Ermənistanda siyasi müstəvidə müşahidə edilən qütbləşmə getdikcə dərinləşməkdədir. Bütün bunların fonunda Moskva ilə İrəvan arasında vəziyyət daha da kritik hədd alıb. Yəni Ermənistanda anti-Rusiya ab-havası zaman keçdikcə daha da güclənir. 

İrəvan düşdüyü vəziyyətə görə bir çox xarici dövləti, o cümlədən də əsas müttəfiqi olan Rusiyanı ittiham edir. Elə buna görədir ki, bütün istiqamətlərdə Rusiyanın maraqlarına uyğun gəlməyən daha da sərt addımlar atır.

Göründüyü qədərilə rəsmi İrəvan hərbi müttəfiqi Rusiyaya qarşı çıxaraq Qərbin verdiyi vədlərə güvənir.  Hər halda Paşinyan hakimiyyətinin nümayiş etdirdiyi xarici siyasətlə konkret seçim etdiyi görünür. 

Bunun nəticəsi olaraq ötən gün rəsmi şəkildə məlum olub ki, ABŞ hökuməti Ermənistana 20 milyon dollar verəcək. "Joğovurd" nəşrinin yazdığına görə, bu, böyük məbləğ kimi görünsə də, Nikol Paşinyan hakimiyyətinin uğursuzluqları fonunda azalmaqdadır. Qeyd edilib ki, ABŞ Dövlət katibi Entoni Blinken və USAID-in rəhbəri Samanta Pauer ABŞ-nin Ermənistana 20 milyon 600 min dollar yardım edəcəyini açıqlayıblar. 20 milyon 600 min dollar təqribən 7 milyard 981 milyon drama ekvivalentdir. 

Nəşr yazıb ki, ABŞ-nin Ermənistana bu qədər yardım göndərməsi yaxşı haldır, lakin hökumətin bu pulları necə istifadə edəcəyi çox şübhəlidir: "Ermənistan hökumətinin qərarına əsasən, 2019-cu ilin may ayında "Ermənistanın Dövlət Maraqları Fondu" QSC (ANİF) yaradılıb, onun layihələri üçün Ermənistanın dövlət büdcəsindən 4 milyard 734 milyon dram, təxminən 13 milyon dollar investisiya qoyulub. Yəni dövlət külli miqdarda sərmayə qoyub, bu, uğursuz olub və 5 ildən sonra dövlət öhdəliklərini ödəmək üçün ANİF-ə təmənnasız olaraq daha 1 milyard 700 milyon dram ayırıb. Başqa sözlə, ANİF 13 milyon dollar sərmayə ilə açıldıqdan sonra 5 il faydasız fəaliyyət göstərib və daha 5 milyon dollar ayrılıb ki, ləğv olunsun". 

Politoloq Suren Surenyants isə qeyd edib ki, Paşinyan hər sözü ilə həyasızlığın hədd-hüdudunun olmadığını təsdiq edir. O, 44 günlük müharibənin 4-cü ildönümünün yalnız ertəsi günü Yerablurda olub. Lakin o, susmaq əvəzinə yenidən danışıb. "Ölən erməni əsgərləri bizim üçün yeni imkan yaratdı", - deyə Paşinyan burada belə bir cümlə işlədib. 

Deyəsən, revanşist politoloqu özündən çıxaran elə bu sözlər olub. "Bu səfehin (Paşinyanı nəzərdə tutur - red.) xəstə təxəyyülünə görə, fəlakət gətirən müharibə ermənilərə dövlətlərinə sahib olmaq üçün yeni imkan verib. Eyni məntiqlə Paşinyan 27 sentyabrı, 9 noyabrı Ermənistan dövlətçiliyinin bərpası günləri elan etməlidir. Reallıq isə tamamilə bunun əksidir: Paşinyan müharibədən əvvəlki siyasəti ilə savaşı bizim qapıya gətirdi və Ermənistanın subyektivliyinin ləğvinə səbəb oldu", - deyə Surenyants qeyd edib.

Bu arada erməni analitik Karen Naumyan deyib ki, Paşinyan hakimiyyəti Rusiyaya qarşı atdığı addımlarla Moskvaya qara bir "quş" qoydu, digər tərəfdən də dünyaya Ermənistanı Qərbə doğru çevirdiklərini göstərdi. Ermənistan vasitəsilə regiona nüfuz edən Qərb Rusiyanı sıxışdırıb çıxarmaq kimi geosiyasi məqsədlərini həyata keçirir: "Bəs İrəvanın xarici siyasətini Moskvadan Brüsselə dəyişməsində günahkar kimdir? 44 günlük müharibədə və ondan sonrakı dövrdə Ermənistana xəyanət edən yalnız Rusiyanın özüdür. Kreml Azərbaycan və Türkiyəni razı salmaq üçün regionda yeganə müttəfiqinin maraqlarını heçə saydı. Doğrudanmı, Moskva bu qədər sadəlövh idi ki, İrəvanda heç bir əks tədbir görülməyəcəyini düşünürdü? Hətta küncə sıxışdırılmış siçan vəhşi heyvana çevrilir. Təbii ki, Rusiyanın hələ də Ermənistana qarşı çoxlu təzyiq rıçaqları var". 

Beləliklə, Ermənistanda hazırda baş verənlər bu ölkəni daha sürətlə hərtərəfli iflasa doğru aparır. Çünki İrəvan xarici himayədarları olmadan yaşaya bilmək iqtidarında deyil.

Elçin CƏFƏROV,

"Azərbaycan"