Ölkəmizin qədim və zəngin tarixə malik şəhərlərindən olan Şamaxı həmişə rəngarəng təbiəti və çoxəsrlik tarixi və mədəni irsi ilə hamını heyran qoyub. Qədim İpək yolunun üstündə yerləşən Şamaxı qərinələr, əsrlər boyu siyasi, elmi və mədəni mərkəzlərdən biri kimi tanınıb. Bu diyar bütün zamanlarda qədimdən qədim olan memarlıq abidələri, ziyarətgahları, xalq sənətkarlığı nümunələri ilə daim diqqət çəkib. İnsanların sevgi və məhəbbətini qazanıb.
Son illər Şamaxıda aparılan abadlıq, quruculuq, tikinti və yenidənqurma işləri şəhəri daha da gözəlləşdirib. Uğurla həyata keçirilən bir-birindən dəyərli layihələr rayonun sosial-iqtisadi göstəricilərinin və əhalinin rifahının yüksəlməsinə də böyük töhfələr verib. Rayon ərazisində sosial infrastruktur obyektləri tikilib, istehsal sahələri yaradılıb, yeni müəssisələr açılıb, yaşıllıq zolaqları genişləndirilib. Yolun kənarları ilə çəkilmiş hündür divarlara çox böyük zövq və səliqə ilə Şamaxıda dünyaya göz açmış Azərbaycanın görkəmli şair və yazıçılarından İmadəddin Nəsiminin, Seyid Əzim Şirvaninin, Mirzə Ələkbər Sabirin, Məhəmməd Hadinin, Abbas Səhhətin və başqalarının büstləri hörülüb. Bu mənzərəyə şəhərə gələnlər çox böyük maraqla baxırlar.
Bu gün Azərbaycan tarixində və mədəniyyətində xüsusi yeri olan Şamaxı özünün ən gözəl çağlarını yaşayır. Rayonda tikinti, quruculuq, şəhərsalma və memarlıq, abadlıq işləri ilə yanaşı, tarixi abidələrə də diqqət və qayğı göstərilir. Pirsaat Baba, Pir Ömər Sultan ziyarətgahları və İmadəddin Nəsiminin qardaşı Şahxəndanın türbəsinin yenidən qurulması çərçivəsində görülən işlər rəğbətlə qarşılanır.
XVIII-XIX əsrlərə aid olan "Yeddi günbəz" abidələri, Pir-Mərdəkan xanəgahı, Göylər kəndindəki XII əsr kurqanları, VIII-XV əsrlərə aid Gülüstan qalası, XII-XV əsrlərə aid Qaleyi-Bəyqurd qalası qədim tarixini özündə qoruyub yaşadır. O da xüsusilə qeyd edilməlidir ki, tikinti-quruculuq işləri aparılarkən abidələrin qədimliyi, milli memarlıq üslubunun mühafizəsinə xüsusi yanaşılır.
Vahid MƏHƏRRƏMOV,
"Azərbaycan"
677jpg_1790033437.jpg)
jpg_1790033330.jpg)
