Birləşmiş Millətlər Təşkilatının (BMT) Uşaq Fondu (UNICEF) bildirib ki, dünya üzrə uşaqların demək olar ki, yarısı ən azı üç iqlim təhlükəsinin eyni vaxtda təsiri altındadır.
AZƏRTAC xəbər verir ki, UNICEF-in Su, Sanitariya, İqlim və Ətraf Mühit Məlumatları Bölməsinin rəhbəri Tom Slaymaker BMT-nin Cenevrə Ofisində keçirilən həftəlik mətbuat konfransında UNICEF-in “Uşaqların İqlim Riski Hesabatı 2026”nı təqdim edib.
Hesabatda vurğulanıb ki, quraqlıq, həddindən artıq yüksək temperatur və isti hava dalğaları qlobal miqyasda milyonlarla uşağı risk altında qoyan ən geniş yayılmış üç iqlim təhlükəsidir. Bundan əlavə, sahil və çay daşqınları, yanğınlar, qum və toz fırtınaları, eləcə də tropik fırtınalar da uşaqların üzləşdiyi iqlim təhdidləri sırasındadır.
Qeyd olunub ki, dünya üzrə uşaqların demək olar ki, yarısının, yəni təxminən 1,1 milyardının eyni vaxtda ən azı üç iqlim təhlükəsinin təsirinə məruz qalması onların sağlamlığını, təhsilini və həyatda qalmasını təhdid edir.
Həmçinin sənəddə dünyadakı demək olar ki, hər bir uşağın ən azı bir iqlim təhlükəsi ilə qarşılaşdığı, 4 milyondan çox uşağın isə eyni vaxtda altı iqlim təhdidi ilə üzləşə biləcəyi vurğulanıb.
Hesabata görə, quraqlıq, həddindən yüksək temperatur və isti hava dalğaları iqlim təhlükələrinin ən geniş yayılmış kombinasiyasıdır. Dünyada 296 milyondan çox uşaq bu üç təhlükənin eyni vaxtda mövcud olduğu bölgələrdə yaşayır.
Eləcə də bildirilib ki, ikinci ən geniş yayılmış kombinasiya olan quraqlıq, həddindən yüksək temperatur və tropik fırtınalar dünya üzrə 115 milyondan çox uşağı bu risklərlə üz-üzə qoyur.
Afrikanın ən çox təsirlənən bölgələrindən biri olan Saheldə isə 4 milyondan çox uşaq isti hava dalğaları, həddindən artıq yüksək temperatur, qum və toz fırtınaları təhlükəsi ilə qarşı-qarşıyadır.
Hesabatda, həmçinin qeyd edilib ki, yüksəkgəlirli ölkələr də iqlim şoklarından sığortalanmayıb. Məsələn, İtaliyada 6 milyondan çox uşaq uzunmüddətli istilik dalğalarının və quraqlığın təsirinə məruz qalır.
Digər tərəfdən, hesabatda istixana qazı emissiyalarının azaldılması istiqamətində təcili tədbirlər görülməsə, iqlim təhlükələrinin daha tez-tez və daha şiddətli baş verəcəyi, hökumətlərin büdcə və sistemlərinə əlavə yük yaradacağı, həmçinin uşaqların rifahını ciddi şəkildə təhdid edəcəyi barədə xəbərdarlıq edilib.
jpg_1781876907.jpg)
