BMT-nin Ümumdünya Şəhərsalma Forumunun 13-cü Sessiyası (WUF13) dünyanın müxtəlif ölkələrindən olan dövlət nümayəndələrini, şəhərsalma üzrə mütəxəssisləri, beynəlxalq təşkilatların təmsilçilərini və qonaqları bir araya gətirərək Azərbaycan paytaxtını yenidən mühüm qlobal dialoq məkanına çevirib. "Hər kəs üçün yaşayış yerləri: təhlükəsiz və dayanıqlı şəhərlər və yaşayış məskənləri" mövzusu altında keçirilən forum şəhərlərin gələcəyi, urbanizasiya prosesləri, ekoloji dayanıqlılıq və müasir yaşayış mühitinin formalaşdırılması ilə bağlı strateji məsələlərin müzakirəsinə geniş imkan yaradıb.
WUF13 yalnız mühüm beynəlxalq platforma deyil, eyni zamanda Azərbaycanın təşkilatçılıq imkanlarının növbəti uğurlu təqdimatıdır. Təsadüfi deyil ki, forum iştirakçılarının xüsusi vurğuladığı məqamlardan biri tədbirin yüksək səviyyədə təşkili, koordinasiya işlərinin peşəkar şəkildə qurulması və qonaqlara göstərilən diqqətdir. Bu uğurda WUF13 könüllülərinin də rolu təqdirəlayiqdir.
WUF13 Könüllülük Proqramı gənclərin liderlik bacarıqlarını inkişaf etdirməyə, innovativ düşüncələrini təşviq etməyə və beynəlxalq təcrübə qazanmaq imkanları yaratmağa xidmət edən platforma kimi əhəmiyyətlidir. Söz düşmüşkən onu da vurğulayaq ki, könüllülər bu möhtəbər tədbirə ötən il foruma hazırlıq prosesində, WUF13 Könüllülük Proqramı çərçivəsində seçiliblər. WUF13 Könüllülük Proqramına marağın böyük olması gənclərin beynəlxalq tədbirlərdə iştirak etməyə yüksək həvəs göstərdiyini bir daha təsdiqləyib. Proqram üzrə qeydiyyat mərhələsinə ümumilikdə 16 min namizəd müraciət edib. Seçim mərhələsində namizədlərin bilik və bacarıqları, ünsiyyət qabiliyyəti, komanda ilə işləmək vərdişləri və motivasiyaları qiymətləndirilib.
Müsahibələri uğurla başa vuran namizədlər üçün bu ilin yanvar-aprel aylarında geniş təlim proqramları təşkil olunub. Bu proqramlar ümumi məlumatlandırma, funksional vəzifələrin bölgüsü və forum məkanlarına hazırlıq mərhələlərini əhatə edib. Mayın 10-11-də isə 2100-dən çox könüllünün iştirak etdiyi təlimlərə yekun vurulub. Gənc könüllülər təlimlər zamanı tədbir məkanı, əməliyyat prosesləri, təhlükəsizlik prosedurları, departamentlər üzrə fəaliyyət istiqamətləri, həmçinin forumun keçirildiyi günlərdə tətbiq olunan əsas qayda və təlimatlarla tanış olublar.
Bu günlər forum məkanında, qeydiyyat zonalarında, sərgi pavilyonlarında, metro stansiyalarında və şəhərin müxtəlif ərazilərində fəaliyyət göstərən yüzlərlə gənc könüllü ilə rastlaşmaq olar. Könüllülər qonaqların qarşılanması, qeydiyyat prosesinin təşkili, istiqamətləndirmə, məlumatlandırma kimi mühüm vəzifələri yerinə yetirirlər. Onların tədbirin rahat və operativ fəaliyyəti sayəsində forum iştirakçıları özlərini rahat hiss edir, tədbirin proqramında nəzərdə tutulan sessiya və görüşlərə maneəsiz və vaxtında qoşula bilirlər.
Onlar ünsiyyət zamanı nümayiş etdirdikləri nəzakət, peşəkarlıq, gülərüz münasibət, məsuliyyətli yanaşma və yüksək kommunikasiya bacarıqları ilə diqqət çəkirlər. Bu baxımdan WUF13 könüllüləri təkcə təşkilati prosesin iştirakçısı deyil, həm də Azərbaycanın qonaqpərvərlik ənənələrinin təmsilçiləridir. Müxtəlif dillərdə ünsiyyət quran, yaranan suallara çevik cavab verən könüllülər ölkəmizin müasir, açıq və fəal gəncliyini layiqli şəkildə təqdim edirlər.
WUF13 könüllüləri bu gün yalnız beynəlxalq tədbirin təşkilati işlərinə dəstək göstərmirlər. Onlar həm də Azərbaycanın müasir simasını, yüksək təşkilatçılıq mədəniyyətini və gənclərin potensialını nümayiş etdirirlər. Gənc könüllülərin məsuliyyətli fəaliyyəti forumun uğurla keçirilməsinə mühüm töhfə verməklə yanaşı, ölkəmizin qlobal tədbirlərə evsahibliyi etmək bacarığını bir daha nümayiş etdirir. Bu isə göstərir ki, Azərbaycan gəncliyi beynəlxalq platformalarda üzərinə düşən missiyanı layiqincə yerinə yetirməyə hər zaman hazırdır.
Zöhrə FƏRƏCOVA,
"Azərbaycan"
jpeg_1779405928.jpeg)
