Şimali Kipr Türk Cümhuriyyəti (ŞKTC) böyük Türk dünyasında layiqli yerini qürurla tutur. Biz Türk Dövlətləri Təşkilatının (TDT) liderlərinin Lefkoşanın bu təşkilatda müşahidəçi statusunun tanınması barədə qərarını yüksək qiymətləndirir və əlaqələrin, o cümlədən parlamentlərarası əməkdaşlığın daha da inkişaf edəcəyinə ümid edirik.
AZƏRTAC xəbər verir ki, bu sözləri Şimali Kipr Türk Cümhuriyyəti (ŞKTC) parlamentinin sədri Ziya Öztürkler Türkdilli Dövlətlərin Parlament Assambleyasının (TÜRKPA) Astanada keçirilən 14-cü Plenar iclasının iştirakçılarına müraciətində deyib.
Şimali Kipr parlamentinin sədri Azərbaycan Milli Məclisinin ŞKTC ilə parlamentlərarası əlaqələr üzrə işçi qrupunun yaradılması qərarını alqışlayıb və Bakının atdığı addımları Lefkoşa ilə “əməkdaşlığın vacib nümunəsi” adlandırıb.
O vurğulayıb: “Fürsətdən istifadə edərək, Azərbaycana və Milli Məclisə bir daha təşəkkürümü bildirmək istəyirəm. Biz Türk dünyası ilə strateji dialoqu daha da inkişaf etdirmək, tarixi və mədəni ortaqlığa əsaslanan əlaqələri dərinləşdirmək və genişləndirmək əzmindəyik. Türk dövlətlərinin ŞKTC ilə ikitərəfli və çoxtərəfli əməkdaşlıq potensialından maksimum istifadə edəcəyinə şübhə etmirəm”.
ŞKTC parlamentinin sədri TÜRKPA-nın türk dövlətlərinin ortaq məqsədlərinə nail olunmasına verdiyi töhfəni qeyd edib. O əmin edib ki, Lefkoşa 2040-cı ilədək TDT-nin İnkişaf Konsepsiyasının həyata keçirilməsi üçün mümkün olan bütün addımları atmağa hazırdır.
Z.Öztürkler Şimali Kiprin geostrateji mövqeyinin beynəlxalq tərəfdaşlara vəd etdiyi imkanlara da diqqət çəkib. “Türk Kipri Türk dünyasının Aralıq dənizinə açılan “pəncərəsidir”, TDT-nin ayrılmaz hissəsidir”, -deyən parlament sədri bütün türk ölkələrini ŞKTC-nin potensialından maksimum yararlanmağa çağırıb.
Qeyd edək ki, TÜRKPA-nın plenar iclasının iştirakçıları, o cümlədən Şimali Kipr Türk Cümhuriyyəti parlamentinin sədri Qazaxıstan Prezidenti Kasım-Jomart Tokayev tərəfindən qəbul edilib.
