Prezident İlham Əliyev, doğrudan da, tarixi şəxsiyyətdir.

Bunu Trend BİA, CBC kanalı və AzTV dövlət televiziyasına müsahibəsində Rusiya Dövlət Dumasının Beynəlxalq Əlaqələr Komitəsinin rəhbəri, Rusiya Liberal Demokrat Partiyasının (LDPR) sədri Leonid Slutski deyib.

O qeyd edib ki, Azərbaycan Rusiyanın xarici siyasətində getdikcə daha da əhəmiyyətli yer tutur.

"Azərbaycanın Prezidenti, mənim qardaşım İlham Əliyev - Rusiya Prezidenti Vladimir Putinin yalnız postsovet məkanı və qonşu ölkələrdə deyil, ümumiyyətlə, ən etibarlı tərəfdaşlarından biridir. Azərbaycanda Rusiya kapitallı və Rusiya investisiyalı 1270 müəssisə fəaliyyət göstərir. İqtisadi əməkdaşlıq durmadan artır - ölkələrimiz arasında ticarət dövriyyəsi artıq 4,5 milyard ABŞ dollarına çatıb. Bu, böyük rəqəmdir, lakin mümkün ola biləcəkdən uzaqdır", - deyə o bildirib.

Onun sözlərinə görə, ikitərəfli infrastruktur layihələrinin sayı da artır.

"O ki qaldı dünya siyasətinin gələcəyinə, beynəlxalq münasibətlər sisteminə və indi olduğumuz regiona, bizim ümumi cəhətlərimiz çoxdur. Əvvəla, baxışımız, bunu Şuşada olarkən səsləndimək xüsusi əhəmiyyət kəsb edir, hər bir ölkə, onun xalqı, adət-ənənəsi, tarixi, mədəniyyəti, dini, milli dili, bütün bunların hər biri dövlət üçün ayrıca güc, təsir, qərar qəbuletmə qütbünə çevriləcək. Və hər bir suveren dövlət öz inkişafı ilə bağlı qərarları müstəqil qəbul edəcək - nə Vaşinqton, nə Brüssel. Təkqütblü dünya ideyası, dağıdıcı və zərərli bir yanaşmadır və artıq öz dönüş nöqtəsini keçib. Bu, baş verməyəcək", - deyə L.Slutski qeyd edib.

O vurğulayıb ki, bugünkü Azərbaycan, onun lideri Prezident İlham Əliyev bir çox həll edilməz görünən problemləri aşıb.

"Yoxsulluqla mübarizə proqramı uğurla həyata keçirilib, Azərbaycan çoxdan enerji baxımından da müstəqil dövlətə çevrilib, həm Bakı Humanitar Forumunun, həm də Birinci Avropa Oyunlarının paytaxtı oldu. Bundan əlavə, Birinci xanım Mehriban Əliyevanın rəhbərlik etdiyi Heydər Əliyev Fondu tərəfindən çoxlu humanitar layihələr, hər bir Azərbaycan ailəsinin rifahına yönəlmiş həm iqtisadi, həm humanitar sosial siyasət proqramları həyata keçirilir.

Mənim kimi qəlbində, ruhunda Azərbaycanla yaşayanlar, həqiqətən də, Azərbaycanı hansısa başqa ölkə ilə deyil, bir müddət əvvəl həmin Azərbaycanla müqayisə edə bilər, Azərbaycan torpağında, bizə qardaş olan Azərbaycan xalqı ilə necə bənzərsiz dəyişikliklərin baş verdiyini görə bilər. Beləliklə, deyəcəyim əsas məsələ odur ki, bizlər və bu gün yaşayan hər kəs, kim ki, Azərbaycanı ürəyində və ruhunda daşıyır, eyni zamanda, siyasi məsələlərdə Cənubi Qafqazın inkişafı ilə bağlı sağlam düşüncədən irəliləyir, bu, bir işarədir: Prezident İlham Əliyev öz ulu atasının əsas vəsiyyətini yerinə yetirərək, Qarabağı azad etdi", - deyə o bildirib.

Slutski qeyd edib ki, bu torpaqlarda bir çox unikal strateji layihələrin, o cümlədən, elmi layihələrin həyata keçiriləcəyi, bu gün hələ də fantastik görünən bir çox klasterlərin yaxın illərdə burada reallaşacağı gözlənilir.

"Burada minlərlə yeni iş yeri yaradılacaq. Qarabağ torpağı Azərbaycanın tərkibində, tarixi olaraq həmişə olduğu kimi, yenidən firavan bir yerə çevriləcək. İnsanlar buraya axın edəcək. Əlbəttə ki, Azərbaycanın mədəniyyət paytaxtı olan Şuşada olarkən, xüsusi duyğular keçirirəm. Şuşa mədəniyyət xadimlərinin həyatları ilə sıx bağlıdır. Onlarla bağlı Azərbaycan tarixinin ayrılmaz bir hissəsidir. Qüdrətli Bülbül burada, Şuşada anadan olub. Bu gün isə onun oğlu Polad Bülbüloğlu məhz bu ərazidən Milli Məclisin deputatıdır. O, 18 il Azərbaycanın mədəniyyət naziri olub, 18 il Moskvanı Azərbaycanın səfiri kimi bəzəyib. Və indi o, buradadır, mənimlədir. Buradan Bülbülün ev-muzeyinə gedəcəyik; mən uzun zamandır oraya getməyi arzulayırdım. Və əlbəttə ki, Prezident İlham Əliyevə təşəkkür etməliyik. O, həqiqətən, tarixi şəxsiyyətdir. O, bizim üçün nəinki ən etibarlı tərəfdaş, nəinki Azərbaycanın lideridir, o, eyni zamanda, qeyri-mümkün kimi görünən məsələni həll edə bildi - Qarabağ azad edildi. İndi isə Azərbaycanın mədəniyyət paytaxtı, məşhur, əfsanəvi şəhər olan Şuşada fəxrlə deyə bilərik ki, Qarabağ Azərbaycandır!", - o deyib.

Slutski əlavə edib ki, 2 ölkənin prezidentləri getdikcə daha çox görüşürlər.

"Oktyabr ayında onlar 2 dəfə görüşəcəklər - 8 oktyabr tarixində MDB dövlət başçıları Şurasında, daha sonra isə Kazan BRICS sammitində. Azərbaycanın BRICS-ə üzv olmaq üçün etdiyi müraciət bizim üçün əhəmiyyətli bir göstəricidir, çünki bu, bugünkü qlobal məkanda ən güclü inteqrasiya bloku olaraq diqqət çəkir. İcazə verin, BRICS-in önümüzdəki onillikdə güclənəcəyini söyləyim. Bu il BRICS-də Rusiya nümayəndəliyi, gələcək Kazan BRICS sammitində qəbul edilməsi gözlənilən məsələlər üçün bir əlamətdir. Artıq 34 ölkə və onların liderləri bu sammitə qatılmaq üçün müraciət edib. Həqiqətən, orada əsaslı qərarlar qəbul ediləcək", - o deyib.

Slutski BRICS-in öz parlament assambleyasının və ya parlament forumunun formalaşmasına yaxın olduğunu düşünür.

"Amma bunu tələsdirməyək. Əsas odur ki, BRICS-in müasir mərhələdə inkişafı üçün əsas qərarlar Kazan şəhərində qəbul ediləcək. Bizim üçün əhəmiyyətli olan, Azərbaycan Prezidentinin bu işdə, gözlədiyimiz kimi, iştirak etməsidir", - o əlavə edib.

Slutski qeyd edib ki, Azərbaycanın inkişaf edən bir iqtisadiyyatı var.

"Azərbaycan bugünkü Azərbaycanı anlamağa və qəbul etməyə hazır olan hər kəslə əməkdaşlığa açıq olan dövlətdir. Unikal mədəniyyət, unikal rəhbərlik! Mən bunu xoş söz demək naminə deyil, bir müddət əvvəl Azərbaycana müəyyən dərəcədə pessimist baxan bir çox ölkələrin artıq qəbul etdiyi kimi qəbul etdiyim üçün deyirəm", - o deyib.

Slutski vurğulayıb ki, bu gün Azərbaycanda milli iqtisadiyyatın inkişaf sürəti heyranedicidir.

"Bu səbəbdən BRICS çərçivəsində logistika, yanacaq-enerji kompleksi və maliyyə sahələrində infrastruktur baxımından əhəmiyyətli layihələr gözləyir. Proqnoz verməyək. Əslində, bunların hamısı bizim gözlədiyimizdən daha tez reallaşacaq. Azərbaycan BRICS-ə fəal şəkildə qoşulmağa hazırdır. Azərbaycan bu planetin ən iri və sürətlə inkişaf edən inteqrasiya blokunun bir hissəsi olaraq, yük olmayacaq, əksinə, onun öncüllərindən biri olacaq. BRİCS üçün də Azərbaycan iqtisadiyyatının bu məkana qoşulması güclü, sürətli inkişaf vəd edir. Ona görə də Kazanda keçiriləcək BRICS sammiti (bu ilin oktyabrında - qeyd) bir çox ölkələr üçün və əminəm ki, sevimli Azərbaycanımız üçün, həqiqətən də, əlamətdar olacaq", - deyə L.Slutski bildirib.

"Ümid edirəm ki, yaxın gələcəkdə Azərbaycan və Ermənistan arasında sülh müqaviləsi imzalanacaq və kontrterror əməliyyatlarının nəticələrini nəzərə alaraq, Qarabağın siyasi xəritədə bundan sonra daimi olaraq Azərbaycanın tərkibinə qayıtması ilə Ermənistanın Konstitusiyasına müvafiq dəyişikliklər ediləcək ki, sülh müqaviləsinin imzalanması mümkün olsun.

Və Cənubi Qafqazda baş verəcək digər bir çox hadisələrdə, əminəm ki, bütün Cənubi Qafqaz xalqlarının gücləri sülh istiqamətində atılan addımlarda bir araya gələcək, Rusiya və onun prezidenti Vladimir Vladimiroviç Putin hər zaman bunun tərəfdarı olub. O, tarixi ədalətin bərpası üçün çox şey edib, çox çalışıb. Mən evə, Qarabağa qayıdan, hələ də qayıtmağı planlaşdıran hər kəsi təbrik etmək istəyirəm. Heç nədən qorxmaq lazım deyil. Burada iş yerləri yaradılacaq və bu, yenidən doğma Azərbaycanın tərkibindəki Qarabağ torpağı olacaq və artıq belədir", - o deyib.

Daha sonra, Azərbaycanın ümummilli lideri Heydər Əliyevin Baykal-Amur Magistralının inşasındakı rolunu vurğulayan L.Slutski indiki Azərbaycan dövlətinin qurucusu olan Heydər Əliyevin, Sovet dövründə, o cümlədən, SSRİ Nazirlər Sovetinin birinci müavini olduğu dövrdə, həmin proqramların, layihələrin və tapşırıqların reallaşmasına öz gücünü sərf etdiyini bildirib. Bunlar indiyə qədər tarixi və əfsanəvi rol oynayır.

"Baykal-Amur Magistralı, ilk könüllülərin 1974-cü ildə komsomol qurultayı zamanı inşaya yola çıxdığı, 10 il sonra isə inşanın tamamlandığı bir layihədir. "Qızıl" birləşmə – unudulmaz bir hadisədir. Briqadirlər, Aleksandr Bondar və İlya Varşavski, bu "qızıl" birləşməyə doğru irəliləyirdilər. Heydər Əliyev burada unikal bir rol oynadı. Demək olar ki, o, layihənin koordinatoru, kuratoru və rəhbəri idi. Təbii ki, “Bamstroy”un rəhbəri Sosialist Əməyi Qəhrəmanı, həm də əfsanəvi insan Yefim Vladimiroviç Basin idi. Əgər belə demək olarsa, ən yüksək koordinasiyanı Heydər Əliyev həyata keçirib. O vaxt indiki bir çox ciddi rəhbərlər, o cümlədən, 8 il Rusiya Federasiyasının nəqliyyat naziri olmuş, indi isə Rusiya prezidentinin müşaviri olan İqor Yevgenieviç Levitin - BAM-da işləyirdi. Levitin sadəcə hərbi komendaturanın əməkdaşı olsa da, illər sonra Heydər Əliyev onu tanıdı. Heydər Əliyev Baykal-Amur magistralının tikintisinə çox vaxt keçirirdi. O, layihəyə Moskvadan deyil, tikinti yerində rəhbərlik edirdi", - o deyib.

Slutski vurğulayıb ki, Heydər Əliyev sayəsində BAM qısa müddətdə tamamlanıb.

"10 il, görünür, kifayət qədər uzun bir müddətdir. Lakin, əslində, o dövr üçün inşaatın həcmi fantastik dərəcədə böyük idi. Bununla yanaşı, BAM açıldı. BAM hələ də mövcuddur və bizim dəmir yolu sistemimizin, indiki Rusiyanın ən mühüm komponentidir. Buna görə də BAM-ın inşası ilə bağlı olan hər kəs sağdır, onlar bizimlədir, onlar bizim genofondumuzdur, biz onlarla qürur duyuruq. Prezident İlham Əliyevə, BAM veteranlarını burada, Bakıda topladığı üçün böyük minnətdarlıq edirəm. Onlar birlikdə Heydər Əliyev məzarını ziyarət etdilər, onun xatirəsinə baş əydilər. Bu, böyük lider, Azərbaycan xalqının ulu öndəri Heydər Əliyevin xatirəsi üçün əlamətdardır. Beləliklə, burada Heydər Əliyevin rolu tamamilə unikaldır. BAM-la əlaqəli olan hər kəs, onların övladları, nəsli həmişə BAM-ın tikintisini xatırlayarkən Heydər Əliyevi də xatırlayacaqlar", – o deyib.

Slutski ötən il Azərbaycan Silahlı Qüvvələrinin Qarabağda həyata keçirdiyi antiterror tədbirlərinin əhəmiyyətindən də danışıb.

"Prezident İlham Əliyev yalnız uğurlu antiterror əməliyyatını həyata keçirən bir hərbi lider kimi özünü göstərmədi. Heç kimi incitmək istəmirik. Nə baş veribsə, baş verib və bu, çoxdan baş verməli idi. 90-cı illərdə Key-Ueste, Floridada danışıqlar aparılıb. 2009-cu ilin əvvəllərində Madrid prinsipləri müzakirə edilib, lakin təəssüf ki, bunların heç biri həyata keçirilmədi. Buna görə də Qarabağın azad edilməsi üçün məhz o antiterror əməliyyatı lazım idi. Biz bölgədəki bütün ölkələri, o cümlədən, Türkiyəni hörmətlə qarşılayırıq, lakin Qarabağın azad olunması Azərbaycanın, Azərbaycan xalqının, Prezident İlham Əliyevin, Azərbaycan ordusunun, Qarabağın azadlığı uğrunda qan tökənlərin uğurudur. İndi isə, mədəniyyət paytaxtı olan bu əfsanəvi şəhərdəyəm. Ümid edirəm ki, bu, sonuncu ziyarətim olmayacaq. Yenidən Şuşa mərkəzində olmaqla, uzun illər Qarabağın azadlığını gözləyən, Azərbaycanın sərhədindən kənarda yaşayan bütün azərbaycanlılara, Prezident İlham Əliyevə bu unikallığına görə təşəkkür edərək müraciət edirəm. Həmin antiterror əməliyyatı, bütün sağlam düşüncəyə malik olanlar üçün, təkqütblü dünyaya qarşı olanlar üçün, çoxqütblü beynəlxalq münasibətlər sistemini dəstəkləyənlər üçün, harada ki, hər bir ölkə öz gələcəyini müəyyən etməyə qadir olacaq. Qarabağ Azərbaycandır!", – o deyib.

Bundan əlavə, Slutski Ermənistanda anti-Rusiya əhval-ruhiyyəsinin region üçün risklərindən danışıb.

"Ermənistanda çox dostum var və orada məni eşidənlərə demək istərdim ki, bu, təhlükəli tendensiyalardır. Millətlərarası münasibətlərlə oynamaq lazım deyil. Sözlə bağlı olan qohumluq sözü doğurur, qanla bağlı olan qohumluq qan doğurur. Bu təhlükəli oyunlara daxil olmamalıyıq", - o deyib.

Slutski yaxın gələcəkdə Azərbaycan və Ermənistan arasında sülh sazişinin imzalanacağını ümid etdiyini bildirib. O vurğulayıb ki, antiterror əməliyyatının nəticələrini və Qarabağın Azərbaycanın siyasi xəritəsinə daimi olaraq geri qaytarılmasını nəzərə alaraq, Ermənistanın Konstitusiyasında müvafiq dəyişikliklərin edilməli olduğunu qeyd edib.

"Və Cənubi Qafqazda baş verəcək bir çox digər hadisələr, əminəm ki, Cənubi Qafqazın bütün xalqları tərəfindən sülh yolunda mübarizə sistemində baş verəcək. Bu, hər zaman Rusiya və onun prezidenti Vladimir Vladimiroviç Putinin dəstəklədiyi bir hədəfdir, o, bu çox çətin, tarixi bir torpaqda tarixi ədalətin bərpa olunması üçün çox şey edib. Evinə, Qarabağa qayıdan, geri dönməyə planlaşdıran hər kəsi təbrik edirəm. Qorxmağa heç bir səbəbiniz yoxdur. Burada iş yerləri yaradılacaq və Qarabağ yenidən, artıq, öz doğma Azərbaycanın bir parçası olacaq və belədir", - o deyib.

Slutski Azərbaycanın Rusiya və Qərb ölkələri arasında dialoq üçün platforma ola biləcəyi sualına cavab olaraq, Azərbaycanın istənilən proseslər üçün müzakirə platforması ola biləcəyini vurğulayıb.

"Mən heç bir şeyin əvvəlcədən olmasını istəmirəm. Bundan əlavə, bu, mənim səlahiyyətimdə deyil. Ancaq Azərbaycanın regional və qlobal siyasətin ən mürəkkəb məsələlərinə münasibətdə ağıllı və ölçülü yanaşması ilə istənilən müzakirələrlə bağlı müzakirə platforması olma potensialı var. Mən Ukrayna ilə müzakirələrə skeptik yanaşıram. Eyni zamanda, istənilən hərbi qarşıdurma bir gün müzakirələrlə başa çatır və sülh ilə nəticələnir. Əks təqdirdə, insanlığı nüvə silahı ilə açıq hərbi qarşıdurmaya yönəldənlər qalib gələcəklər. Bunun baş verməsi mümkün deyil. Bu gün Rusiya prezidentinin ideyası və prinsipləri ətrafında, tam şəkildə Azərbaycan rəhbərliyi ilə birlikdə 21-ci əsrdə sülh, sabitlik və inkişaf etmiş dünya memarlığı uğrunda, hər bir ölkənin suverenliyi və ərazi bütövlüyü uğrunda mübarizə gedir. Bu yanaşmanı bütün dünyada daha çox ölkə bölüşür. Əslində, gözlərimizin önündə və iştirakımızla yeni qlobal əksəriyyət formalaşır. Bu, ingilis-sakson dünyası deyil, hansı ki, təəssüf ki, əksəriyyəti Vaşinqtonda mərkəzləşən təkqütblü dünya nizamı haqqında destruktiv ideyaları qəbul edir. Bu, bir daha təkrar edirəm, olmayacaq. Avropa ölkələrinin, o cümlədən, Slovakiya, Macarıstan, Niderland bir-birinin ardınca Rusiya ilə, 21-ci əsrdə çoxqütblü dünya nizamı uğrunda normal əməkdaşlığa qoşulurlar. Və şübhəsiz ki, yeni əsrin çoxqütblü memarlığında bizim ölkələr əhəmiyyətli rol oynayacaq, çünki Moskvadan və Bakıdan sağlam məntiq, sülhə, xeyirxahlığa və bu sağlam məntiqi qəbul edənlərin dəstəklənməsinə yönələn bir hərəkət çıxır", - o deyib.

Slutski bir daha bütün azərbaycanlıları, harada olsalar da, burada, Şuşanın əfsanəvi torpağında Qarabağın azad edilməsi münasibətilə təbrik edib.

"Bu hadisənin tarixi əhəmiyyətini vurğulamamaq mümkün deyil. Hamımıza qardaş ölkəmiz Azərbaycan üçün, xalqlarımızın xeyrinə, ölkələrimizin firavanlığına, şübhəsiz ki, burada olduğumuz ərazinin, yəni azad olunan bu torpağın xeyrinə sürətli və məhsuldar əməkdaşlıq arzulayaq. Bu ərazi üçün yeganə yol qardaş Azərbaycanın bütün inkişafının vektorudur. Bu, hər bir ailənin və hər bir insanın qayğısıdır. Bu, milli iqtisadiyyatın, sosial siyasətin, humanitar layihələrin inkişafıdır. Bu, milli rifah yoludur", - o deyib.

Slutski Qarabağdakı işğal illərindəki dağıntıların nəticələri və indiki bərpa işləri ilə tanış olduqdan sonra təəssüratlarını bölüşüb.

"Çətindir. Bu dağıntıların həcmini görürəm. Burada baş verən hər şeyi anlayıram və bilirəm. Biz Şuşanın mərkəzi meydanında, əvvəlcə dağıdılmış, indi isə bərpa edilmiş abidələrin arasındayıq. Bu bərpa edilmiş abidələr – bugünkü Qarabağın, doğma Azərbaycanımızın tərkibində olan Qarabağın dirçəlişinin simvoludur. Keçmişdə baş verənlər tarixə qovuşdu. İndi vəzifə yalnız yaşayış məntəqələrini, yolları bərpa etmək deyil. Bu günün vəzifəsi insanlara tam və dolğun həyat üçün şərait yaratmaq, iş yerləri açmaq, tam mənada dağıdılmış infrastrukturu bərpa etməkdir; bu, yollar, logistika, Araz boyunca olan yollardan başlayır. Artıq, əslində, 2 beynəlxalq hava limanı - Füzuli və Zəngilan bərpa edilib. Daha bir hava limanı inşa olunur. Bu gün baş verən hər şey Prezident İlham Əliyevin rəhbərliyi altında həyata keçirilir. O, şəxsən Qarabağın infrastrukturunun bərpasını, iqtisadiyyatının dirçəlişini, yeni iş yerlərinin yaradılmasını nəzarət edir və rəhbərlik edir. Bütün bunlar sürətlə baş verir", - o deyib.

Slutski vurğulayıb ki, burada hər şeyin inkişaf etdiyi və böyüdüyü təəssüratı, hətta bir il əvvəlki gözləntilərdən daha sürətli baş verir.

"Amma daha çox iş görülməlidir. Müasir elmyönümlü klasterlərin yaradılması, bura bir sıra mürəkkəb, yenə də yüksək texnologiyalı, elmyönümlü istehsalatların köçürülməsi də daxil olmaqla, görüləcək işlər var. Bütün bunlar həyata keçiriləcək. Bunu, əgər istəyiriksə, mütləq edəcəyik. Bu, Rusiya, rus sərmayələri və rus biznesinin iştirakı ilə olacaq. Qarabağ – rifahdır. Qarabağ – dirçəlişdir! Lakin bunların hamısı hələ gələcəkdədir. Bunu bərpa etmək, buna nail olmaq lazımdır. Amma əminəm ki, bir neçə il ərzində dediklərim reallığa çevriləcək.

Qarabağın dirçəlişi, bir daha vurğulayıram, xarabalıqlardan çiçəklənməyə doğru daha sürətlə gedir, necə ki, bu, ehtimal edilirdi. Heç bir ölkə tamamilə dağıntıdan belə sürətli və effektiv çıxmadı, necə ki, bugünkü Qarabağ çıxır. Ona görə də necə var, elə də demək istəyirəm. Qayıdın. Qarabağ sizi gözləyir. Qarabağ – gələcəyin ərazisidir", - o, sözlərini tamamlayıb.