Azyaşlılar arasında yoluxucu xəstəliyin yayılma səbəbləri oyuncaqlar və gigiyena qaydalarına əməl olunmamasıdır
Yazın gəlişini, havaların istiləşməsini hər kəs səbirsizliklə gözləsə də, bu aylar dəyişkən hava, çiçəklərin, təbiətin canlanması ilə yanaşı, həm də müxtəlif virus infeksiyalarının daha çox yayılması ilə müşayiət edilir. Məhz bu vaxtlar insanların "havaya aldanması" ilə soyuqdəymə nəticəsində orqanizmin zəifləməsi müxtəlif viruslara qarşı müqavimət səviyyəsini aşağı salır.
Uşaqlar arasında yayılan virus
Təbii ki, burada ən həssas qrup azyaşlılardır. Mütəxəssislər son zamanlar uşaqlarda müşahidə olunan qusma, hərarətin rotavirusla əlaqədar olduğunu deyirlər. Bu virus mövsümi xarakter daşısa da, son zamanlar sürətlə yayıldığı deyilir. Rotavirus bağırsaq infeksiyasıdır, 5 yaşa qədər uşaqlarda daha çox rast gəlinir. Virusa yoluxan uşağın qusma və diareya nəticəsində orqanizmində susuzlaşması baş verə bilir.
Səhiyyə Nazirliyinin ekspert-mütəxəssisi Zakir Quliyev qəzetimizə açıqlamasında bildirib ki, hazırda uşaqlar arasında daha çox mövsümi xarakterli rotavirusla yanaşı, daha çox payız və qış aylarında yayılan influenza (qrip) virusuna da rast gəlinir.
Rotavirus daha çox 2-5 yaşlı uşaqlar arasında görünür və tənəffüs vasitəsilə yayılır. Bu yaş qrupundakı uşaqlarda əllərin yuyulmasına diqqət edilmədiyi, eyni zamanda uşaqların oyuncağı ağzına alıb və bir-biri ilə paylaşması nəticəsində daha çox yayılır.
Xəstəliyin simptomları
Həkim qeyd edir ki, rotavirusa hər il yaz aylarında rast gəlinir, sadəcə son iki ildə pandemiya səbəbindən bağça və məktəblər bağlı olduğu üçün virusa yoluxma az olub. Bu il vəziyyət yenidən iki il əvvəlki göstəriciyə qayıdıb.
Onun sözlərinə görə, ən çox müşahidə olunan simptomlar ürəkbulanma, qusma, qızdırma və xəstəliyin kəskin halında diareyanın şiddətli olmasıdır. Simptomlar digər virus infeksiyalarındakı kimi 5 gündən bir həftəyə kimi davam edə bilər. Hərarət 37,5-39 dərəcə arasında ola da bilir.
Valideynlərə tövsiyələr
Ekspert-mütəxəssis valideynlərə tövsiyələrini də çatdıraraq vurğulayır ki, xəstə yataq rejimində olmalı və istirahət etməlidir. Əgər uşaq itirdiyi mayeni qəbul edə bilirsə, narahatlığa əsas yoxdur. İshal sayı gün ərzində çox olarsa, kəskin halsızlıq, qida qəbulunda problem yaranarsa, o zaman hosbitalizasiya tövsiyə olunur:
"Həmçinin simptomlar görünən ilk gündən həkimə müraciət olunmalıdır. Virusun spesifik müalicəsi yoxdur, sadəcə itirilən maye qəbul edilməlidir. Evdə sistem köçürmək qətiyyən olmaz. Əgər şikayətlər çox olarsa, xəstəxanada yatmaq tövsiyə edilir. Uşağın sağalması virusun yükünə, immun sisteminə bağlıdır".
Qeyd edək ki, Ümumdünya Səhiyyə Təşkilatının məlumatına görə, rotavirus infeksiyası əsasən, Asiyanın inkişafda olan ölkələri və Afrikada hər il 500 min uşağın ölümünə səbəb olur.
Əsmər QARDAŞXANOVA ,
"Azərbaycan"
