Sentyabrın 25-də Milli Məclisin sədri Sahibə Qafarova ölkəmizdə səfərdə olan Gürcüstan Parlamentinin sədr müavini Nino Tsilosaninin rəhbərlik etdiyi nümayəndə heyəti ilə görüşüb.
Milli Məclisin Mətbuat və ictimaiyyətlə əlaqələr şöbəsindən AZƏRTAC-a bildirilib ki, görüşdə Sahibə Qafarova Azərbaycan ilə Gürcüstan arasında tarixən mövcud olan dostluq və mehriban qonşuluq münasibətlərinin bu gün qarşılıqlı etimada və strateji tərəfdaşlığa əsaslanaraq uğurla inkişaf etdiyini bildirib.
İki ölkə arasında münasibətlərin formalaşması və inkişafında Ulu Öndər Heydər Əliyevin xüsusi rolu qeyd edilib.
Bildirilib ki, Azərbaycan və Gürcüstan liderləri tərəfindən ikitərəfli əlaqələrin strateji əhəmiyyəti daim vurğulanır. Bu baxımdan, ali və yüksək səviyyəli qarşılıqlı səfərlərin münasibətlərin inkişafında mühüm rol oynadığı qeyd olunub. Prezident İlham Əliyevin və Birinci vitse-prezident Mehriban Əliyevanın Gürcüstana son dövlət səfərinin regional əməkdaşlıq baxımından əhəmiyyətli siyasi mesajlar daşıdığı, Azərbaycan–Gürcüstan dostluq və qardaşlığının regionda əməkdaşlığın daha da gücləndirilməsinə xidmət etdiyi bildirilib.
Nino Tsilosani Azərbaycanın Gürcüstanın suverenliyinə və ərazi bütövlüyünə verdiyi dəstəyə görə təşəkkürünü ifadə edib. Gürcüstanın işğal olunmuş ərazilərində keçirilmiş qondarma seçkilərlə bağlı Azərbaycanın Xarici İşlər Nazirliyi tərəfindən səsləndirilmiş bəyanatın yüksək qiymətləndirildiyi, bu mövqenin mühüm siyasi mesaj olduğu vurğulanıb.
Söhbət zamanı iqtisadi əlaqələrdən bəhs edilib, bu çərçivədə İkinci İnvestisiya Forumunun təşkilində iştirakın və forumun iki ölkə arasında iqtisadi əməkdaşlığın genişləndirilməsi baxımından əhəmiyyəti vurğulanıb. Parlamentlərarası əlaqələrin Azərbaycan–Gürcüstan münasibətlərinin mühüm istiqamətlərindən biri olduğu bildirilib.
Gürcüstan Parlamentinin “Şərəf” medalının Milli Məclisin sədri Sahibə Qafarovaya təqdim olunmasının parlamentlərarası əlaqələrin yüksək səviyyəsinin göstəricisi olduğu qeyd edilib. Spiker Sahibə Qafarova öz növbəsində təqdim olunan mükafatı yüksək qiymətləndirərək, onu Azərbaycan–Gürcüstan parlamentlərarası münasibətlərinə verilən yüksək dəyərin ifadəsi kimi dəyərləndirib.
31 - Copyjpg_1794009722.jpg)
314444444 - Copyjpg_1793831795.jpg)
