Serbiya Prezidenti Aleksandr Vuçiç, bu yay vəd etdiyi kimi, istefa verib. Bu qərar erkən prezident seçkilərinin yolunu açır, lakin konstitusiya ilə icazə verilən iki prezidentlik müddətini, demək olar ki, başa vuran ölkə başçısı namizədliyini irəli sürməyəcək. Bunun əvəzinə, o, çox güman ki, oktyabrda keçiriləcək parlament seçkilərindən sonra baş nazir olmağa çalışacaq və faktiki olaraq respublikaya nəzarəti saxlayacaq.
İki həftə əvvəl A.Vuçiç 25 oktyabr seçkilərindən öncə parlamentin buraxılması haqqında fərman imzalayıb. O bildirib ki, Serbiya Tərəqqipərvər Partiyasının (SPP) parlament seçkilərində qalib gəlməsinə kömək edəcək. Şərhçilər A.Vuçiçin seçkilərdən sonra baş nazir olmaq və prezidentliyə mümkün qədər ona sadiq olan bir siyasətçini namizəd göstərmək niyyətində olduğunu ehtimal edirlər.
Serbiya Parlamentinin Sədri Ana Brnabiç seçki kampaniyası və səsvermə zamanı prezident vəzifələrini icra edəcək. Səsvermənin üç aydan gec olmayaraq keçirilməsi planlaşdırılır.
A.Vuçiç bazar günü prezident iqamətgahında keçirilən mətbuat konfransının əvvəlində bəyan edib ki, "qərar qəbul etməyin vaxtı gəlib çatıb və bu gün, əziz vətəndaşlar, istefa verirəm".
Serbiya dövlət televiziyasında canlı yayımlanan çıxışından sonra A.Vuçiç Belqradın mərkəzindəki Prezident Sarayının əsas girişindən çıxıb və tərəfdarlarına müraciət etmək üçün yaxınlıqdakı parka gedib. İstefa verən dövlət başçısı məşəllər, "Ako, serb" ("Aleksandar əsl serbdir" - red.) şüarları və üzərində "Vuçiç siyasi dahidir" yazısı olan plakatlar arasında müvəqqəti kürsüyə qalxıb və izdihama deyib: "Bu iki prezidentlik müddətində sizə sədaqətlə, dürüst və ləyaqətlə xidmət etmişəm".
A.Vuçiç əlavə edib ki, üzvü olduğu partiyanın "binalarımızı yandıran və insanlara silah tuşlayanlardan fərqli olaraq, zorakılığa təhrik etməməsindən" qürur duyur.
Hazırladı:
Rizvan CƏFƏROV,
"Azərbaycan"
jpg_1793190228.jpg)
