Ekologiya və Təbii Sərvətlər Nazirliyinin (ETSN) təşkilatçılığı ilə keçirilən növbəti təmizlik aksiyası çərçivəsində Şabranda dörd hektar meşəlik ərazi tullantılardan təmizlənib.
AZƏRTAC-ın bölgə müxbiri xəbər verir ki, Bakı-Quba avtomobil yolunun kənarındakı meşə zolağında təşkil olunan ekoloji aksiyada ekologiya və təbii sərvətlər naziri Muxtar Babayev, ETSN-in, yerli icra orqanlarının əməkdaşları və könüllülər iştirak edib.
Aksiya zamanı toplanmış plastik və digər tullantılar qablaşdırılaraq aidiyyəti üzrə daşınıb.
5 saylı Regional Ekologiya və Təbii Sərvətlər idarəsinin rəisi Fərid Piriyev AZƏRTAC-ın bölgə müxbirinə müsahibəsində bildirib ki, təmizlik aksiyalarının keçirilməsində məqsəd ərazilərin daimi təmizliyini təmin etmək, təbiət ərazilərində əhali tərəfindən təmizliyə riayət olunmasını təbliğ və təşviq etmək, müəyyən olunmayan ərazilərə məişət tullantıları atılmasının qarşısını almaq və ictimaiyyəti ətraf mühitin mühafizəsi sahəsində mübarizəyə cəlb etməkdir. Ekologiya və Təbii Sərvətlər Nazirliyi hər kəsi ətraf mühitin mühafizəsinə yönələn bu cür tədbirlərdə fəal iştirak etməyə, ətraf mühitə qayğı və həssas münasibət göstərməyə çağırır.
“Bu gün Şabran rayonu ərazisində təmizlik aksiyasında iştirak edirəm. Meşə zolağında keçirilən aksiya zamanı buranın çirkləndirildiyinin şahidi olduq. Mən vətəndaşlarımıza çağırış etmək istəyirəm. Tullantıların qarşısını alaq və təbiətimizi birgə qoruyaq”, - deyə aksiya iştirakçısı Aynur Qasımova bildirib.
Aksiya iştirakçısı Nihat Salmanlı bildirib ki, könüllü qrupu ilə birgə tez-tez bu cür təmizlik aksiyalarında iştirak edir: “Təbiəti qorumaq, insanları bu gözəl sərvətin qayğısına qalmağa səsləmək məqsədilə bu gün Ekologiya və Təbii Sərvətlər Nazirliyinin təşkil etdiyi aksiyaya qoşulmuşuq. Bundan əvvəl də sahil zolağının təmizlənməsi aksiyasında iştirak etmişik. İnsanlar xüsusən yay aylarında istirahət etdikləri yerlərdə öz tullantılarını yerə atmasalar bu cür aksiyaların keçirilməsinə də ehtiyac olmaz. Hamımız birlikdə təbiəti qorumalıyıq ki, təmiz dünyada yaşayaq”.
Qeyd edək ki, sahilboyu və meşəlik ərazilərin təmizlənməsi məqsədi daşıyan bu cür aksiyaların mövsüm boyu hər həftəsonu keçirilməsi nəzərdə tutulub.
