Dini Qurumlarla İş üzrə Dövlət Komitəsinin sədri Ramin Məmmədov Amerika Birləşmiş Ştatlarına səfəri çərçivəsində Yuta Senatının prezidenti Adam Stüart ilə görüşüb.
Qurumdan AZƏRTAC-a bildirilib ki, görüşdə Azərbaycan-ABŞ münasibətlərinin keyfiyyətcə yeni mərhələyə qədəm qoyduğu vurğulanıb. Bu il avqustun 8-də Vaşinqtonda ABŞ Prezidentinin şahidliyi ilə Azərbaycan və Ermənistan rəhbərləri tərəfindən imzalanmış Birgə Bəyannamənin sülh prosesində tarixi dönüş nöqtəsi olduğu, həmçinin dinlərarası harmoniya, tolerantlıq və birgəyaşayış ənənələrinin möhkəmlənməsinə mühüm töhfə verəcəyi qeyd edilib.
Ramin Məmmədov diqqətə çatdırıb ki, Azərbaycanda tolerantlıq mühitinin inkişafı dövlət siyasətinin prioritet istiqamətlərindən biridir. Bu siyasətin əsasını milli-mənəvi dəyərlərin qorunması, müxtəlif dinlərə mənsub insanların birgə, sülh şəraitində yaşamalarının təmin olunması təşkil edir.
Komitə sədri vurğulayıb ki, Prezident İlham Əliyevin rəhbərliyi ilə ölkəmizdə dini tolerantlıq, multikulturalizm və qarşılıqlı hörmət prinsiplərinə əsaslanan cəmiyyət modeli formalaşıb. Azərbaycanın bütün konfessiyaların, o cümlədən xristian dini icmalarının azad və təhlükəsiz fəaliyyət göstərməsi üçün hərtərəfli şərait yaratdığı diqqətə çatdırılıb. Bunun bariz nümunəsi kimi İsa Məsihin Sonuncu Gün Müqəddəsləri Kilsəsinin Azərbaycanda rəsmi qeydiyyatı göstərilib.
R.Məmmədov Azərbaycan-ABŞ əlaqələrinin inkişafına töhfə verəcək qarşılıqlı təmasların əhəmiyyətini qeyd edərək, Yuta Senatının prezidentini Azərbaycana səfərə dəvət edib.
Səfər dəvətini minnətdarlıqla qəbul edən Adam Stüart ölkəmizdəki multikultural dəyərləri və dinlərarası harmoniyanı yüksək qiymətləndirib. O, Prezident İlham Əliyevin tolerantlıq və dinlərarası həmrəylik mühitinin qorunmasına verdiyi mühüm töhfələri qeyd edərək, əməkdaşlığın genişləndirilməsinin vacibliyini vurğulayıb.
Görüşdə, həmçinin Azərbaycan ilə ABŞ arasında dinlər və mədəniyyətlərin dialoqu sahəsində əməkdaşlığın perspektivləri ətrafında fikir mübadiləsi aparılıb. Tədbirdə Yuta Ştatının senatorları Kirk Kollimor və Mayk Makkel də iştirak ediblər.
