dünyasının ortaq mənəvi xəzinəsinin mühüm hissəsidir. Aytmatov irsinin birgə mədəni layihələr vasitəsilə daha geniş təbliği iki ölkənin humanitar əməkdaşlığına əlavə impuls verə bilər. Gənclər və turizm sahələrində əməkdaşlığın genişləndirilməsi, birgə forumların, sosial layihələrin və turizm marşrutlarının təşkili də qarşılıqlı əlaqələrin inkişafına mühüm töhfə verə bilər.
“Azərbaycan-Qırğızıstan münasibətlərinin gələcək inkişafını yalnız mövcud əməkdaşlığın davam etdirilməsi kimi deyil, yeni sahələrə çıxış və yeni regional təşəbbüslərin formalaşdırılması kimi qiymətləndirmək lazımdır. Bu gün siyasi etimad möhkəm təmələ malikdir. Əsas məqsəd bu siyasi iradəni iqtisadi, humanitar, mədəni, nəqliyyat və texnoloji layihələrlə daha da zənginləşdirməkdir. Azərbaycan və Qırğızıstanın münasibətləri həm ikitərəfli müstəvidə, həm də Türk dünyasının ümumi inteqrasiya prosesləri baxımından mühüm perspektivlər vəd edir. Dövlət başçılarının nümayiş etdirdiyi siyasi iradə, xalqlarımız arasındakı tarixi-mədəni bağlılıq, qarşılıqlı etimad və həmrəylik bu əlaqələrin gələcəkdə daha yüksək səviyyəyə yüksələcəyinə əsas verir”, - deyə Mehriban Vəliyeva fikrini yekunlaşdırıb.
