“Azərbaycan Respublikası Prezidenti tərəfindən aparılan məqsədyönlü siyasət nəticəsində Naxçıvan Muxtar Respublikası ölkəmiz, ümumilikdə müsəlman-türk dünyası üçün ciddi əhəmiyyət kəsb edərək geosiyasi əhəmiyyətini daha da artırır. 2024-cü ildə Muxtar Respublikada iqtisadiyyatın və idarəetmənin şəffaflaşması fonunda görülmüş işlər nəticə verməkdədir”.
Bu sözləri “Azərbaycan” qəzetinə müsahibəsində Naxçıvan Muxtar Respublikası Dövlət Energetika Xidməti rəisinin müavini Tural Murtuzəliyev bildirib. O bildirib ki, bütün bunlarla yanaşı, Prezident İlham Əliyev muxtar respublikanın sosial-iqtisadi inkişafının yüksəldilməsinə xüsusi diqqət göstərir. Son dövrlərdə Naxçıvan Muxtar Respublikasının inkişafı ilə əlaqədar sosial-iqtisadi islahatlar həyata keçirilir.
Rəis müavini qeyd edib ki, Prezident İlham Əliyevin təsdiq etdiyi “Naxçıvan Muxtar Respublikasının sosial-iqtisadi inkişafına dair 2023–2027-ci illər üçün Dövlət Proqramı” bölgənin hərtərəfli inkişafını hədəfləyir: “Bu proqram infrastruktur, sənaye, kənd təsərrüfatı, turizm və sosial sahələrdə mühüm addımlar atılması üçün konkret addımların cəmidir. Bu dövlət proqramı ölkə tarixində əhatəsinə, nəzərdə tutulan büdcəsinə görə ən böyük dövlət proqramlarından biridir. Bu il də Dövlət Proqramı uğurla icra olunur”.
Tural Murtuzəliyev bildirib ki, Prezident İlham Əliyev tərəfindən Naxçıvana növbəti qayğı Naxçıvanda Sənaye Parkının yaradılması ilə əlaqədər Fərmandır. Yeni sənaye parkının yaradılması ilə bağlı Prezidentin Fərmanı bölgənin sənaye potensialını artırmaq və yeni iş yerlərinin açılmasını təmin etmək məqsədi daşıyır. Sənaye parkları, həmçinin yerli istehsalın artırılmasına və xarici investisiyaların cəlb edilməsinə şərait yaradacaq. Bu sənaye parkı, xüsusilə kiçik və orta biznesin inkişafını dəstəkləyəcək və bölgənin iqtisadiyyatının şaxələndirilməsini təmin edəcək.
Xidmət rəsmisi deyib ki, Naxçıvanın blokada şəraitində yerləşməsi təbii ki, müəyyən çətinliklər yaradıb, amma muxtar respublikanın İran və Türkiyə üzərindən beynəlxalq bazarlara çıxışı Sənaye Parkında yaradılacaq müəssisələri ciddi imkanlarla təmin edə bilər.
Naxçıvanda yeni İstilik Elektrik Stansiyasının tikintisinə dair Sərəncamın böyük əhəmiyyətə malik olduğunu vurğulayan rəis müavini bildirib ki, qiymətləndirməyə görə, bu, muxtar respublikada icra olunacaq ən irihəcmli layihədir: “İstilik Elektrik Stansiyasının iki əsas faydası olacaq. Birincisi, muxtar respublikanın enerji dayanıqlılığı tam təmin olunacaq, bütün hallarda enerji təminatının tam müstəqilliyi bərpa olunacaq. İkinci əsas məsələ isə muxtar respublikada alternativ və bərpaolunan enerji potensialının istifadə olunması üçün balans rolunu oynayacaq. Bu, Naxçıvanın enerji ixracını təmin etmək üçün birbaşa dəstəkdir. İxracı nəzərdə tutulan enerjinin çaylarda suyun az olduğu, günəşli saatların olmadığı dövrdə enerji təchizatında əvəzolunmaz rol oynayacaq”.
Tural Murtuzəliyev qeyd edib ki, Prezidentin “Elektrik enerjisi və su təchizatı sahələrində idarəetmənin təkmilləşdirilməsi və bununla əlaqədar bəzi məsələlərin tənzimlənməsi haqqında haqqında” Fərmanı da muxtar respublikada enerji təhlükəsizliyinin gücləndirilməsi, su təchizatının dayanıqlılığının artırılması, eyni zamanda, infrastrukturun modernləşdirilməsinə ciddi töhfə verəcək. Bu, həmçinin muxtar respublikanın ölkənin əsas enerji sisteminə qoşulmasının və ixracın təmin olunmasının ən əhəmiyyətli addımlarından biridir.
Əsmər QARDAŞXANOVA,
“Azərbaycan”
