Xorvatiyanın Zaqreb Universitetində professor-müəllim və tələbə heyətinin iştirakı ilə 20 Yanvar faciəsi ilə əlaqədar anım tədbiri keçirilib.
AZƏRTAC xəbər verir ki, tədbirdə çıxış edən Azərbaycanın Xorvatiyadakı səfiri Anar İmanov 20 Yanvar tarixinin Azərbaycan xalqının yaddaşında yalnız qanlı bir faciə kimi deyil, eyni zamanda milli iradənin, azadlıq və istiqlal əzminin sarsılmazlığının bütün dünyaya nümayiş etdirən bir tarix kimi həkk olduğunu vurğulayıb. Səfir qeyd edib ki, dinc əhaliyə qarşı törədilmiş bu qanlı hadisə Azərbaycan xalqının azadlıq, müstəqillik və suverenlik arzularını boğmaq məqsədi daşısa da, faciə xalqımızın mübarizə əzmini sarsıtmamış, əksinə, milli birliyi və dövlətçilik ideyalarını daha da möhkəmləndirib.
Diplomat 20 Yanvar şəhidlərinin fədakarlığının, onların misilsiz şücaət və qəhrəmanlığının Azərbaycan xalqının azadlığa və müstəqilliyə gedən yolunu açdığını, Azərbaycanın dövlət müstəqilliyinin yenidən bərpası üçün möhkəm təməl yaratdığını diqqətə çatdırıb. O bildirib ki, şəhidlərin Vətən uğrunda tökdükləri qan hədər getməyib, Azərbaycan xalqı öz tarixi haqqına qovuşaraq müstəqil dövlətini yenidən bərpa edib.
20 Yanvar faciəsinin Azərbaycan tarixində həm hüzn, həm də qürur səhifəsi kimi qalmaqda davam etdiyini deyən səfir, bunun xalqımızın azadlıq iradəsinin sarsılmazlığını və müstəqil dövlət qurmaq əzmini bütün dünyaya nümayiş etdirdiyini vurğulayıb. Anar İmanov, həmçinin müstəqilliyimizin bərpasından və Ulu Öndər Heydər Əliyevin hakimiyyətə qayıdışından sonra Azərbaycan xalqına qarşı törədilmiş bir sıra cinayətlərə, o cümlədən 20 Yanvar faciəsinə siyasi-hüquqi qiymət verildiyini tədbir iştirakçılarının diqqətinə çatdırıb.
Tədbirdə, eyni zamanda, Azərbaycanın müstəqilliyinin, suverenliyinin və ərazi bütövlüyünün bundan sonra da qətiyyətlə qorunacağı və möhkəmləndiriləcəyi vurğulanıb. Azərbaycan xalqına və dövlətinə qarşı müxtəlif dövrlərdə ağır cinayətlər törətmiş şəxslərin beynəlxalq hüquq normaları çərçivəsində məsuliyyətə cəlb olunacağına və layiqli cəzalarını alacaqlarına əminlik ifadə edilib.
