2025-ci ili "Konstitusiya və Suverenlik İli" kimi təntənə ilə qeyd edəcəyik
Azərbaycan xalqı tarixindəki ən qürurlu, şanlı günlərini yaşayır. Suverenliyimiz, ərazi bütövlüyümüz tam təmin edilib, Qarabağ və Şərqi Zəngəzur azadlığına qovuşub, yüz minlərlə vətəndaşımız məcburi köçkün adından qurtulub. İndi işğaldan azad edilmiş ərzilərimizdə nəhəng tikinti və quruculuq işləri aparılır, insanlarımız qayıdış köçləri ilə sevinclə öz yurdlarına dönürlər.
30 il ərzində talanan, yandırılan, canlı həyata dair hər nə varsa məhv edilən Qarabağ və Şərqi Zəngəzurdan indi yeni doğulan körpələrin səsinin gəlməsi kimi möcüzələrə şahidlik edirik.
İllərdir təqvimlərimizdə qara haşiyəyə alınmış faciəvi günlərimiz al-qırmızı bayram günlərinə çevrilib. Biz Şuşanın, Xankəndinin, Xocalının, Laçının... azadlıq günlərini coşqu ilə keçirməyə başlamışıq. Zəfər Günümüz, Suverenlik Günümüz təsis olunub...
Bir sözlə, son üç onillik ərzində addım-addım gəldiyimiz çətin və keşməkeşlərdən adlayan milli yolumuzu qətiyyətlə zirvələrə daşıyaraq üçrəngli, ay-ulduzlu bayrağımızı bütöv Azərbaycanda əbədi dalğalandırmışıq.
Bu ili isə Prezident İlham Əliyevin sərəncamı ilə başdan-başa "Konstitusiya və Suverenlik İli" kimi təntənə ilə qeyd edəcəyik.
Ulu Öndər müstəqil Azərbaycan Konstitusiyasının müəllifidir
Prezident İlham Əliyev Azərbaycanda 2025-ci ilin "Konstitusiya və Suverenlik İli" elan edilməsi ilə bağlı Tədbirlər Planının təsdiq edilməsi haqqında sərəncam imzalayıb.
Tədbirlər Planında 20 sentyabr-12 noyabr tarixləri ərzində Azərbaycan Dövlət Suverenliyi Gününün və Azərbaycan Konstitusiyasının qəbulunun 30 illiyinin geniş qeyd olunması, bununla əlaqədar yerli və beynəlxalq əhəmiyyətli tədbirlərin keçirilməsi əksini tapıb. İl ərzində "Ümummilli Lider Heydər Əliyev müstəqil Azərbaycan Konstitusiyasının müəllifidir" mövzusunda silsilə tədbirlərin, Milli Məclisin "Suverenlik və Konstitusiya İli"nə həsr olunmuş xüsusi iclasının keçirilməsi nəzərdə tutulub.
Həmçinin il ərzində "Konstitusiya və Suverenlik İli"nə həsr olunmuş forumların, konfransların, simpoziumların, "dəyirmi masa"ların, seminarların, müsabiqələrin, müxtəlif mədəni-kütləvi tədbirlərin təşkili, vətənpərvərlik mahnılarının (marşların) yazılması, beynəlxalq turizm sərgilərində Azərbaycan milli stendində "Konstitusiya və Suverenlik İli" haqqında məlumatların təqdim edilməsi, Azərbaycanın diplomatik nümayəndəlikləri tərəfindən "Suverenlik və Konstitusiya İli"nə həsr olunmuş, həmçinin Azərbaycan diaspor təşkilatları, koordinasiya şuraları, Azərbaycan evləri və həftəsonu məktəbləri tərəfindən "Suverenlik və Konstitusiya İli"nə həsr olunmuş tədbirlərin, Azərbaycanın şəhər və rayonlarında "Suverenlik və Konstitusiya İli"nə həsr olunmuş ağacəkmə aksiyalarının keçirilməsi nəzərdə tutulub.
Yubiley medalı təsis ediləcək
Tədbirlər Planında "Azərbaycan Respublikası Konstitusiyasının 30 illiyi" yubiley medalının təsis edilməsi, eyni zamanda sentyabr ayında "Konstitusiya və Suverenlik İli"nə həsr olunmuş poçt markalarının buraxılması da yer alıb.
Yerli və xarici mütəxəssislərin iştirakı ilə Azərbaycan dövlət suverenliyinin təmin olunmasına həsr edilmiş elmi-praktik konfransların təşkili, elmi-tədqiqat işlərinin aparılması, əsərlərin, hüquqi şərhlərin, monoqrafiyaların, məqalələrin nəşri, idman yarışlarının və beynəlxalq turnirlərin, "Zəfər yürüşü" tədbirlərinin təşkili, 20 sentyabr-12 noyabr tarixləri ərzində "Konstitusiya və Suverenlik İli" ilə bağlı ölkə ərazisində müvafiq poster və bannerlərin yerləşdirilməsi, rəqəmli bilbordlarda və monitorlarda videoçarxların nümayiş etdirilməsi, mediada sənədli filmlərin, verilişlərin, videoçarxların və digər materialların verilməsi, rəsmi qəzetlərin xüsusi buraxılışının hazırlanması, jurnalistlərin və bloqçuların işğaldan azad edilmiş ərazilərə səfərlərinin təşkili də Tədbirlər Planında əksini tapıb.
"Konstitusiya və Suverenlik İli" ilə əlaqədar Azərbaycanda adsız zirvələrə, Bakı şəhərində və digər böyük şəhərlərdə prospekt, küçə, meydan və müvafiq ərazi vahidlərinə, metro stansiyalarına yeni adların verilməsi, xeyriyyə aksiyalarının keçirilməsi, Azərbaycan dövlət suverenliyinin və ərazi bütövlüyünün bərpası uğrunda şəhid olmuş şəxslərin ailələrinin və müharibə veteranlarının sosial məsələlərinin həlli istiqamətində tədbirlərin davam etdirilməsi, yeniyetmələr və gənclər üçün olimpiadaların, müsabiqələrin, marafonların, debatların və təlimlərin keçirilməsi, "Zəfərin izi ilə" layihəsi çərçivəsində məktəblilərin, tələbələrin və könüllülərin işğaldan azad edilmiş ərazilərə səfərlərinin təşkili, təhsil müəssisələrində ilk dərs gününün "Konstitusiya və Suverenlik İli"nə həsr edilməsi, xüsusi dərslərin və mühazirələrin təşkili, "Konstitusiya və Suverenlik İli" ilə bağlı qrant müsabiqələrinin, "Konstitusiya və Suverenlik İli"nə həsr olunmuş hərbi təlimlərin keçirilməsi nəzərdə tutulub.
Ərazi bütövlüyümüzün təminatçısı
2025-ci ildə Konstitusiyamızın qəbul edilməsinin 30-cu və Vətən müharibəsində şanlı zəfərimizin 5-ci ildönümünü nəzərə alaraq bu ilin ölkəmizdə "Konstitusiya və Suverenlik İli" elan edilməsinin böyük rəmzi mənası var. Azərbaycanın milli birliyimizin, həmrəyliyimizin nəticəsi olan qələbələrə yetməsi, suverenliyini təmin etməsi, Konstitusiyasının bütün ərazilərində qüvvəyə minməsi tarixdə qazandığı ən parlaq zəfərdir.
Ötən prezidentlik dövrü ərzində Ulu Öndər Heydər Əliyev siyasi kursunu uğurla davam etdirən Prezident İlham Əliyev ərazi bütövlüyümüzün təminatçısı kimi Azərbaycan dövlətinin və xalqının pozulmuş konstitusion hüquqlarını tam bərpa edərək bizə bütöv Azərbaycan bəxş edib.
Necə ki bunu, hələ 2003-cü il oktyabrın 31-də andiçmə mərasimindəki nitqində Xilaskar Lider İlham Əliyev qətiyyətlə söyləmişdi: "Azərbaycanın torpaqları işğaldan azad olunmalıdır, bir milyondan artıq qaçqın və köçkün öz doğma yurdlarına qayıtmalıdır, ölkəmizin ərazi bütövlüyü bərpa edilməlidir".
Yasəmən MUSAYEVA,
"Azərbaycan"
