Biləsuvarlı fermerlər taxıl səpinini sürətləndirirlər
Payızdır - barlı-bəhərli payız. İndi həm də kənd adamlarının üzünün güldüyü, eyninin açıldığı fəsildir. Məhsul yığımı dövrüdür axı...
Pambıq tarlaları da səs-küylüdür. Yaşıl rəngli "Conder" markalı maşınlar dayanmaq bilmədən işləyir, qoşqulu traktorlar yığılan pambığı tədarük məntəqələrinə daşıyır. Lakin sahələrdə iş bununla bitmir. Payız həm də əkin fəsli olduğundan fermerlər bu işi də optimal müddətdə başa çatdırmağa çalışırlar. Bir tərəfdə şum qaldırılır, digər tərəfdə torpağa mala çəkilir, başqa bir tərəfdə isə toxum səpilir.
Kənd təsərrüfatında bütün işlər kimi, taxıl səpini də böyük diqqət tələb edir. Gərək şumdan tutmuş məhsul yığımınadək hər bir aqrotexniki tədbiri vaxtında və keyfiyyətlə görəsən. Biləsuvar rayonunun fermerləri bu işdə zəngin təcrübəyə malikdirlər. Cari il biləsuvarlılar 32 min 324 hektar sahənin hər hektarından 28 sentner arpa və 32,2 sentner buğda biçmişlər. Muğan şəraiti üçün bunlar yaxşı göstərici hesab olunur. Taxıl əkən fermerlər hazırda gələn ilin məhsulunun əsasını qoyurlar. Onlar hələ yay aylarında kifayət qədər yüksək reproduksiyalı elit toxum tədarük etmişlər. Bunun üçün heç də uzağa getməmişlər. Payondakı toxumçuluq təsərrüfatları onlara yaxından kömək göstərmişlər.
Rayon üzrə gələn ilin məhsulu üçün təxminən keçən ildəki qədər, yəni 32 min hektarda arpa və buğda əkilməsi nəzərdə tutulur. Artıq 5 min hektarda "Cəlilabad-19", "Qarabağ-22", "Dəyanətli" sortlarından olan arpa toxumu səpilmişdir. Əkinə 204 şum traktoru, 86 toxumsəpən aqreqat, 87 mala və 116 kotan cəlb edilmişdir. Texnikalar vaxtında saz hala gətirildiyindən iş prosesində, demək olar ki, ləngimələr yoxdur.
Biləsuvarda təcrübəli, işgüzar fermerlər çoxdur. Onlardan biri də Lətif Cəfərovdur. Yaşının 85-i keçməsinə baxmayaraq, cavanlardan heç də geri qalmır. Lətif kişi deyir ki, ağlı kəsəndən kənd təsərrüfatı sahəsində çalışır. Kolxoz zamanı uzun müddət aqronom, briqadir vəzifələrində çalışıb. Odur ki, yüksək məhsul götürməyin şərtlərini bilir. Bilir ki, növbəli əkinin tətbiqi, məhsuldar və sağlam toxum əkilməsi, aqrotexniki tədbirlərin düzgün aparılması, gübrələrin normada nəzərdə tutulduğu qədər verilməsi, suvarmanın, alaq otlarına və ziyanvericilərə qarşı mübarizə tədbirlərinin vaxtında həyata keçirilməsi bol məhsulun qaçılmaz tələbləridir. Elə ona görədir ki, bu qocaman fermer oğlanlarının köməyi ilə əkib-becərdiyi taxıl və pambıq sahələrindən hər il yüksək məhsul əldə edir.
S.CAVADOV,
"Azərbaycan"
jpg_1773246892.jpg)
