Ermənistan "sülh kəsişməsi" adlı layihəni irəli sürərək diqqəti yayındırmağa çalışır
"Avropa İttifaqının (Aİ) mülki missiyasının vaxtının bir neçə gün öncə daha iki il müddətinə uzadılması Ermənistanın qeyri-səmimiliyindən, sülhdə maraqlı olmamasından xəbər verir. 2022-ci ildə iki aylıq müddətə yaradılmış Aİ-nin Ermənistan-Azərbaycan sərhədindəki missiyasının müddəti bitdikdən sonra Fransanın öncüllüyündə və Azərbaycan tərəfinin razılığı olmadan ona 20 fevral 2023-cü ildən etibarən iki il müddətinə mandat verilib".
Bu sözləri "Azərbaycan" qəzetinə Milli Məclisin deputatı Pərvanə Vəliyeva deyib. O bildirib ki, Aİ Xarici İşlər Nazirləri Şurasının 11 dekabr 2023-cü ildəki iclasında Fransanın təşəbbüsü ilə təşkilatın Ermənistandakı missiyasının şəxsi heyətinin sayının 138-dən 209-a qaldırılması barədə qərar qəbul edilib. Fransa ölkəmizə qarşı olan bu "binokl diplomatiyası"nın əsas təşəbbüskarıdır. Ermənistanın sülhə maraqlı olmamasına digər bir sübut hərbi yardım üçün Qərbin bir sıra ölkələrinə müraciət etməsidir. 22 iyul 2024-cü ildə Avropa İttifaqı Şurası Avropa Sülh Fondundan (EPF) Ermənistan silahlı qüvvələrinə 10 milyon avro dəyərində yardım paketi qəbul edilib. 21-27 oktyabr 2022-ci ildə Ermənistan hökumətinin dəvəti və Fransanın ciddi dəstəyi əsasında ATƏT tərəfindən bu ölkəyə "ehtiyacların qiymətləndirilməsi heyəti" göndərilib.
"Fransanın müvafiq şirkətləri ilə Ermənistan rəhbərliyi arasında snayper tüfənglərinin alınmasına dair saziş imzalanıb. Fransa və Ermənistan nazirlərinin 2023 və 2024-cü illərdəki görüşlərində müdafiə islahatları kontekstində, hərbi məsələlər üzrə fransalı müşavirin Ermənistan Müdafiə Nazirliyinə ezam olunduğu bildirilib. 17 iyun 2024-cü ildə Ermənistan müdafiə nazirinin Fransaya səfəri zamanı hərbi sahədə yeni müqavilələr imzalanıb. Bu silah və sursat, həmçinin xeyli sayda tank əleyhinə sistemlərin bir hissəsi artıq Ermənistana çatdırılıb", - deyə o əlavə edib.
Deputat qeyd edib ki, bu kimi onlarla fakt mövcuddur və Fransanın Ermənistana 2023-cü il üzrə hərbi yardımı milyon dollarla ölçülüb. Bu silahlanmanın məqsədi Ermənistan rəhbərliyini və xalqını revanşizm ideyaları ilə bəsləmək, Cənubi Qafqazda sabitliyi pozmaq, bitmiş münaqişəni alovlandırmaqdan ibarətdir. Bundan başqa, Fransanın Ermənistandakı səfiri mütəmadi olaraq Ermənistan-Azərbaycan şərti sərhədinə gələrək ölkəmiz əleyhinə ifadələr işlədir, verdiyi açıqlamalarda Azərbaycanın ərazi bütövlüyünü və suverenliyini sual altına qoyur. Ermənistanın regionun sülh danışıqlarına ziyan vuran və bölgədə gərginliyi artıran digər bir addımı isə onun ABŞ-yə üz tutması, Amerika ilə strateji tərəfdaşlıq sazişi imzalamasıdır. Üçüncü tərəfləri regiona gətirməklə Ermənistanın sülh sazişini imzalamaq üçün qeyri-səmimi olduğunu görürük. Ermənistan uzun illər milli təhlükəsizliyinin qarantı kimi Rusiyanı, indi də ABŞ-ni görür. Yəni özünə deyil, daim kənara istinad edir.
P.Vəliyeva bildirib ki, Paşinyanın Atlantika Şurasında verdiyi bəyanatlarında əsas məqsədi ABŞ-nin Ermənistana strateji və maliyyə dəstəyi göstərməsinə çağırış etmək idi: "Onun fikrincə, İkinci Qarabağ müharibəsində Azərbaycanın qələbəsi və Ermənistanın məğlubiyyəti ölkədə siyasi sabitliyin təmin olunması üçün yeni bir strategiya tələb edir. O, Qərb dəyərlərinə inteqrasiyanı və demokratik islahatları Ermənistan üçün ən yaxşı çıxış yolu kimi təqdim edir. Paşinyan Atlantika Şurasında vurğulayıb ki, Ermənistanın uzunmüddətli müstəqilliyi, firavanlığı və təhlükəsizliyi üçün regionda sülh zəruridir. Bunun üçün Azərbaycanla sülh sazişi imzalanmalıdır, çünki bununla regionda iqtisadi inkişaf üçün yeni imkanlar yarana bilər. O, həmçinin Türkiyə ilə münasibətlərin normallaşdırılmasını vacib hesab edir, çünki bu, Ermənistanın blokadadan çıxmasına və regional iqtisadiyyata inteqrasiya olunmasına şərait yaradacaq. Paşinyan hesab edir ki, Ermənistan Gürcüstanı əvəz edərək Qərbdə yeni "etibarlı tərəfdaş" rolunu oynaya bilər. Çünki Gürcüstan son dövrlərdə Qərb dəyərlərindən qismən uzaqlaşaraq daha çox balanslaşdırılmış xarici siyasət yürütməyə başlayıb. Bu isə Ermənistan üçün yeni bir fürsət yaradır".
Deputat vurğulayıb ki, Ermənistan Qərbin Qafqazdakı yeni geosiyasi dəstəkçisi olmaq istəyir və Rusiyanın regionda təsirinin azalmasını daha müstəqil siyasət yürütməsi kimi görür. Hazırda sülh müqaviləsinin 17 bəndindən 15-i artıq razılaşdırılıb. İki əsas bənd üzrə isə razılıq əldə olunmayıb. Bu bəndlər həll olunmadan sülh sazişinin imzalanması qeyri-mümkün görünür, lakin Ermənistan tərəfi Qərbin dəstəyini qazanaraq danışıqlarda güclü mövqeyə sahib olmağa çalışır.
Pərvanə Vəliyevanın fikrincə, Ermənistan "sülh kəsişməsi" adlı layihəni irəli sürərək diqqəti yayındırmağa çalışır. Lakin bu layihənin həyata keçməsi üçün Azərbaycanın razılığı vacibdir, çünki ölkəmizin iştirakı olmadan bu layihənin heç bir əhəmiyyəti yoxdur. Ermənistanın bu təşəbbüsü sadəcə beynəlxalq ictimaiyyəti çaşdırmaq və manipulyasiya cəhdi kimi qiymətləndirilə bilər. Ermənistan hökumətinin ABŞ-ni Azərbaycana təzyiq göstərməyə inandırmaq üçün hansısa arqumentlərə söykənməsi belə, bu məsələdə ikitərəfli danışıqların və razılığın əldə olunması faktını inkar edə bilməz.
Əsmər QARDAŞXANOVA,
"Azərbaycan"
jpg_1775472819.jpg)
