Dmitri Kiselyovun “Vesti nedeli” müəllif proqramında Moskvada Heydər Əliyevin abidəsinin təməlqoyma mərasiminə həsr olunmuş süjet yayımlanıb.
AZƏRTAC xəbər verir ki, reportajda qeyd edildiyinə görə, Azərbaycanın Ümummilli Lideri, iki dəfə Sosialist Əməyi Qəhrəmanı, görkəmli dövlət və siyasi xadimin abidəsinin ucaldılması təşəbbüsü ilə Baykal-Amur magistral yolunun inşaatçıları çıxış ediblər. Məhz Nazirlər Soveti Sədrinin birinci müavini olan Heydər Əliyev bu strateji obyektin tikintisi və inkişafı Komissiyasına rəhbərlik edib.
Süjetə Heydər Əliyevin BAM-ın qərb hissəsində yerləşən tayqa kəndlərindən birinə səfərini əks etdirən unikal arxiv kadrları daxil edilib. “Heydər Əlirza oğlu Əliyev bu pillələrdən enərək 1975-ci ildə BAM-ın tikintisinə göndərdiyi gənclərlə görüşdü”, -deyə proqramda qeyd olunur.
Heydər Əliyev BAM-a şəxsən səfər edən ilk sovet rəhbəri olub. Proqramda onun layihənin həyata keçirilməsinə mühüm töhfəsindən bəhs edilir: “Onun rəhbərliyi altında əbədi donmuş şəraitdə olan ərazi də daxil olmaqla 4300 kilometr yol çəkilib”.
Süjetdə Ulu Öndərin 1993-cü ildə Azərbaycanda hakimiyyətə qayıdışına, həmin çətin dövrdə ölkənin idarəçiliyini öz üzərinə götürməsinə xüsusi diqqət yetirilir: “Heydər Əliyev Moskvadan vətəninə qayıtdı, Ermənistanla hərbi əməliyyatları dayandırdı, iqtisadi islahatlar apardı, ən əsası, Azərbaycan ilə uzun illər yaşayıb-yaratdığı, bənzərsiz sevgi hissləri bəslədiyi və başa düşdüyü Rusiya arasında strateji tərəfdaşlığın əsasını qoydu”.
Bundan əlavə, proqramda Ulu Öndərin Azərbaycan-Rusiya münasibətlərinin möhkəmləndirilməsində əsas rolu vurğulanır: “Bu abidə təkcə Heydər Əliyevin xatirəsinə ehtiram əlaməti deyil, həm də Azərbaycan-Rusiya dostluğunun rəmzidir”.
Heydər Əliyevin çeçen xalqına səmimi münasibəti də qeyd olunur. 2017-ci ildə Qroznıda Azərbaycan liderinin abidəsi ucaldılıb və onun sitatları Ahmat Kadırovun kəlamlarının yanında əbədiləşdirilib.
