20 Yanvar faciəsinin 36-cı ildönümü ilə əlaqədar Azərbaycanın Rusiyanın Sankt-Peterburq şəhərindəki Baş konsulluğunda anım tədbiri keçirilib.
AZƏRTAC xəbər verir ki, Baş konsul vəzifəsini icra edən Anar Yusifzadə tədbirdə çıxış edərək bildirib ki, 1990-cı ilin 20 Yanvar günü Azərbaycan tarixinə azadlığa gedən yolda canlarını qurban verən Vətən övladlarının misilsiz qəhrəmanlıq səhifəsi kimi yazılıb.
O diqqətə çatdırıb ki, keçmiş SSRİ rəhbərliyinin Azərbaycana qarşı qərəzli, ermənipərəst siyasətinə, əzəli torpaqlarımıza iddia edən təcavüzkar Ermənistanı açıq-aşkar dəstəkləməsinə və respublikanın ozamankı rəhbərliyinin xəyanətkar mövqeyinə etiraz əlaməti olaraq ayağa qalxmış geniş xalq kütlələrinə qarşı sovet ordusunun hərbi birləşmələri yeridilib. Nəticədə Bakıda və sonrakı günlərdə digər bölgələrdə misli görünməmiş faciə baş verib, 150-dən çox günahsız insan həlak olub.
Anar Yusifzadə qeyd edib ki, Azərbaycan xalqının Ümummilli Lideri Heydər Əliyev faciənin ertəsi günü Azərbaycanın Moskvadakı daimi nümayəndəliyinə gələrək xalqla birgə olduğunu bəyan edib, baş vermiş hadisəni hüquqa, demokratiyaya və humanizmə zidd adlandırıb, Azərbaycan xalqına qarşı törədilmiş tarixi cinayət kimi qiymətləndirib.
Bildirilib ki, 20 Yanvar faciəsinə dövlət səviyyəsində tam siyasi-hüquqi qiymət verilməsi məsələsi məhz Ulu Öndər Heydər Əliyevin sayəsində həllini tapıb. Onun təşəbbüsü ilə 1990-cı il noyabrın 21-də Naxçıvan Muxtar Respublikasının Ali Məclisində 20 Yanvar faciəsinə ilk dəfə siyasi-hüquqi qiymət verən qərar qəbul edilib. Yalnız Heydər Əliyevin ölkə rəhbərliyinə qayıdışından sonra 1994-cü il 5 yanvar tarixli “20 Yanvar faciəsinin 4-cü ildönümünün keçirilməsi haqqında” Fərmanında Azərbaycan Respublikasının Milli Məclisinə Qanlı Yanvar hadisələri ilə bağlı xüsusi sessiyanın keçirilməsi tövsiyə edilib. Milli Məclisin 1994-cü il martın 29-da qəbul etdiyi Qərarda isə 20 Yanvar faciəsi Azərbaycanda milli azadlıq hərəkatını boğmaq, xalqın inamını və iradəsini qırmaq məqsədilə totalitar kommunist rejimi tərəfindən törədilmiş hərbi təcavüz və cinayət kimi qiymətləndirilib.
Çıxışda qeyd olunub ki, 2020-ci ildə Vətən müharibəsi və 2023-cü ilin sentyabrında həyata keçirilmiş uğurlu antiterror tədbirləri nəticəsində Müzəffər Ali Baş Komandan, Prezident İlham Əliyevin rəhbərliyi ilə ölkəmizin ərazi bütövlüyü və suverenliyi tam bərpa edilib.
Tədbirdə çıxış edən çıxış edən digər natiqlər də 20 Yanvar faciəsinin Azərbaycan xalqına və bütün insanlığa qarşı törədilmiş terror aktı olduğunu bildiriblər.
Anım tədbiri çərçivəsində 20 Yanvar faciəsinə həsr olunmuş fotosərgi təşkil edilib və həmin hadisələrdən bəhs edən sənədli film nümayiş olunub.
