Ermənistanda məmurların rüşvət sistemi daha da genişlənib
Ermənistanı idarə edən şəxslər ölkədə korrupsiya və rüşvət sistemini daim genişləndirmələri ilə seçiliblər. İndi ölkədə elə bir yüksəkçinli məmur yoxdur ki, şəxsi biznesi olmasın, yaxud da vəzifədə olarkən digər yollarla böyük sərvət toplamasın. Son illər ərzində milli sərvətlər mütəmadi və sistematik şəkildə bu adamlar tərəfindən oğurlanmaqdadır. Onlardan biri də daxili işlər nazirinin müavini David Ambaryandı. Belə ki, nazir müavininin qanunsuz əməlləri aşkarlanıb, gəlir deklarasiyasını gizlətdiyi məlum olub.
"4rd.am" saytı xəbər verir ki, korrupsiyanın qarşısının alınması üzrə komissiyanın elanları reyestrində David Ambaryan tərəfindən təqdim olunan son gəlir bəyannaməsi 2021-ci il tarixli - İrəvanın şəhər merinin katibi kimi illik bəyannaməsi olub. Daxili işlər nazirinin yeni müavini daşınmaz əmlak olaraq, 2000-ci ildə İrəvanın Açapnyak rayonunda və 2012-ci ildə Moskvada aldığı mənzilləri elan edib. David Ambaryan qeyd edib ki, 2021-ci ildə Moskvadakı mənzilini 6,8 milyon rubla Tatyana Fadeyevaya kimi təqdim etdiyi şəxsə satıb. Ambaryan gəlir deklarasiyasında 2 avtomobilini 2011-ci ildə aldığı "Nissan"ı və 2019-cu ildə aldığı "Kia"nı qeyd edib.
Bildirilir ki, ötən ilin əvvəlində David Ambaryanın bank hesabında cəmi 557 min dram var idi, ancaq ilin sonunda bank hesablarının miqdarı 2 milyon 321 min dram olub. Bundan əlavə, David Ambaryan həmçinin 30 min ABŞ dolları, 22 min avro və nağd pul kimi 8,5 milyon dramının olduğunu açıqlayıb.
Vurğulanır ki, David Ambaryan gəlir olaraq İrəvan meriyasından 7 milyon 897 min dramı və "Ameriabank"dan 4 milyon 913 min dramdan ibarət kreditini elan edib: "Lakin Ambaryan daxili işlər nazirinin digər müavini Kamo Sutsulyan kimi özəl şirkətdə payının olduğunu elan etməyib. O, 18 sentyabr 2018-ci ildə Vanadzorda səhmlərinin 50 faizi özünə məxsus olan "D-Art" MMC-ni yaradıb. Ermənistanın Dövlət Gəlirləri Komitəsinin məlumatına görə, bu şirkət "fast food" xidmətləri ilə məşğuldur. Yeri gəlmişkən, David Ambaryan səhm payını gizlətməsi ilə yanaşı, İrəvanın şəhər meriyasındakı iş dövründə də intizamsızlığı ilə fərqlənib.
İrəvan meri Qraç Sarqsyanın 2022-ci il 4 may qərarına görə, David Ambaryana meriyanın inzibati iclaslarında üzrsüz səbəblərdən iştirak etmədiyinə görə ciddi töhmət elan olunub".
Bu arada Ermənistanın Daxili İşlər Nazirliyinin (DİN) yaradılmasından sonra baş nazir Nikol Paşinyanın qərarı ilə David Ambaryan fövqəladə hallar nazirinin müavini vəzifəsindən azad olunaraq daxili işlər nazirinin müavini təyin edilib. Bundan əvvəl, 17 fevral 2021-ci il tarixdən etibarən İrəvanın şəhər merinin katibi vəzifəsini icra edib.
Xatırladaq ki, daha əvvəl daxili işlər nazirinin digər müavinləri Kamo Sutsulyanın, Aram Ovanannisyanın və Arpin Sarqsyanın da gəlir deklarasiyalarını gizlətdikləri məlum olub.
Belə hallar ölkədə adi hal alıb. Odur ki, Ermənistan ən çox korrupsiyalaşmış ölkələr sırasında qalmaqda davam edir. Beynəlxalq təşkilatların işğalçı ölkədə korrupsiya faktları ilə bağlı hesabatında bildirilir ki, bu ölkədə korrupsiya halları ötən iki ildə də azalmayıb, əksinə, artıb. Bu xoşagəlməz halla bağlı mübarizə tədbirləri hələ də kağız üzərindən əməli işə keçməyib. Qeyd olunur ki, vergi ödəyiciləri arasında keçirilən rəy sorğusu da bunu təsdiqləyir. Sahibkarlıqla məşğul olmaq istəyənlər külli miqdarda rüşvət ödədiklərini deyirlər. Onların Paşinyan hökumətinə inamı yoxdur. Ölkədə toplanan verginin korrupsiyaya qurşanmış rəsmilər və məmurlar tərəfindən mənimsənilməsi ilə bağlı çoxsaylı faktlar var. Rəyi soruşulanlar vergi qanunlarının vergi ödəyicisi olan iş adamlarına eyni dərəcədə tətbiq olunmadığını qeyd edirlər.
Bildirilir ki, hazırda hakimiyyətdə olan qüvvələrin Ermənistanda son bir neçə onillikdə mövcud olmuş diktaturaya son qoyulduğunu iddia etmələrinə baxmayaraq, ölkədə totalitar rejim hökm sürür və hakimiyyət yalnız özünə yaxın müəyyən çevrələrə dəstək verir. Baş nazir N.Paşinyanın öz siyasi rəqiblərini təqib etdiyini bildirən media portalları onun həyat yoldaşı Anna Akopyanın qeyri-qanuni kommersiya fəaliyyəti ilə məşğul olmasına dair çoxsaylı məlumatların yayıldığını qeyd edirlər.
Bütün bunlar Ermənistanı kifayət qədər narahat günlər gözlədiyindən, ölkənin üzləşdiyi ümumi böhranın daha da dərinləşəcəyindən xəbər verir.
Elçin CƏFƏROV,
"Azərbaycan"
