Qusarda aqrar biznes və I intensiv meyvə bağları festivalı keçirilib

Qusarda  Kənd Təsərrüfatı Nazirliyinin Aqrar İnnovasiya Mərkəzi və rayon icra hakimiyyətinin birgə təşkilatçılığı ilə "Aqrar Biznes Festivalı" və "I İntensiv Meyvə Bağları Festivalı" keçirilib. 

General Mahmud Əbilov adına Qusar Şəhər Mərkəzi Meydanında keçirilən tədbirdə intensiv meyvə bağlarının salınması və becərilməsi ilə məşğul olan təsərrüfat subyektləri, meyvəçilik təsərrüfatları, aqrar sahədə fəaliyyət göstərən şirkətlər, fermerlər və sahibkarlar iştirak ediblər.

Festivalın əsas məqsədi meyvəçilik sahəsində müasir texnologiyaların və innovativ yanaşmaların tətbiqinin təşviq edilməsi, intensiv bağçılığın inkişaf perspektivlərinin nümayiş olunması, fermer və sahibkarların dövlət dəstəyi mexanizmləri barədə məlumatlandırılması, qabaqcıl təcrübələrin bölüşdürülməsi və aqrar sahədə fəaliyyət göstərən subyektlər arasında əməkdaşlığın genişləndirilməsi olub.

Tədbirin açılışında çıxış edən rayon icra hakimiyyətinin başçısı Sahir Məmmədxanov bildirib ki, Qusar əlverişli təbii-iqlim şəraiti, torpaq ehtiyatları və formalaşmış kənd təsərrüfatı ənənələri ilə meyvəçiliyin, o cümlədən intensiv bağçılığın inkişafı üçün geniş imkanlara malikdir. S.Məmmədxanov  kənd təsərrüfatının rayonda dayanıqlı inkişafında sahibkarlara dövlət dəstəyinin mühüm rolunu xüsusi qeyd edərək "Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramı"nın aqrar sahənin inkişafı baxımından mühüm əhəmiyyət kəsb etdiyini vurğulayıb.

Kənd təsərrüfatı nazirinin müavini Seymur Səfərli də sözügedən dövlət proqramının əsas hədəflərinə toxunub. O, meyvəçiliyin aqrar sektorun mühüm istiqamətlərindən biri olduğunu qeyd edərək bu sahədə intensiv istehsalın genişləndirilməsinin, müasir suvarma sistemlərinin və innovativ texnologiyaların tətbiqinin əhəmiyyətini vurğulayıb. Qeyd olunub ki, dövlət proqramında meyvəçilik təsərrüfatlarının inkişaf etdirilməsi, istehsalın səmərəliyinin və məhsuldarlığın artırılması, müasir texnologiyaların tətbiqinin genişləndirilməsi və sahənin rəqabətqabiliyyətliyinin yüksəldilməsi istiqamətində mühüm hədəflər müəyyənləşdirilib.

Aqrar İnnovasiya Mərkəzinin direktoru Anar Cəfərov festivalın aqrar sahədə bilik və təcrübə mübadiləsi, müasir texnologiyaların və innovativ yanaşmaların nümayişi baxımından əhəmiyyətini qeyd edib. Bildirilib ki, bu cür tədbirlər fermerlər, sahibkarlar və aqrar sahədə fəaliyyət göstərən şirkətlər arasında əməkdaşlığın genişləndirilməsinə və yeni biznes əlaqələrinin qurulmasına imkan yaradır.

İSFA MMC-nin rəhbəri Samir Xeyirbəyov və "Metak" şirkətinin təsisçisi Alik Kərimov festivalın fermerlərin inkişafı və aqrar sahədə təcrübə mübadiləsinin genişləndirilməsi baxımından mühüm əhəmiyyət daşıdığını qeyd ediblər. Onlar həmçinin sahibkarlar olaraq, dövlət başçısı tərəfindən kənd təsərrüfatı sahəsində qarşıya qoyulan vəzifə və hədəflərin icrasında fəal iştirak edəcəklərini bildiriblər.

Festival çərçivəsində ölkənin müxtəlif bölgələrindən 70-dən artıq meyvəçilik təsərrüfatı subyekti, fermer və sahibkar iştirak ediblər. Tədbir çərçivəsində "Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramı"nın əsas hədəf və istiqamətlərini əks etdirən məlumatlandırıcı posterlər də nümayiş olunub.

Festival çərçivəsində rayon icra hakimiyyətinin inzibati binasında "Aqrar sahədə dövlətin dəstək mexanizmləri" mövzusunda panel müzakirə də keçirilib. Paneldə Kənd Təsərrüfatı Nazirliyinin, Azərbaycan Biznesinin İnkişafı Fondunun, Aqrar Sığorta Fondunun və "Unibank" MMC-nin nümayəndələri iştirak ediblər. Müzakirə zamanı fermer və sahibkarların dövlət dəstəyi mexanizmlərindən, maliyyə resurslarından və aqrar sığorta xidmətlərindən yararlanma imkanları barədə məlumat verilib.

Festival aqrar sahədə dövlət-özəl tərəfdaşlığının gücləndirilməsi, regionlarda aqrar biznes mühitinin inkişaf etdirilməsi, müasir texnologiyaların tətbiqinin təşviqi və intensiv meyvəçilik sahəsində qabaqcıl təcrübələrin yayılması baxımından əhəmiyyətli olub. 

Akif ƏLİYEV,

"Azərbaycan"