2025-ci ilin 8 avqust tarixi təkcə Azərbaycan və Ermənistan üçün deyil, həm də uzun müddət ərzində ilk dəfə olaraq Cənubi Qafqazda sülh və sabitliyə real diplomatik töhfə verən Qərb dövlətləri üçün xüsusi əhəmiyyət kəsb edir.
Bu fikri AZƏRTAC-a müsahibəsində istefada olan türkiyəli general Yücel Karauz Prezident İlham Əliyevin, Ermənistanın baş naziri Nikol Paşinyanın və ABŞ Prezidenti Donald Trampın iştirakı ilə Ağ evdə gözlənilən görüşü şərh edərkən deyib.
Onun sözlərinə görə, avqustun 8-də Vaşinqton görüşünə aparan yol dövlətin və xalqın hüquq və mənafelərini ədalətli müdafiə edən Azərbaycan rəhbərliyinin qətiyyəti və dönməzliyi sayəsində açılıb. “Prezident İlham Əliyevin düşünülmüş strategiyası, “Dəmir yumruq” amili, yumşaq güc və mediadan səmərəli istifadə öz nəticəsini verib”, - deyən istefada olan general rəsmi Bakının ildən-ilə sistemli şəkildə region həqiqətlərini dünya ictimaiyyətinə çatdırdığını qeyd edib.
Ekspert diqqəti Azərbaycanın uzun illər davam edən işğala və ədalətsizliyə son qoyan 44 günlük Vətən müharibəsində qazandığı tarixi Qələbəyə yönəldib. “Vaşinqtondakı görüş, nəhayət, Prezident İlham Əliyevin danışıqlar masası arxasında diplomatiyasının uğurunu qeyd edəcək”, -deyə o əminliklə bildirib.
Y.Karauzun sözlərinə görə, Azərbaycan Prezidenti İlham Əliyev dünyaya bir daha göstərib ki, o, hansı addımları, nə vaxt və necə atacağını dəqiq bilir. “İlham Əliyevin formulu müasir Azərbaycanın nailiyyətlərinin rəhnidir”, - deyən istefada olan general Vaşinqtonda keçirilən görüşün Azərbaycanın bütün siyasi tarixi üçün taleyüklü əhəmiyyət daşıdığını qeyd edib.
Ekspert deyib: “Müasir Azərbaycan dinamik inkişaf edən, tanınmış regional güc amilinə çevrilən dövlətdir. Əminəm ki, Vaşinqtondakı danışıqlar rəsmi Bakı üçün yeni uğurun, respublikanın böyük qlobal təşəbbüslərdə iştirakının başlanğıcı olacaq”.
Eyni zamanda, o, Cənubi Qafqazda uzunmüddətli sülh və sabitlikdə maraqlı olmayan qüvvələrin mövcudluğuna işarə edib. “Bölgədə nüfuzunu saxlamağa çalışan, o cümlədən ATƏT-in Minsk qrupunu dirçəltməklə regionda dialoqa xələl gətirməyə cəhd edən dairələr ola bilər. Bu baxımdan biz ayıq-sayıqlığı itirməməli və risklərə, eləcə də status-kvonu dəyişmək cəhdlərinə hazır olmalıyıq”, -deyə Y.Karauz bildirib.
Ehtiyatda olan general əmin olduğunu bildirib ki, sülh sazişi və münasibətlərin normallaşması regionun bütün ölkələrinin xeyrinə olacaq.
Y.Karauz öz səyləri ilə cəmiyyətin konsolidasiyasına, Azərbaycanın tarixi torpaqlarının işğaldan azad edilməsinə və respublikanın beynəlxalq nüfuzunun artmasına misilsiz töhfə verən Prezident İlham Əliyevi “əsl siyasi və hərbi lider” və “regionda sülhün memarı” adlandırıb.
Ekspert Azərbaycanın Qələbəsini ədalətsizliklə üzləşmiş bütün xalqlar üçün ümid mənbəyi adlandırıb. O qeyd edib ki, Azərbaycan liderinin Ermənistanın baş naziri ilə Ağ evdə görüşü Türkiyə və digər türk dövlətləri üçün də mühüm əhəmiyyət kəsb edir və bu, Türk Dövlətləri Təşkilatında qarşılıqlı fəaliyyətin yeni mərhələsinin başlanğıcını qoyacaq.
