Xalq seçimində yanılmır

47 saylı Sumqayıt-Abşeron-Qaradağ Seçki Dairəsinin 26 saylı məntəqəsi Ceyranbatan qəsəbəsində yerləşən 1saylı tam orta məktəbdə təşkil edilib. 
Məntəqənin sədri Şahsuvar Mirzəyev  bildirdi ki, 1351 seçicinin qeydə alındığı məntəqədə seçki başlayandan qələbəlik olub. İstər gənclər olsun, istərsə də yaşlılar, hamı fəal idi. Səhər seçkiyə start veriləndən seçicilər məntəqəyə gəlir və  demokratik qaydada istədikləri namizədə səs verirlər. 
50 saylı Abşeron üçüncü Seçki Darəsinin 10 saylı seçki məntəqəsi isə Saray qəsəbəsindəki 2 saylı tam orta məktəbdə təşkil olunmuşdur. Məntəqənin sədri Nəzakət Məmmədovanın sözlərinə görə, 1140 seçicinin 20 nəfəri ilk dəfə səs verənlər olub. Nicat İsmayılov bizimlə söhbətində bildirdi ki, şəxsiyyət vəsiqəsini alanda çox sevinib: "Bu seçkidə də həmin hissləri yaşadım. Mənim səsim mənim gələcəyimdir.  Ona görə də gələcəyimi etibarlı əllərə etibar etdim". 
****
55 saylı Siyəzən-Quba-Xızı Seçki Dairəsinin 1 saylı seçki məntəqəsi Siyəzən şəhəri C.Cabbarlı adına 1 saylı tam orta məktəbdə təşkil edilmişdir. Məntəqə sədri Elxan Cabbarov bildirdi ki, 921 seçicinin səs verməsi üçün seçki qanunlarına uyğun bütün şərait yaradılıb. 
Məntəqədə səhər birinci səs verən gənc Nübar Əliyeva özü ilk dəfə idi ki, səs verirdi. Bildirdi ki, o da digər gənclər kimi səsini Zəfərin davamına verib. 
Məntəqədə seçkinin gedişatını 11 müşahidəçi izləyirdi və onlar heç bir qanun pozuntusuna yol verilmədiyini söylədilər.
 55 saylı Siyəzən-Quba-Xızı Seçki Dairəsinin10 saylı məntəqəsində də qələbəlik yaşanırdı. Məntəqənin sədri Seymur Ağayev bildirdi ki, 951 seçicinin səs verəcəyi məntəqədə normal seçki şəraiti var. Məntəqə üzrə 19 nəfər yaşlı nəslin nümayəndəsi səs verib. 2 nəfər xəstə olduğu üçün daşınan qutu ilə təmin edilib. 12 müşahidəçinin izlədiyi seçkidə heç bir qayda pozuntusu halı müşahidə olunmayıb. 
****
1993-cü ilin oktyabrından məcburi köçkün həyatı yaşayan zəngilanlılar respublikamızın 46 rayon və şəhərində yaşayırlar. 125 saylı Zəngilan-Qubadlı seçki dairəsinin bir neçə məntəqəsi  Sumqayıt şəhərində yerləşir. 
Dairənin 19 saylı seçki məntəqəsi  Sumqayıtın 3-cü mikrorayon ərazisində yerləşən  23 saylı Zəngilan tam orta məktəbin binasında təşkil olunmuşdur. 1334 seçicinin qeydə alındığı məntəqədə seçkinin gedişini 14 nəfər müşahidəçi izləmişdir. Onlar məntəqədə qanun pozuntusuna yol verilmədiyini bildirmişlər. Məntəqənin sədri Ramiz Qulamov dedi ki, seçicilərin səs verməsində seçki qanunvericiliyinin tələbləri əsas götürülüb. 
Dairənin 18 saylı məntəqəsi Sumqayıtın İnşaatçılar qəsəbəsində yerləşən 18 saylı tam orta məktəbin  binasında təşkil olunmuşdur. Məntəqənin sədri Camal Zeynalov  bizimlə sohbətində bildirdi ki, məntəqədə 1435 seçicinin səsverməsi üçün təlimata uyğun iş aparılıb. Hər bir namizədin müşahidəçiləri sərbəst şəkildə seçkinin gedişini izləyiblər. 
Məntəqədə ilk dəfə səsverənlər 54 nəfər olub. Gənclər seçkidə yaxından iştirak ediblər. Onlardan biri - Aişə Yaqublu söylədi ki, artıq torpaqlarımız  tam şəkildə işğaldan azaddır: "Azərbaycanın müstəqillik tarixinin bu seçkisində bir gənc olaraq iştirakım mənə qürur verir. Mənə qürur verən həm də odur ki, artıq həmyerlilərim arasında doğma Zəngilanda səs verənlər də var". 
Məntəqədə səs verən ən yaşlı seçici 93 yaşlı Vəzifə Kəntər qızı Cabbarova olub. Səhhətində müəyyən problemlər olduğu üçün o, evində səs verib. Vəzifə nənə həm də təkcə səs verməyib, həm də yeni seçilən prezidentə xeyir-dua verib.

Akif ƏLİYEV,
"Azərbaycan"