Sumqayıt şəhərinin 75 illik yubileyinə həsr olunmuş "İlham Əliyev Sumqayıt şəhərinin sürətli sosial-iqtisadi inkişafının qarantıdır" mövzusunda keçirilən elmi-praktiki konfrans çərçivəsində sənaye sərgisi təşkil olunub.
Şəhər rəhbərliyinin, aparıcı sənaye müəssisələri nümayəndələrinin iştirak etdikləri sərgidə Sumqayıt Kimya Sənaye Parkının rezidentləri, "Azərikimya" İstehsalat Birliyi, SOCAR Karbamid Zavodu, SOCAR Polimer MMC, ATS FOOD MMC, "Gilan Tekstil" MMC, "Alyans Tekstil" MMC, "Qartal" Tikinti Firması, Bakı Qida və Yağ Fabriki, "El Plastik" MMC, "Fin Plast" MMC, "Çinarlı" MMC, "Araz-L" MMC, Fuad Kimya Servis MMC və "RJ Xemikal" MMC kimi istehsalçılar öz məhsullarını nümayiş etdiriblər.
Vurğulanıb ki, Prezident İlham Əliyevin rəhbərliyi altında Sumqayıtda yeni sənaye komplekslərinin yaradılması və mövcud müəssisələrin genişləndirilməsi şəhərin sənaye potensialını dəfələrlə artırıb. Sumqayıt tarixi şöhrətini yenidən bərpa edərək regionun mühüm sənaye mərkəzlərindən birinə çevrilib və Azərbaycan iqtisadiyyatında əhəmiyyətli mövqe tutmağa davam edir.
Qeyd edilib ki, bu uğurlar şəhər həyatının bütün sahələrinə sirayət edib. Bu gün Sumqayıtda onlarla müasir tipli ali və orta təhsil müəssisələri, uşaq bağçaları, istirahət mərkəzləri fəaliyyət göstərir. Onların yarıdan çoxu yerli istehsal məhsulları ilə təmir edilib. Sumqayıtın zavod və müəssisələrində istehsal olunan məhsullar sənaye bazarlarında məmnunluqla alınır.
Sonda müəssisə rəhbərləri və şəhər nümayəndələri arasında gələcək perspektivlərlə bağlı fikir mübadiləsi aparılıb.
Akif ƏLİYEV,
"Azərbaycan"
jpg_1735107944.jpg)
