Naxçıvan Muxtar Respublikası Daxili İşlər Nazirliyinin Orta İxtisas Polis Məktəbində gələcək polislərin andiçmə mərasimi keçirilib.
AZƏRTAC-ın Naxçıvan bürosu xəbər verir ki, tədbirdə əvvəlcə Daxili İşlər naziri, general-leytenant Fazil Ələkbərova raport verilib, sonra Azərbaycan Respublikasının dövlət himni oxunub.
Nazir polis andı qəbul edəcək kursantları və məktəbin pedaqoji kollektivini bu münasibətlə təbrik edib, onlara təhsildə müvəffəqiyyətlər arzulayıb.
Bildirilib ki, Azərbaycan xalqının ümummilli lideri Heydər Əliyev tərəfindən əsası qoyulan dövlət quruculuğu strategiyasını uğurla davam etdirən Naxçıvan Muxtar Respublikası Ali Məclisinin Sədri Vasif Talıbov bütün sahələrlə yanaşı, daxili işlər orqanlarına da daim yüksək diqqət və qayğı ilə yanaşır, Daxili İşlər Nazirliyinin fəaliyyətinin təkmilləşdirilməsi və maddi-texniki bazasının möhkəmləndirilməsi istiqamətində ardıcıl tədbirlər həyata keçirilməsini diqqət mərkəzində saxlayır. Bu sahədə görülən işlərin tərkib hissəsi kimi Ali Məclis Sədrinin 2018-ci il 5 mart tarixli Fərmanı ilə Orta İxtisas Polis Məktəbinin yaradılması xüsusilə mühüm əhəmiyyət kəsb edir.
Nazir deyib: "Muxtar respublikanın daxili işlər orqanları hərtərəfli şəraitdən bəhrələnərək, hər il əvvəlki ilin müsbət göstəricilərindən daha yüksək nailiyyətlər qazanmaqla, fəaliyyətin təkmilləşdirilməsi və günün tələbləri səviyyəsində qurulması istiqamətində mütəmadi olaraq yeni metod və vasitələrdən istifadə edirlər. Yaradılmış müasir iş şəraiti və polisin cəmiyyətdə tutduğu mövqe son dövrlər bu orqanda xidmət etmək arzusunda olan gənclərin sayını xeyli artırıb. Bu, muxtar respublika üçün böyük strateji əhəmiyyətə malik olan Orta İxtisas Polis Məktəbinə qəbul üçün müraciət edən abituriyentlərin sayının artmasında da özünü göstərir”.
Diqqətə çatdırılıb ki, Azərbaycan Respublikası Daxili İşlər Nazirliyinin müvafiq qərarı ilə təsdiq edilmiş "Polis əməkdaşlarının andiçmə Qaydaları”na əsasən, bu gün 2020-2021-ci tədris ilində Orta İxtisas Polis Məktəbinə qəbul olmuş 30 kursant "Polis andı”nı qəbul edir. Andiçmə mərasimi hər bir kursant və əməkdaşın həyatında ən yaddaqalan və xüsusi anlamı olan bir gündür. Gənc kursantlar qəbul etdikləri bu anda sadiq qalmalı, polis adını daim uca tutmalı, cinayətkarlığa qarşı mübarizədə, ictimai qaydanın və ictimai təhlükəsizliyin təmin olunmasında, vətəndaşların hüquq və azadlıqlarının müdafiəsində üzərlərinə düşən vəzifələri layiqincə yerinə yetirməli, peşəkarlıqlarını yüksəltmək üçün daim bilik və bacarıqlarını artırmalıdırlar.
Vurğulanıb ki, daxili işlər orqanlarında peşəkar kadr potensialının formalaşmasına, qanunçuluğa, xidməti və icra intizamına, etik davranış qaydalarına əməl olunmasına, eləcə də əməkdaşların nəzəri-praktik və mənəvi-psixoloji hazırlığının təmin edilməsinə xüsusi diqqət yetirilir. Ona görə də peşəkar polis əməkdaşı kimi yetişmək üçün Naxçıvan Muxtar Respublikası Ali Məclisinin Sədri Vasif Talıbovun polis məktəbinin açılışında qeyd etdiyi, "Bu gün Orta İxtisas Polis Məktəbinə qəbul olunanlar yaxşı oxumaqla yanaşı, həm də vətənpərvər yetişməlidirlər. Özünüzü ciddi intizama və zabit məsuliyyətinə indidən hazırlamalı, çox mütaliə etməli, müasir texnologiyaları yaxşı mənimsəməli və onlardan bacarıqla istifadə etmək vərdişlərinə yiyələnməlisiniz” dəyərli tövsiyələri əsas təhsil şüarı kimi yadda saxlanılmalı və bu, tədris prosesində qüsursuz icra olunmalıdır.
Fazil Ələkbərov Naxçıvan Muxtar Respublikası Ali Məclisinin Sədri Vasif Talıbovun rəhbərliyi altında təhsil və şərəfli xidmət yolunda "Polis andı” qəbul edən kursantlara uğurlar arzulayıb. Nazir əmin olduğunu bildirib ki, Orta İxtisas Polis Məktəbində təhsil alan kursantlar ulu öndər Heydər Əliyev ideyalarına və vəzifə borcuna daim sadiq qalaraq dövlətçilik amallarına sədaqətlə qulluq edəcək, peşəkar polis əməkdaşı kimi yetişmək üçün səy və bacarıqlarını əsirgəməyəcəklər.
Tədbirdə məktəbin rəisi, polis polkovniki Kamil Məmmədəliyev, Naxçıvan Muxtar Respublikası Daxili İşlər Nazirliyinin Veteranlar Şurasının sədri, istefada olan polis polkovniki Yusif Həsənov, kursant Ruzi Əhmədov çıxış ediblər.
"Polis andı” qəbul edildikdən sonra Daxili İşlər naziri kursantlarla söhbət edib, məktəbin tədris prosesi, yataqxanada və yeməkxanada yaradılmış şəraitlə yaxından tanış olub, kursantlarla birlikdə nahar edib.
