Böyük Britaniya hökuməti gizli çəkilişlərlə bağlı narahatlıqlar səbəbindən ağıllı eynəklərin qadağan edilməsini nəzərdən keçirir.
Mühafizə məsələləri üzrə nazir Satvir Kaur gizli videoların çəkilməsi ilə bağlı narahatlıqlar fonunda texnologiyanın müəyyən istifadəçilərə satışına məhdudiyyət qoyulacağına işarə edib.
Nazir deyib ki, smart eynəklərin faydaları onların törədə biləcəyi zərərlərlə müqayisədə nəzərdən keçirilməlidir. Hökumət artıq ağıllı eynəklərin müəyyən məkanlarda məhdudlaşdırılması, həmçinin onların satışının yalnız müəyyən istifadəçilər üçün icazə verilməsi variantlarını araşdırır.
O bildirib ki, ağıllı eynəklərdən çəkiliş aparmaq üçün istifadə edən şəxslər artıq müəyyən şəraitlərdə,məsələn, kameraların qadağan olunduğu məhkəmə zalında qanunu pozmaq riski ilə üzləşirlər.
Kaur əlavə edib ki, səhiyyə və təhsil kimi digər müəssisələrdə ağıllı eynəklər və hər hansı bir rəqəmsal qeydlə əlaqəli mövcud təhlükəsizlik və ya peşəkar siyasətlər mövcuddur. Bununla bağlı da araşdırmalar aparılır.
"Meta"nın sözçüsü bildirib ki, insanlar eynəklərdən istifadə edirlər, çünki onlar faydalıdır və musiqi dinləməkdən tutmuş canlı tərcüməyə və ya əlləri məşğul etmədən zəng etməyə qədər müxtəlif fəaliyyətlər zamanı anı yaşamağa imkan verir. “Eynəklər diqqət çəkəcək şəkildə hazırlanıb, məhz buna görə də kamerası olan hər bir eynəyin ön hissəsində, foto və ya video çəkilişi zamanı yanıb-sönən parlaq bir işıq mövcuddur. Bu işığı söndürmək mümkün deyil, kamera isə kimsə tərəfindən örtüldükdə və ya ona müdaxilə edildikdə işlək vəziyyətdən çıxır", – deyə əlavə olunub.
Əsmər QARDAŞXANOVA,
“Azərbaycan”
314444444 - Copyjpg_1793831795.jpg)
