Yaponiyanın kitab sənayesi yanacaq qiymətlərinin artması və logistika xərclərinin pik həddə çatması səbəbindən dərin böhranla üz-üzə qalıb. “The Mainichi” nəşrinin məlumatına görə, ölkədə fəaliyyət göstərən kitab mağazalarının sayı tarixdə ilk dəfə 10 minlik həddən aşağı enib. Açıqlanan son statistikaya əsasən, ötən bir il ərzində Yaponiyada 539 kitab mağazası bağlanıb. Böhran ölkənin ən böyük nəşriyyat evlərindən də yan keçməyib. “Tohan” nəşriyyatı 2025-ci ilin yekunlarına görə 4 milyard yen (təxminən 25 milyon dollar), digər nəhəng bazar iştirakçısı “Nippan” isə 3,6 milyard yen (22 milyon dollar) təmiz zərər açıqlayıb. Şirkətlər bu itkiləri yanacaq, işçi qüvvəsi və kağız xərclərinin kəskin bahalaşması ilə əlaqələndirirlər.
Yaxın gələcəkdə vəziyyətin daha da ağırlaşacağı gözlənilir. Yük maşını sürücülərinin sosial və iqtisadi vəziyyətini yaxşılaşdırmaq məqsədilə qəbul edilən yeni qanun hökumətin müəyyənləşdirdiyi minimum tariflərdən aşağı müqavilələrin bağlanmasını qadağan edir. Yaponiya Çap Məhsullarının Topdansatışçıları
Assosiasiyasının qiymətləndirməsinə görə, bu addım kitabların çatdırılma xərclərini iki dəfəyə qədər artıra bilər.
“Nippan Group Holdings”in prezidenti Takeru Togaşi mövcud riski belə qiymətləndirib: “Böyük bir böhran hissi keçiririk və artıq distribusiya biznesindən tamamilə çıxmaq ehtimalını nəzərdən keçirməli olduğumuz həddə yaxınlaşırıq”.
Qeyd edək ki, Yaponiyada kitabların satış qiyməti Avropa və ABŞ ilə müqayisədə iki dəfə ucuzdur.
Mütəxəssislər xəbərdarlıq edirlər ki, topdansatışçılar kitab tədarükünü dayandırarsa, dükan rəflərində yalnız məşhur yeniliklər və bestsellerlər qalacaq, alıcılar isə xüsusi və sahəvi ədəbiyyatları sifariş etmək imkanından məhrum olacaqlar.
Yasəmən MUSAYEVA,
“Azərbaycan”
