"Sevincimdən bütün gecə yata bilməmişəm. Ağır döyüşlər keçirməyimə baxmayaraq, yorğunluq hiss etmirəm. Çempionluq mənə əlavə enerji verib. Hətta müəllimim Elnur Məmmədliyə deyirəm ki, yenə olsa, bir daha güləşərəm".

Bu sözləri XXXIII Yay Olimpiya Oyunlarında qızıl medal qazanan Azərbaycan cüdoçusu Hidayət Heydərov deyib. Olimpiya çempionu 73 kiloqram çəki dərəcəsində mübarizə aparan idmançılar arasındakı rəqabətdən bəhs edib: "Hər idmançı Olimpiada kimi vacib turnirə ciddi hazırlaşır. Amma 73 kiloqramda çıxış edən bütün cüdoçular mənə fokuslanmışdı. Çünki mən bu çəkidə dünya reytinqinin ilk pilləsindəyəm. Bununla yanaşı, may ayında dünya çempionu tituluna da yiyələndiyim üçün rəqiblərim mənə böyük təhlükə kimi baxırdılar. Hər biri mənimlə döyüşə olduqca ciddi hazırlaşırdı. Elə rəqiblərim var idi ki, digər turnirlərdə dəfələrlə məğlub etdiyim halda, Olimpiadada onlarla yarışmaq çətin oldu. Özümə çox inanırdım. Amma bilirdim ki, heç vaxt arxayınlaşmaq olmaz. Çünki mənim yarışımdan bir gün öncə 52 kiloqramda lider olan cüdoçu uduzdu".

Ona görə də cüdoçumuz daha diqqətli olmaq üçün özünü toparladığını və çox riskə getmək fikrindən daşındığını bildirib. O, həm də şanslı olduğunu söyləyib: "Şanslıyam ki, yanımda Elnur Məmmədli kimi təcrübəli Olimpiya çempionu var. Düşünürəm ki, illər öncə o da özü kimi birindən dəstək alsaydı, yenidən çempion ola bilərdi. Mən, demək olar ki, hər şeyə hazır idim, potensialım da yüksək idi. Amma Elnur Məmmədli mənim bu sahədə ən yaxşı olmağıma səbəb oldu".