Erməni xalqının Nikol Paşinyana bağladığı ümidlər və gözləntilər olduqca yüksək idi. Reallıqlar isə bu ümidləri sabun köpüyü kimi dağıtmaqdadır.
Nikol Paşinyanın baş nazir kimi Ermənistan parlamentindəki pafoslu çıxışları bir daha göstərdi ki, etirazçı kütləni tələblə, populist vədlərlə ələ alan yeni siyasi fiqurlar ölkənin daxili və xarici siyasətində əhəmiyyətli islahatlar aparmaq, rasional, reallıqlara söykənən təkliflər irəli sürmək, ən nəhayət, onları həyata keçirmək potensialına malik deyillər.
Əhalinin sosial vəziyyətinin yaxşılaşdırılmasına, iqtisadiyyatın böyük sıçrayışlarla inkişaf etdirilməsinə, ölkəsinin guya regionun "lider dövləti"nə çevrilməsinə dair Paşinyanın səsləndirdiyi iddialar və bol vədlər əslinə qalsa, gerçəklikdən tamamilə uzaqdır və Ermənistanın düşdüyü böhranlı vəziyyəti, ölkənin acınacaqlı mənzərəsini özündə əks etdirmir.
Siyasi strateq Armen Badalyan Paşinyanın parlamentdəki son isterik hərəkətlərini şərh edərkən deyib ki, baş nazirin əsəbiliyi birbaşa onun "xarici krışa" tapa bilməməsi ilə bağlıdır: "Ermənistanda indiki hakim komanda üç əsas məqsədə nail olmaq üçün hakimiyyətə gəlib: Artsaxı təslim etmək, Zəngəzur dəhlizini təmin etmək və Rusiyanı Ermənistandan sıxışdırıb çıxarmaq. Cənubi Qafqaz və orada baş verən proseslər onları maraqlandırmır, bu o deməkdir ki, ABŞ artıq Paşinyanın başının üstündə "çatı" deyil".
Badalyanın sözlərinə görə, bunu əvvəllər, xüsusən də daxili siyasi iğtişaşlar zamanı Ermənistanın indiki hakimiyyətini dəstəklədiyini dəfələrlə bəyan edən, nazirlərlə, hətta baş prokurorla fəal görüşən ABŞ səfirinin passivliyi də sübut edir. O, əmindir ki, hakimiyyət dəyişikliyi prosesi başlasa və qarşıdan gələn seçkilərdə Vaşinqton Ermənistanın indiki hakim elitasına dəstək göstərməyəcək: "Paşinyan da Avropa Birliyinə ümid edə bilməz, çünki ABŞ-nin siyasətindəki dəyişiklik səbəbindən Avropa bütün resurslarını Ukraynanı dəstəkləməyə cəmləmək məcburiyyətindədir. Cənubi Qafqaz regionu ən azı indiki mərhələdə avropalılar üçün əhəmiyyətini itirib. Zəngəzur dəhlizi layihəsi, ümumiyyətlə, avropalılar, ABŞ üçün daha maraqlı deyil. Onlara yalnız bir şey lazımdır: Rusiyanın təsirini Ermənistanda azaltmaq. Sülh müqaviləsinin imzalanıb-imzalanmaması onları maraqlandırmır".
O əlavə edib ki, Aİ-nin regiona marağının aşağı səviyyəsi Paşinyana ölkə daxilində mövqelərini gücləndirmək üçün onlardan dəstək almağa imkan vermir: "Paşinyanın komandasının münasibətlərini korladığı Rusiya da potensial "xarici siyasət damı" hesab edilmir. Avropalı müşahidəçiləri dəvət etməklə Paşinyan Rusiya ilə münasibətlərdə "qırmızı xətti" keçdi. Onun etiraf etmək cəhdləri heç bir nəticə verməyəcək, çünki Rusiya çox gözəl başa düşür ki, Paşinyanın yenidən seçilməsi onun növbəti 5 il - 2031-ci ilə qədər Ermənistanda hakimiyyətdə qalmasını təmin edəcək".
Beləliklə, Ermənistanda hazırda baş verənlər bu ölkəni daha sürətlə hərtərəfli iflasa doğru aparır. Çünki xarici himayədarları olmadan yaşaya bilmək iqtidarında olan ölkə deyil.
Elçin CƏFƏROV,
"Azərbaycan"
