Mayın 10-da bütün Azərbaycan xalqı Ümummilli Liderin anadan olmasının növbəti ildönümünü qeyd edib. Həmin gün Rusiyanın Ulyanovsk şəhərində də Heydər Əliyevin xatirəsinə həsr olunmuş ənənəvi tədbir keçirilib, Azərbaycan diasporunun fəalları Ulu Öndərin abidəsinin önünə toplaşıb. Tədbirdə Ulyanovsk vilayətinin qubernatoru Aleksey Russkix, qubernatorun müavini Aleksandr Korobko, şəhər rəhbəri Aleksandr Boldakin, Şəhər Dumasının sədri İlya Nojeçkin, bölgənin milli təşkilatlarının rəhbərləri, Heydər Əliyev adına 78 nömrəli məktəbin müəllim və şagirdləri, digər qonaqlar iştirak ediblər.
AZƏRTAC xəbər verir ki, Ulyanovsk vilayətinin qubernatoru iştirakçılar qarşısında çıxış edərək deyib: “Biz Heydər Əliyevin vilayətimizin inkişafındakı xidmətlərini yüksək qiymətləndiririk. Məhz o, Volqa üzərindən Prezident körpüsünün tikilməsi qərarının qəbul edilməsində fəal iştirak edib. Mədəni və təhsil proqramlarını dəstəkləyib. Biz Heydər Əliyevin xatirəsinin yaşadılması, Ulyanovsk vilayətində millətlərarası sülh və əmin-amanlığın möhkəmləndirilməsi istiqamətində fəaliyyətimizi bundan sonra da davam etdirəcəyik”.
“Ulyanovsk Regional Azərbaycan Milli-Mədəni Muxtariyyəti”nin sədri İslam Hüseynov çıxışında deyib: “Bu gün biz hamımız Heydər Əliyevin anadan olmasının 102-ci ildönümünü qeyd edirik. Bu dahi insanın təkcə Azərbaycanın taleyində deyil, həm də Rusiya ilə yeni mehriban qonşuluq münasibətlərinin qurulmasında böyük rolu olub. Hələ o vaxtlar, illər əvvəl biz başa düşmürdük ki, xalqlar arasında sülh və dostluq münasibətləri nə qədər ciddi məsələdir. Lakin Heydər Əliyev bütün riskləri aydın görürdü, ona görə də onun dövlət siyasəti ədalətə, hörmətə və xoşməramlılığa əsaslanırdı. Rusiya ilə düzgün və xoş münasibətlərin qurulması Heydər Əliyev irsinin böyük bir hissəsidir. Bu, onun həmişə minnətdarlıqla xatırlayacağımız misilsiz xidmətidir”.
Tədbirdə 78 nömrəli məktəbin direktoru Gennadi Tsarev də çıxış edib, şagirdlər şeirlər oxuyublar.
Abidənin önünə gül dəstələri qoyulması ilə başa çatan tədbirdə qeyd olunub: “Biz xüsusi bir rayonda yaşayıb işləməkdən qürur duyuruq. Heydər Əliyevin xatirəsi burada dərin ehtiramla yad edilir, Azərbaycan xalqının liderinin Rusiyada ilk abidəsi məhz burada ucaldılıb”.
