Azərbaycan Avtomobil Yolları Dövlət Agentliyinə ünvanladığınız "Azərbaycan" qəzetinin 7 sentyabr 2024-cü il sayında dərc edilmiş "Qaş düzəltdikləri yerdə göz çıxarıblar" sərlövhəli oxucu məktubunda qeyd olunan Salyan rayonunun Boranıkənd və Şorsulu kəndlərində yol-təmir işləri aparılan zaman həmin kəndlərdə gedən zədələnmiş su xətlərinin bərpası istiqamətində müvafiq tədbirlərin görülməsi barədə müraciətinizə aidiyyəti üzrə baxılmışdır.

Bildiririk ki, "Avtomobil yolları haqqında" Azərbaycan Respublikası Qanununun 15-1-ci maddəsinin 1 və 2-ci bəndlərinə əsasən, ümumi istifadədə olan avtomobil yollarının mühafizəsi, perspektiv inkişafı, təmiri, yenidən qurulması, saxlanılması üçün nəzərdə tutulmuş, habelə yolkənarı xidmət obyektlərinin yerləşdiyi ərazini əhatə edən qorunma (mühafizə) zolaqları müəyyən edilir.

Həmin maddənin 6-cı bəndinə əsasən, ümumi istifadədə olan avtomobil yollarının qorunma (mühafizə) zolaqlarında avtomobil yollarının tikintisi, saxlanılması, təmiri, yenidən qurulması və sərnişin və yükdaşımaları sahəsində nəzarəti həyata keçirən müvafiq icra hakimiyyəti orqanının fəaliyyəti ilə əlaqədar olan tikililər və qurğular, habelə yolkənarı xidmət obyektləri istisna edilməklə, digər tikililərin və qurğuların yerləşdirilməsi qadağandır. 

Azərbaycan Respublikası Nazirlər Kabinetinun "Dövlət mülkiyyətində olan avtomobil yollarının qorunma (mühafizə) zolaqlarının ölçüləri"nin təsdiq edilməsi haqqında 2015-ci il 11 sentyabr tarixli 298 nömrəli qərarının 1-ci bəndinə əsasən, respublika əhəmiyyətli avtomobil yollarında yolun hər bir hərəkət istiqaməti üzrə hərəkət hissəsinin mərkəzindən 30 metr, yerli əhəmiyyətli avtomobil yollarında yolun hər bir hərəkət istiqaməti üzrə hərəkət hissəsinin mərkəzindən 12,5 metr enində qorunma (mühafizə) zolaqları müəyyən edilmişdir.

"Avtomobil yolları haqqında" Azərbaycan Respublikası Qanununun 15-ci maddəsinin 5 və 6-cı bəndlərinə əsasən, kommunikasiyaların çəkilməsi və ya yenidən qurulması işlərinə başlamazdan əvvəl bu kommunikasiyaların mülkiyyətçiləri avtomobil yollarının saxlanılmasını həyata keçirən yol təsərrüfatı orqanları ilə müvafiq müqavilə bağlamalıdırlar. Avtomobil yollarında mühəndis kommunikasiyaların çəkilməsini həyata keçirən sifarişçilər avtomobil yolunun əvvəlki vəziyyətinə gətirilməsini təmin etməli və bu işlərlə bağlı bütün xərcləri ödəməlidirlər. 

Qeyd olunanları və sözügedən su xətlərinin "Avtomobil yolları haqqında" Azərbaycan Respublikası Qanununun 15-1-ci maddəsinin tələbləri pozulmaqla Azərbaycan Avtomobil Yolları Dövlət Agentliyinin balansında olan yerli əhəmiyyətli avtomobil yollarının təhkim və qorunma (mühafizə) zolağında qeyri-qanuni yerləşdirildiyini nəzərə alaraq, zədələnmiş su xətləri aidiyyəti qurumlar tərəfindən bərpa olunmalıdır.

Əvəz QOCAYEV,

Azərbaycan Avtomobil Yolları Dövlət Agentliyinin İdarə Heyəti sədrinin müavini