"İslam sivilizasiyasının tarixi-mədəni mərkəzlərindən olan Azərbaycanda Ramazan bayramı hər il böyük təntənə ilə keçirilir, xalqımızın və dövlətimizin firavanlığı, əmin-amanlığı üçün dualar edilir, ölkəmizin müstəqilliyi və ərazi bütövlüyü uğrunda canından keçən qəhrəman Vətən övladlarının xatirəsi dərin ehtiramla yad olunur".
İlham ƏLİYEV
Bu gün dünyanın hər yerində müsəlmanlar müqəddəs ramazan ayının bitməsini, "orucluq ayı"nın başa çatmasını bayram edirlər. Ramazan bərəkət, rəhmət, məğfirət, günahlardan təmizlənmə ayıdır. Ramazan üç fəzilətli ayın sonuncusudur.
Bu ayın Allah yanında qiyməti o qədər böyükdür ki, minillərdir işığına yol getdiyimiz dörd müqəddəs kitabını "Zəbur"u, "Tövrat"ı "İncil"i və "Quran"ı Allah on bir ayın sultanı sayılan bu şərafətli ayda nazil etmişdir.
Ramazan bayramı mənəviyyat, bərabərlik, birlik bayramıdır. Əslində, insanlar düşüncələrinin, iradələrinin hisslərinə, nəfislərinə qalib gəldiklərini bayram edirlər. Ramazanda insanlar aclıqla, yuxusuzluqla, hətta gözü, könlü toxluqla da sınağa çəkilirlər. Ramazan eyni zamanda könlünə, nəfsinə toxluq verməyin, ruhun cism üzərində qələbəsinin bayramıdır. Bu ayın fəzilətlərini İslam Peyğəmbəri Həzrət Məhəmməd belə qiymətləndirib: "Allah yanında ən gözəl ay olan mübarək ramazan ayının günləri və gecələri o qədər üstündür ki, hətta oruc tutan adamın nəfəs çəkməyi, yatmağı belə zikr, ibadət sayılır. Bu ayda olunan dualar və ibadətlər məqbul, hacətlər müstəcəb olur".
Ramazan ruzisini bölməyi bacaranların, kasıbı sevindirənlərin, ehtiyacı olanlara əl tutanların, günahı anlayıb günah etməkdən çəkinənlərin ayıdır. Ramazan əsl insanlıq ayıdır. Bu ayda imanlı insanlar oruc tutmaqla, Tanrıya yaxınlaşmaqla həm də həyat fəlsəfəsini daha çox anlamaqla insanlara sevgi, mərhəmət və qayğı hissləri nümayiş etdirirlər. Oruc imkansızlara kömək göstərmək, onların yaşadıqları hissləri duymaq məqsədilə vacib buyrulub. İmkanlılar orucluq günlərində imkansız insanların yaşadığı anları yaşayır, və bu, insanlarda şəfqət və mərhəmət hisslərinin oyanmasına kömək edir.
Oruc insanın dünya malı ilə öz arasında yaratdığı mənəvi sərhəddir. Oruc daxilimizdə nizamı bərqərar edir, ruhumuzu və iradəmizi gücləndirir, arzu və ehtiraslarımızın önünə bir qalxan kimi sədd çəkir. Oruc insanın gözünü, qulağını, dilini və bədəninin digər üzvlərini təmizləyir, yersiz və günahyönümlü işlərdən çəkindirir. Oruc vicdanın səsini dinləməyi öyrədir insana. İnsan oruc sayəsində mənəviyyatı, əxlaqı, iç dünyası ilə üzləşmə fürsəti əldə edir və sınağa çəkilir.
Bu ayda küsülülər barışır, varlı varından yoxsula pay verib, onu sevindirir. Ramazan günahların bağışlanıldığı tövbənin qəbulu, haqqa tapınma fürsətini verir. Ramazan xeyrin şər üzərində qələbə ayıdır.
Savab əməllərin sevincini yaşadan müqəddəs ay
Ramazan bayramı bu il bizim üçün bir qədər də fərqlidir. İnsanlarımız bu il müqəddəs Ramazan bayramını işğaldan azad edilmiş doğma torpaqlarımızda da könül xoşluğu ilə qeyd edirlər. İllərlə onlar Uca Yaradana əllərini açıb yurd həsrəti ilə dualar etmişdilər. "Növbəti bayramımızı Qarabağda keçirə bilək" niyyəti ilə bitərdi duaları. Artıq Şərqi Zəngəzur və Qarabağa köç başlayıb. Onlar yurda dönüş sevincinə görə şükranlıqlarını bildirirlər. Bu il 30 ildən sonra Zəngilan rayonunun Ağalı kəndində bayram namazı qılınacaq. Adamlar alınlarını illərlə həsrətini çəkdikləri müqəddəs torpağa qoyub səcdə edəcəklər. Talış kəndində insanlar onları qoruyan əsgərlərə dua edib, bayram sovqatına qonaq edəcəklər. Şuşadan səmaya yüksələn azan yurdumuzu yenidən bərpa edən insanları bayrama səsləyəcək. Füzuli, Zəngilan hava limanlarına eniş etmiş təyyarələrdən düşənlərin dilindən "şükür" kəlməsi əskik olmayacaq. Şuşaya gedən maşınların sayı birə beş artacaq... Bu il vətənin torpağı da, daşı da sevinir. İllərlə yağı düşmənin tapdağında qalan torpaqlarımızda həyat canlanır. İşğaldan azad olunmuş ərazilərdə böyük quruculuq, abadlıq, bərpa işləri görülür.
Ramazan barış deməkdir, sülh, əmin-amanlıq deməkdir. İslami dəyərlərin qoruyucusu, mənəvi dəyərlərimizi yaşadan və öz siyasətində həmişə bu amilə üstünlük verən Azərbaycan Prezidenti İlham Əliyev də düşmənə səhvini anlamağı, hikkədən çəkinməyi, müharibəyə, qana son qoymağı, sülh müqaviləsini imzlamağı təklif edir. Bu yöndə ardıcıl olaraq ortalığa qəti mövqe qoyub. Ya torpaqlarımızda yaşayanlar sülhü qəbul edib, Qarabağda ucalan zəfər bayrağımızın altında yaşayacaqlar, yaxud da özlərinə yaşamaq üçün başqa yer axtaracaqlar!
Vətənə can dedik. Elə isə bu müqəddəs bayram günündə ilk duamız canımız Azərbaycana, dövlətimizin daha da qüdrətlənməsinə olsun. Vətənin bütövlüyü uğrunda canlarından keçmiş şəhidlərimizə Tanrıdan rəhmət, qazilərimizə, əsgərlərimizə, vətəni sevən və qoruyan oğullarımıza cansağlığı diləyək. Diləkləriniz xoş, niyyətləriniz təmizdir, inşallah, Uca Tanrı dualarınızı qəbul edər.
Elşən QƏNİYEV,
"Azərbaycan"
