Enerji məsələsi bu gün dünya gündəmindəki ən vacib mövzulardan biridir və bunun beynəlxalq hüquq və mexanizmlərlə tənzimlənməsi mühüm əhəmiyyət kəsb edir.
Bunu AZƏRTAC-a açıqlamasında türk politoloq Hüsamettin İnanç bildirib.
O qeyd edib ki, XIX əsrdən etibarən sənayeləşmə prosesinin gətirdiyi karbon emissiyaları dünyanın ekoloji tarazlığını ciddi şəkildə pozub və bu gün havanın çirklənməsi, iqlim dəyişiklikləri bütün insanlıq üçün təhlükə təşkil edir. Xüsusilə Qərb ölkələrinin və ABŞ-ın bu prosesdə böyük rolu var.
Politoloqun sözlərinə görə, bu gün həm Azərbaycan, həm də Türkiyə iqlim dəyişikliyi və bərpaolunan enerji sahəsində qabaqcıl rol oynayır. Bu ölkələr Günəş və külək enerjisi baxımından zəngin resurslara malikdir və həmin potensialı səmərəli şəkildə istifadə edərək, konvensional sənaye istehsalını bərpaolunan enerji mənbələrinə çevirməkdədirlər. Bu, yalnız enerji sektorunda deyil, həm də iqtisadi və geosiyasi mövqelərin gücləndirilməsi baxımından strateji əhəmiyyət daşıyır.
O, həmçinin qeyd edib ki, Azərbaycanın və Türkiyənin coğrafi mövqeyi enerji, nəqliyyat dəhlizləri baxımından əvəzolunmazdır. “Azərbaycan Xəzər regionundan Avrasiyaya, Türkiyə isə Qafqazdan Orta Asiyaya, Balkanlara və Avropaya uzanan strateji əhəmiyyətli tranzit xətlərinə nəzarət edir. Bu dəhlizlər həm enerji təhlükəsizliyini təmin edir, həm də regional sabitliyin qorunmasına töhfə verir. Azərbaycan uzun müddət rasional iqtisadi siyasət yürüdərək enerji resurslarına tam etibar etmədən sektorlarını diversifikasiya edib və bərpaolunan enerji sahəsini prioritetləşdirib. Bu, ölkənin həm iqtisadi, həm də siyasi və strateji mövqeyini gücləndirib. Belə yanaşma Azərbaycanın və Türkiyənin regional imkanlarını artırır, həmçinin onları yalnız enerji resurslarına görə hədəf seçilə biləcək ölkələr sırasından çıxarır”.
Hüsamettin İnanç bildirib ki, Azərbaycanın və Türkiyənin bərpaolunan və yaşıl enerji sahəsində qabaqcıl rolu, iqlim dəyişikliyinə cavab olaraq atdıqları addımlar həm regionda sabitliyin qorunması, həm də strateji mövqelərinin gücləndirilməsi baxımından həlledici əhəmiyyət daşıyır.
