Ümumdünya Səhiyyə Təşkilatı (ÜST) qripə qarşı peyvəndin qrip mövsümü başlamazdan əvvəl vurulmasını tövsiyə edir. Peyvənddən sonra immun cavabın və qoruyuculuğun formalaşması üçün 10–14 gün tələb olunur. Bu baxımdan, qripə qarşı peyvənd olunmaq istəyən şəxslərin vaksinasiya prosesini payız aylarında, qrip mövsümü başlamazdan əvvəl planlaşdırması məqsədəuyğundur.
Bu barədə AZƏRTAC-ın sorğusuna cavab olaraq Tibbi Ərazi Bölmələrini İdarəetmə Birliyinin İctimaiyyətlə əlaqələr və kommunikasiya departamentindən məlumat verilib.
Bildirilib ki, peyvəndin konkret tətbiq vaxtı isə ölkədə vaksinlərin əlçatanlığı və qripin mövsümi epidemioloji xüsusiyyətləri nəzərə alınmaqla müəyyən edilir.
Qrip peyvəndinin hər il tətbiq olunmasının əsas səbəblərindən biri isə qrip viruslarının daim dəyişməsidir. Qrip viruslarının dövr edən ştamları mövsümdən mövsümə dəyişə bildiyindən, ÜST hər il yeni vaksinin tərkibinə dair tövsiyələr hazırlayır. Eyni zamanda, peyvənd nəticəsində formalaşan immun müdafiə zaman keçdikcə zəifləyə bilər. Bu səbəbdən yeni mövsümdə təkrar vaksinasiya tövsiyə olunur.
Vurğulanıb ki, qripə qarşı peyvənd, ilk növbədə, qrip infeksiyasının ağırlaşmaları baxımından daha yüksək riskə malik şəxslər üçün xüsusilə əhəmiyyətlidir. ÜST tərəfindən prioritet qruplar sırasında yaşlı şəxslər, kiçikyaşlı uşaqlar, hamilə qadınlar, xroniki xəstəlikləri və immun çatışmazlığı olan şəxslər və tibb işçiləri qeyd olunurlar. Tibb işçilərinin vaksinasiyası həm onların özlərinin qorunması, həm də həssas pasiyentlərə infeksiyanın ötürülməsi riskinin azaldılması baxımından əhəmiyyət daşıyır.
jpg_1790593133.jpg)
