17 Noyabr 2023 15:55
379
İDMAN
A- A+

Rauf Əliyev: “Millimizin qalib gələcəyini heç kim gözləmirdi”


“Millimizin qalib gələcəyini mən də daxil olmaqla, heç kim gözləmirdi”. Bunu “Report”a açıqlamasında Azərbaycan millisinin sabiq futbolçusu Rauf Əliyev komandanın Bakıda İsveçi 3:0 hesabı ilə məğlub etdiyi AVRO-2024-ün seçmə mərhələsinin oyunu barədə danışarkən deyib.
34 yaşlı keçmiş hücumçu erkən qolların qarşılaşmada həlledici rol oynadığını düşünür: “Heç-heçəni proqnozlaşdırmaq olardı. Futbol ictimaiyyəti və azarkeşlər üçün bu nəticə sürpriz oldu. Yığmamızın erkən qolları İsveçə şok yaşatdı. Qonaqlar belə başlanğıc gözləmirdilər”.
Onun fikrincə, milli üzvləri əvvəlki görüşlərlə müqayisədə artıq daha istəkli görünürlər: “Estoniya üzərində qələbədən sonra komandamızda özünəinam yaranmışdı. Qırmızı vərəqəyə qədər sərgilənən oyun, istək, mübarizlik hamının ürəyincə oldu. Hamımızın yığmadan gözlədiyi oyun bu idi. Əvvəllər futbolçuların keyfiyyəti yaxşı olsa da, meydanda istəksiz olurdular. Ancaq bu problemi artıq aradan qaldırırlar. Görünən odur ki, komanda oyunlara yaxşı köklənə bilir”.
R.Əliyev qarşılaşmadan əvvəl ölkə futbolunundakı xidmətlərinə görə rəmzi olaraq qızılı rəngdə çərçivəyə salınan Azərbaycan millisinin forması və xüsusi hədiyyə ilə təltif olunmasına da münasibət bildirib: “AFFA dünən bizim üçün təltifetmə mərasimi təşkil etmişdi. Qurumun baş katibi Sərxan Hacıyevə, gənclər və idman naziri Fərid Qayıbova təşəkkürümü bildirirəm ki, bizi qiymətləndirdilər. Millidəki çıxışımıza görə bu mükafata layiq görüldük. Yığmanın da eyni gündə qələbə qazanması ikiqat sevinc oldu. İsveç kimi güclü komandaya qarşı oyunda gözəl nəticəyə imza atdılar”.
Qeyd edək ki, Rauf Əliyev 2010-2018-ci illərdə Azərbaycan millisinin heyətində keçirdiyi 46 matçda 7 qol vurub. Cari tsikldə 7 oyuna 7 xal toplayan komandamız F qrupunda 4-cü pillədə qərarlaşıb. Canni De Byazinin yetirmələri qrupda son görüşü noyabrın 19-da Brüsseldə Belçikaya qarşı keçirəcəklər.

"Azərbaycan"

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video