Biz bu Zəfərə görə onlara borcluyuq
Azərbaycanın tarixində elə təqvimlər var ki, xalqımız o günləri böyük sevinc və iftixar hissilə qeyd edir. Çünki həmin günlər xalqımızın qəhrəmanlıq və igidlik salnaməsinə böyük hərflərlə yazılıb, zaman keçdikcə mübarizlik rəmzinə çevrilib. Xalqımızın qəhrəmanlıq nümunəsi olan İkinci Qarabağ müharibəsinin hər günü uğur və qələbə ilə keçdi. Rəşadətli Azərbaycan Ordusu Silahlı Qüvvələrin Müzəffər Ali Baş Komandanı İlham Əliyevin sərkərdəliyi altında 44 günlük Vətən müharibəsinin hər günündə xalqımıza qələbə sevinci yaşatdı.
İkinci Qarabağ müharibəsinin başladığı ilk gün - 27 sentyabr ölkəmizdə Anım Günü kimi qeyd olunur. Bu əlamətdar tarix ölkəmizin ərazi bütövlüyü və suverenliyi uğrunda canından keçmiş qəhrəman oğullarımızın əziz xatirəsinin xalqımız tərəfindən dərin ehtiram və hörmətlə yad edildiyi gündür. Anım Günü bizim üçün təkcə hüzn və kədər deyil. Həm də milli qürur, dövlətimizin gücünü, xalqımızın sarsılmaz birliyini, həmrəyliyini və Vətən sevgisini özündə birləşdirən və daim yaşadan əziz bir gündür. Şəhidlərimizin həyatını, döyüş yolunu xatırlamaq, onların bizə əmanət etdiyi Vətənə sahib çıxmaq və onu göz bəbəyi kimi qorumaq hər birimizin müqəddəs borcudur.
Dövlət başçımızın sərəncamı ilə təsis olunmuş Anım Günü İkinci Qarabağ müharibəsində qəhrəmancasına vuruşmuş, ölkəmizin ərazi bütövlüyü uğrunda canlarını fəda etmiş əsgər və zabitlərimizə, bütün şəhidlərimizə dərin ehtiramın ifadəsidir.
Prezident İlham Əliyev Vətənin azadlığı uğrunda canından keçmiş şəhidlərimizə yüksək ehtiramla yanaşır, onların xatirəsinin əbədiləşdirilməsini daim diqqət mərkəzində saxlayır. Dövlətimizin başçısı Vətən müharibəsinin başa çatması ilə bağlı xalqa müraciətində demişdir: "Birinci Qarabağ və İkinci Qarabağ müharibələrinin şəhidləri bizim qəlbimizdə əbədi yaşayacaq. Allah bütün şəhidlərimizə rəhmət eləsin. Onların qəhrəmanlığı, fədakarlığı nəticəsində biz torplaqlarımıza qayıdırıq. Allah bütün yaralı hərbçilərimizə şəfa versin, onlar tezliklə sağalıb normal həyata dönsünlər, onların sağalması üçün də əlimizdən gələni edirik və edəcəyik. Hətta ən ağır vəziyyətdə olan yaralı əsgərimiz, zabitimiz bilməlidir, əlimizdən gələni edəcəyik ki, onu normal həyata qaytaraq. Biz bu Qələbəyə görə onlara borcluyuq".
Birinci vitse-prezident Mehriban Əliyeva da şəhidlərimizin xatirəsinin əbədiləşdirilməsinə, şəhid ailələrinə, qazilərə hərtərəfli qayğı göstərilməsinə xüsusi diqqət yetirir. Mehriban xanım Əliyeva şəhidlərimizə hörmət və ehtiramını bu dəyərli sözlərlə ifadə etmişdir: "Azərbaycan xalqının igid oğulları Zəfər naminə, Azərbaycanın gələcəyi naminə canlarından keçib. Onların hər biri əsl qəhrəman, rəşadət və qorxmazlıq nümunəsidir... Şəhidlərimizin qanı nahaq yerə tökülmədi - biz tarixi ədaləti bərpa etdik, müqəddəs Qələbə qazandıq. Bu Qələbə xalqımızın tarixinə əbədi həkk olundu. Hər birimiz bu Zəfərin nəyin bahasına qazanıldığını yadda saxlamağa borcluyuq. Biz Vətən müharibəsi şəhidlərini heç vaxt unutmayacağıq. Onlar bizim qəlbimizdə daim yaşayacaq".
Həmişə olduğu kimi, xalqımız bu il də Anım Günündə yurdumuzun azadlığı uğrunda gedən döyüşlərdə şəhid olmuş oğullarımızın məzarlarını böyük ehtiramla ziyarət etdi. Yaşından asılı olmayaraq hər kəs səhər açılandan qəhrəman oğullarımızın xatirəsini yad etmək üçün əlində gül-çiçək dəstələri Hərbi Memorial Məzarlığa üz tutdu.
Bu onu bir daha göstərirdi ki, xalqımız qəhrəmanlıqları ilə tarix yazmış şəhidlərini heç vaxt unutmayacaq. Onların xatirəsini həmişə əziz tutacaq, hörmət və ehtiramla yad edəcək. Şəhidlər xalqın milli kimliyi, onların yolu qəhrəmanlıq tariximizin şərəfli səhifəsidir. Şəhidlərin hər birinin xalqımızın qəlbində öz yeri var. Bu cəsur oğulların məzarını ziyarət etməyə gələnlərin üz-gözündən kədərlə bərabər qürur və iftixar da duyulurdu. Bu da təbii idi. Çünki 27 sentyabr 2020-ci ildə başlayan İkinci Qarabağ müharibəsi xalqımıza kədərlə bərabər qələbə sevinci də yaşatdı.
Hərbi Memorial Məzarlığının qarşısında böyük izdiham var idi. Ziyarətə gələnlər asta, ehtiram ifadə edən addımlarla məzarlığın geniş açılmış qapısından içəri daxil olurdular. Əllərində bayraq və gül tutmuş məktəblilər müəllimlərinin müşayiəti ilə sırayla məzarlığa tərəf addımlayırdılar. Ziyarəçilərin ardı-arası kəsilmirdi. Gələnlərin arasında hərbi geyimdə olanlar daha çox gözə dəyirdi. Xalq böyük ehtiramla qəhrəman övladlarının qəbrini ziyarət edirdi. Məzarların üstünə qərənfillər səpilirdi.
Üstünə güllər düzülmüş, şəkillər qoyulmuş məzarlardan birinin yanında dayanmış qadınla söhbət etmək üçün ayaq saxlayırıq. Tanış olanda öyrəndik ki, qadın şəhid Əlibəyli Şəhriyar Ramiz oğlunun xalası Samirə xanımdır. 25 oktyabr 1994-cü ildə Qəbələ rayonu Vəndam kəndində dünyaya göz açmış Şəhriyar Əlibəyli ailənin yeganə övladı olub. Şəhriyar C.Naxçıvanski adına Hərbi Liseydə oxuyub, Azərbaycan Ali Hərbi Məktəbində (indiki Heydər Əliyev Hərbi İnstitutu) hərbi təhsilini davam etdirib. Könüllü olaraq 44 günlük Vətən müharibəsində iştirak edib. Şuşa, Xocavənd, Laçın və Kəlbəcər uğrunda gedən əməliyyatlarda iştirak edib. 5 mart 2023-cü ildə döyüş tapşırığını yerinə yetirərkən şəhid olub.
Samirə xanım bizimlə söhbətində dedi ki, Şəhriyarın qəhrəmanlığı ilə fəxr edir, qürur duyurlar: "O həmişə deyirdi ki, Qarabağın uzun illər erməni işğalında qalması zabit kimi onu çox narahat edir. Ordumuz çox güclü və qüdrətlidir. Əgər Qarabağın azadlığı uğrunda yenidən döyüşlər başlayarsa, nəyin bahasına olursa olsun, biz düşmənləri diz çökdürəcək, torpaqlarımızı işğaldan azad edəcəyik. Bu, zabit kimi mənim borcum və arzumdur. Şəhriyar arzusuna çatdı, yurdumuzun azadlığı uğrunda döyüşdü. Canından da çox sevdiyi Vətən torpaqları uğrunda şəhid oldu".
Növbəti həmsöhbətimiz Çingiz Zeynalov dedi: "Şəhid olanların hamısı bizim üçün doğma və əzizdir. Görürsünüzmü məzarlıqda nə qədər insan var. Kimliyindən, yaşından asılı olmayaraq Anım Günündə hamı bu müqəddəs məkana gələrək şəhidlərin məzarını ziyarət edir. Mən də bacım oğlu Xeyrulla İbrahimovun məzarını ziyarət etməyə gəlmişəm. Xeyrulla çox cəsur hərbçi idi. O, Birinci Qarabağ müharibəsi zamanı Laçın, Tərtər, Cəbrayıl, Füzuli, Qubadlı və Zəngilanın müdafiəsi uğrunda gedən döyüşlərdə iştirak edib. 1994-cü il martın 22-də Füzuli rayonunun Aşağı Seyidəhmədli kəndi istiqamətində gedən döyüşdə yaralanıb. Xeyrulla 44 günlük Vətən müharibəsi zamanı da Cəbrayıl, Füzuli, Zəngilan, Qubadlı və Xocavəndin azadlığı uğrunda gedən döyüşlərdə cəsarətlə vuruşdu. Hərbçi kimi üzərinə düşən döyüş tapşırıqlarını bacarıqla yerinə yetirdi. 2020-ci il oktyabrın 26-da yurdlarımızın azadlığı uğrunda gedən döyüşlərdə şəhid oldu. Allah bütün şəhidlərə rəhmət eləsin".
Baxışlarından kədər süzülən Gülbəniz Cəfərova ilə söhbət edərkən öyrəndik ki, o, torpaqlarımızın azadlığı uğrunda gedən döyüşlərdə şəhid olmuş həyat yoldaşı Zaur Cəfərovun məzarını ziyarət etməyə gəlib. Gülbəniz xanım dedi ki, Zaur çox ailəcanlı, cəsur, alicənab bir insan idi. Kəlbəcər rayonunun Başlıbel kəndində anadan olmuşdu: "Rayonumuz erməni qəsbkarları tərəfindən işğal olunanda doğma ocaqlarımızdan didərgin düşdük. Zaur 1997-ci ildə Azərbaycan Ali Hərbi Məktəbinə (indiki Heydər Əliyev Hərbi İnstitutu) qəbul olmuşdu. 2014-2016-cı illərdə Azərbaycan Respublikası Silahlı Qüvvələrinin Hərbi Akademiyasında təhsil almışdı. Müharibənin ilk günlərindən döyüşlərə atılmışdı. Gərgin və şərəfli döyüş yolu keçən Zaur 10 oktyabr 2020-ci ildə torpaqlarımızın azadlığı uğrunda gedən döyüşlərdə şəhid olmuşdu. Həyat yoldaşımdan üç övladı yadigar qalıb. Çalşıram ki, uşaqlarımızı Zaurun adına layiq böyüdüm. Onun igidliyi, qəhrəmanlığı ilə hamımız fəxr edir, qürur duyuruq".
Hava qaralsa da, ziyarətə gələnlərin ardı-arası kəsilmirdi. Xalq müstəqilliyi, ərazi bütövlüyü və suverenliyi uğrunda canından keçmiş şəhidlərin məzarını böyük ehtiramla yad edirdi. Hər addımda aydın görünür ki, şəhidlərin xatirəsi xalqımızın qəlbində əbədi yaşayır. Onların göstərdiyi fədakarlıq, qəhrəmanlıq tariximizin yaddaşına əbədi həkk olunub. Bu bir həqiqəti də ortaya qoyur: "Şirin canından keçən şəhidlərinin xatirəsini əbədi olaraq yaşadan xalq həmişə qalib olacaq".
Şərəf dolu bu gün bizə Vətənin müdafiəsinin, milli birliyin, həmrəyliyin, dövlətçilik ənənələrinin və tarixi yaddaşın əhəmiyyətini dönə-dönə xatırladır. Bizi sabahkı uğurlara və zəfərlərə səsləyir.
Vahid MƏHƏRRƏMOV,
"Azərbaycan"
677jpg_1790033437.jpg)
JPG_1790602988.JPG)
