Yazıçısı, ssenarist, dramaturq Marat Haqverdiyevin doğum günüdür

Bu gün yazıçısı, ssenarist, dramaturq, Əməkdar mədəniyyət işçisi Marat Haqverdiyevin doğum günüdür. O, 1938-ci il iyulun 21-də Bakıda dünyaya göz açıb. Atası Xanlar Haqverdiyev Azərbaycan və Türkmənistanın Əməkdar artisti, anası Cahan Əfruz (Dilanova) şairə-dramaturq idi. Marat uşaqlıq illərindən rəssamlığa böyük maraq göstərib. Ancaq orta məktəbi bitirəndə memar olmaq qərarını verib. 1956-cı ildə Azərbaycan Politexnik İnstitutunun (indiki Azərbaycan Texniki Universiteti) memarlıq fakültəsinə daxil olub. Tələbəlik illərində təhsil aldığı institutun xalq çalğı alətləri ansamblı və estrada orkestrinin solisti kimi o vaxt sovet ittifaqının tərkibində olan respublikalarda qastrol səfərlərində iştirak edib. 
İnstitutu bitirdikdən sonra qısa müddət tikinti sahəsində fəaliyyət göstərib. Uzun illər Mədəniyyət Nazirliyinin nəzdində Tarix və Mədəniyyət Abidələrinin Bərpası İdarəsində müxtəlif vəzifələrdə çalışıb. O, Azərbaycanın tarix və mədəniyyət abidələrinin, həmçinin Azərbaycan Dövlət Akademik Opera və Balet Teatrı, Rəşid Behbudov adına Mahnı Teatrı, muzeylər, məscidlər, mədrəsələr, qala və türbələrin bərpası ilə məşğul olub.
Ədəbiyyata 1970-ci illərdə tərcüməçi kimi gəlib. Anasının vəfatından sonra onun yolunu davam etdirib. "Ailədə məhkəmə" adlı ilk dram əsəri Lənkəran Dövlət Dram Teatrında tamaşaya qoyulub. Bir il sonra Azərbaycan Dövlət Gənc Tamaşaçılar Teatrında "Məhəbbət, şeytan və lambada", sonra "Məşuqələr" pyesi səhnələşdirilib. "Ah, qadınlar, qadınlar" komediyası isə Azərbaycan Dövlət Akademik Milli Dram Teatrında tamaşaçılara təqdim edilib.
Sonralar müxtəlif teatrların səhnəsində Marat Haqverdiyevin "Fədakarlıq", "Sənsiz yaşaya bilmərəm", "Məhəbbət əzabları", "Məhəbbət yaşa baxmır" və digər pyesləri uğurla tamaşaya qoyulub.
Müəllifin "Qısqanc ürəklər" və "Ah, qadınlar, qadınlar" əsərləri Türkiyənin bir çox teatrlarında - İstanbulun Çemberlitaş teatrı, Sarıyer bələdiyyə teatrı, Fatih Universitetinin teatrında səhnəyə qoyulub 
O, həm də maraqlı ssenarilərin müəllifidir. Rejissor Lütfü Məmmədbəyov yazıçının ssenarisi əsasında "Səninlə və sənsiz" bədii televiziya filmini çəkib. "Səni gözləyirəm" lirik əsərini də Lütfü Məmmədbəyov ekranlaşdırıb. Marat Haqverdiyevin böyük siyasətçi Heydər Əliyevdən bəhs edən "Qarabağ şikəstəsi" ssenarisi əsasında Mərahim Fərzəlibəyov ikiseriyalı bədii televiziya filmi çəkib.  Heydər Əliyevə həsr etdiyi ikinci əsərinin - "Fədakarlıq" əsərinin ssenarisi əsasında eyni adlı bədii televiziya filmi çəkilib. Müəllif həmin ssenarinin dram variantını yazıb. Əsər Sumqayıt Dövlət Dram Teatrında tamaşaya qoyulub. Premyerası Akademik Milli Dram Teatrında uğurla nümayiş edilib. Marat Haqverdiyev yaradıcılığının son zirvəsi adlandırdığı, Ümummilli Lider Heydər Əliyevin 90 illik yubileyinə həsr edilmiş "Üç dəniz əfsanəsi" əsərində Bakı-Tbilisi-Ceyhan neft kəmərinin tikintisindən bəhs olunub. 

Zöhrə FƏRƏCOVA,
“Azərbaycan”