Ukrayna Prezidenti Volodimir Zelenski bildirib ki, saat 10:00-a olan məlumata görə, Rusiya ordusu atəş açmaq, hücum cəhdləri, hava hücumları və dronlardan istifadə daxil olmaqla 1820 dəfə atəşkəsi pozub.
AZƏRTAC xəbər verir ki, Ukraynanın dövlət başçısı bunu “Telegram”da açıqlayıb.
“Bu günə qədər Rusiya tərəfinin atəşkəsi pozduğunu təsdiqlədik. Hərbçilərimizin və kəşfiyyatımızın axşam məlumatları əsasında növbəti addımlarımızı müəyyən edəcəyik”, - deyə Zelenski qeyd edib.
Prezident vurğulayıb ki, dünən Ukrayna şəhərlərinə və bölgələrinə - Dnepr, Zaporojye, Kramatorsk və digərlərinə qarşı kütləvi hücumlardan sonra Rusiya ordusu bu gün də aktiv döyüş əməliyyatlarını və terror hücumlarını davam etdirir. Rusiyanın seçimi atəşkəsdən açıq şəkildə imtina etmək və insanların həyatına təhlükə yaratmaqdır.
O əlavə edib: “Cəbhənin bütün əsas istiqamətlərində hücum əməliyyatları davam edir. Təkcə bu gün səhər saatlarından başlayaraq Rusiya ordusu artıq 30-a yaxın hücum həyata keçirib. Bu gecə və səhərə yaxın isə 70-dən çox bomba istifadə edilməklə 20-dən artıq hava hücumu qeydə alınıb”, - deyə Zelenski qeyd edib.
Ukrayna Prezidentinin sözlərinə görə, Rusiya davam edən müharibəyə son qoymalıdır.
“Rusların əksəriyyəti üçün internet kəsilsə və rabitə bağlansa belə, onların rəhbərliyinin bunkerlərindən çıxıb sülhü seçə biləcəyi tamamilə aydındır. Rusiya tərəfində bizim diplomatik təkliflərimiz var və lazım olan tək şey Moskvanın həqiqi sülhə doğru irəliləmək istəyidir”, - deyə Zelenski vurğulayıb.
jpg_1778067150.jpg)
