Zəfər zirvəsində zəfər seçkisi

Şuşa ilk parlament seçkilərinə hazırdır

Ölkəmiz mühüm siyasi hadisə ərəfəsindədir. Müstəqillik dövründə ölkəmizdə keçiriləcək sayca 7-ci parlament seçkilərinə 9 gün qalır. Bütün ölkə üzrə seçkilərə hazırlıqlar yekunlaşmaq üzrədir. 
Bu seçkilər həm də ərazi bütövlüyümüzün, suverenliyimizin tam təminatından sonra işğaldan azad edilmiş Qarabağ və Zəngəzurda təşkil edilən ilk parlament seçkiləridir. Yəni ilk dəfə olaraq parlament seçkilərinə suverenliyini tam bərpa etmiş ölkə kimi gedirik.
Ümumiyyətlə isə Qarabağ və Şərqi Zəngəzurda 34 daimi seçki məntəqəsi yaradılıb. Keçmiş məcburi köçkünlər 574 məntəqədə səs verə biləcəklər. Onların sayı isə 399 min 56 nəfərdir.
Əlbəttə ki, seçkilər hər bir xalqın ictimai-siyasi həyatında mühüm rol oynayır. Bu mənada həmin prosesə xüsusi önəm verilir. Sentyabrın 1-də ölkəmizin şanlı tarixində daha bir mühüm hadisə yaşanacaq. İşğaldan azad olunmuş ərazilərə köçürülən keçmiş məcburi köçkünlər bu tarixi hadisənin iştirakçısı olacaqlar. 
Vətən müharibəsində qazandığımız Zəfərin zirvəsi sayılan Şuşa şəhəri də seçkilərə hazırlaşır. Artıq böyük köç karvanının yeni ünvanları sırasında Şuşanın da olması onu deməyə əsas verir ki, mədəniyyət paytaxtımızın sakinləri doğma yurdda səs verəcəklər. 
Biz də Şuşaya səfərimiz çərçivəsində yolumuzu 124 saylı Şuşa-Ağdam-Xocavənd Seçki Dairəsinin buradakı məntəqə seçki komissiyasından salaraq səsverməyə hazırlıq prosesi ilə maraqlandıq. 
124 saylı Şuşa-Ağdam-Xocavənd Seçki Dairəsi  93 seçki məntəqəsini əhatə edir. Bu dairədən deputat seçilmək uğrunda 7 nəfər mübarizə aparacaq. Onların sırasında Yeni Azərbaycan Partiyası və Azad Vətən Partiyasının namizədləri, bitərəflər var. 
Şuşada isə iki - 46 və 47 saylı məntəqə seçki komissiyaları (MnSK)  fəaliyyət göstərir. 46 saylı MnSK şəhərin 1 nömrəli tam orta məktəbinin inzibati binasında yerləşir. MnSK-nın sədri Səbinə Gözəlova deyir ki, Şuşa sakinlərinin ilk parlament seçkilərində doğma şəhərlərində səs verə bilmələri, bütövlükdə isə seçkilərin Qarabağ və Şərqi Zəngəzurda təşkil olunması olduqca mühüm siyasi hadisədir. 46 saylı seçki məntəqəsində seçicilərə öz səsvermə hüquqlarından azad şəkildə istifadə etmələri üçün lazımi şərait yaradılıb. MnSK-nın əməkdaşları müxtəlif treninqlərdə iştirak ediblər. 
Səbinə Gözəlovanın sözlərinə görə, seçki məntəqəsi zəruri texniki vasitə və metodiki vəsaitlər ilə təmin olunub, seçici siyahıları və məlumat lövhələri asılıb. Seçicilərin öz mövqelərini sərbəst şəkildə bildirmələri üçün kabinələr yaradılıb. Seçki məntəqələrində katib və üzvlər, habelə seçkini izləyəcək müşahidəçilər üçün yerlər ayrılıb. 
Müasir infrastrukturla təchiz edilən 1 nömrəli tam orta məktəbin binası yanğın təhlükəsizliyindən mühafizə, fasiləsiz rabitə və elektrik enerjisi ilə təmin edilib. Yəni məntəqə seçkilərə tam hazır vəziyyətdədir.
47 saylı məntəqə seçki komissiyasının yerləşdiyi ünvana yollanırıq. Bu məntəqə Şuşadakı "Xarıbülbül" hostelinin birinci mərtəbəsində yerləşir. MnSK-nın sədri Eldar Salahovla söhbət əsnasında bəlli olur ki,  47 saylı məntəqə bundan öncə mövcud olmayıb. Parlament seçkilərinin keçirilməsi üçün yeni yaradılan 124 saylı Şuşa-Ağdam-Xocavənd Seçki Dairəsi formalaşdıqdan sonra seçki məntəqələrinin sayı artırılıb.
Bu məntəqədə ilk dəfə səsvermə prosesi keçiriləcək. Doğma yurdlarına qayıdan şuşalılar hüquqlarından istifadə edib öz namizədlərinə səs verəcəklər. Məntəqə seçki komissiyasının sədri deyir ki, seçkiyə hazırlıq prosesi yüksək səviyyədə həyata keçirilir. Sentyabrın 1-də bu məntəqədə yeni tarix yazılacaq: "Hazırlıq prosesi tam yekunlaşmaq üzrədir. Seçicilərin sərbəst şəkildə səs vermələri üçün kabinələr, müşahidəçilər üçün yerlər müəyyənləşdirilib. Doğma yurda qayıdan şuşalıların evlərindən çıxaraq rahat şəkildə məntəqəyə gəlmələri üçün də şərait yaradılır".
Eldar Salahov deyir ki, suverenliyimizin tam təmin edilməsi kimi tarixi şəraitdə ilk dəfə məhz parlament seçkilərində məntəqə seçki komissiyasının sədri kimi fəaliyyət göstərmək həm böyük məsuliyyət, həm də qürurverici hadisədir. Bu seçkilər məntəqə üzvlərinin həyatında silinməz iz qoyacaq. 
Aparılan hazırlıqlar, həyata keçirilən tədbirlər onu deməyə əsas verir ki, Zəfər zirvəmiz Şuşa parlament seçkilərinə tam hazırdır. Suverenliyimizin bərpasından sonra mədəniyyət paytaxtımızda ikinci dəfə seçki prosesi baş tutacaq. 30 illik həsrətdən sonra Şuşaya qayıdan yerli sakinlərin içərisində həm ikinci, həm də birinci dəfə seçki prosesində iştirak edənlər tarixə yazılacaqlar.  

Rəşad BAXŞƏLİYEV,
"Azərbaycan"
Bakı-Şuşa-Bakı