Ermənistanda siyasi müstəvidə müşahidə edilən qütbləşmə getdikcə dərinləşməkdə, bu kontekstdə iqtidar və müxalifət arasında münasibətlər daha da gərginləşməkdədir. Tərəflərin bir-birilərinə qarşı kompromat xarakterli hücumlarının artması, gözdənsalma kampaniyasını genişləndirmələri vəziyyəti kritik həddə çatdırır. İndi həm hakimiyyət, həm də revanşistlər 2026-cı ilin parlament seçkilərinə hazırlaşırlar. Bu isə qarşıdakı dövrdə Ermənistanda xaosun qaçılmaz olacağını deməyə əsas verir.
Proseslər göstərir ki, keçmiş hərbi xunta yaranmış vəziyyətdən yararlanıb kilsəni də siyasi proseslərə cəlb edib ölkədəki xaosu daha da dərinləşdirməyə çalışır. Nəzərə alaq ki, Ermənistan kilsəsi kifayət qədər nüfuza və gücə sahibdir. Bu həm də o anlama gəlir ki, keçmiş hərbi xunta və onların xarici havadarları sonuncu kartdan - kilsə faktorundan yararlanmaq istəyir.
Bütün bunların fonunda Ermənistanda kilsə və hakimiyyətin qarşıdurması açıq müstəviyə keçib. Baş nazir Nikol Paşinyan II Qaregindən iqamətgahını dərhal tərk etməyi tələb edib. Bu barədə o, sosial şəbəkə hesabında paylaşım edərək katolikos II Qaregini və onu müdafiə edənləri kəskin şəkildə tənqid edib. Paşinyanın sözlərinə görə, onun II Qareginə ünvanlanmış tənqidlərini "Azərbaycan" və ya "Türkiyə izi" kimi təqdim etmək cəhdləri ikiüzlülüyün təzahürüdür. Baş nazir vurğulayıb ki, çoxları onun yeni katolikosluğa namizədinin olmasına haqq qazandırmaq istəsə də, təəssüf ki, onun bu posta namizədi yoxdur.
"Hraparak" nəşri yazıb ki, Nikol Paşinyan hakim partiyanın idarə heyətinin üzvlərinə kilsəyə qarşı təzyiqləri artırmağı tapşırıb. Qeyd edilib ki, ruhanilərə aid edilən dəhşətli hekayələri yaymaq, əsəb savaşı aparmaq, kilsə xadimlərini hər gün gözdən salmaq tapşırılıb: "Yeri gələndə, hüquq-mühafizə orqanlarına qanunsuz göstərişlər vermək, insanların şəxsi həyatının toxunulmazlığını pozmaq nəticəsində əldə edilmiş sübutları, faktları da dərc edəcəklər. Lakin xalqın səbrinin tükənəcəyindən və əks effekt verə biləcəyindən ehtiyatlanıb, hələlik "ifşalar etmək" üçün də tərəddüddədir. Paralel olaraq, hakimiyyət, kilsə daxilində müxtəlif ruhanilər vasitəsilə II Qareginə qarşı koalisiya yaratmaq və onun uzaqlaşdırılması üçün münbit zəmin yaratmaq üzərində işləyir. Lakin indiki məqamda bu cür ruhanilər azlıq təşkil edir və çətin ki, çoxluq təşkil edib, kilsə daxilində "hakimiyyət dəyişikliyi" həyata keçirsinlər".
Erməni politoloq Vigen Hakopyan deyib ki, 2018-ci ildən başlayaraq, hakimiyyəti ələ keçirdikdən sonra Ermənistan Apostol Kilsəsinə hücumlar başlandı. Onun sözlərinə görə, o vaxt artıq nəzərə çarpırdı ki, yeni hökumətin strategiyasında hədəf kimi erməni apostol kilsəsi də yer alır: "Biz hökumət-kilsə münasibətlərinin hansı səviyyədə olduğunu dəfələrlə görmüşük. Ermənistan hakimiyyətinin strategiyası təkcə kilsəni gözdən salmaq deyil, həm də statusunu dəyişdirməklə, erməni apostol kilsəsinin rolunu daha da aşağılamağa cəhd etməkdir". Erməni politoloq əlavə edib ki, Nikol Paşinyan hər gün eyni şeyi yazaraq, kilsəni təxribata çəkməyə çalışır.
Görünən odur ki, Ermənistanda daxili siyasi vəziyyət tədricən mürəkkəbləşməyə doğru gedir. Bununla da ölkə sonu görünməyən daxili siyasi böhrana qədəm qoyur.
Elçin CƏFƏROV,
"Azərbaycan"
