63 saylı Hacıqabul-Kürdəmir Seçki Dairəsi 20 inzibati ərazi dairəsi (İƏD) üzrə nümayəndəlik və 17 bələdiyyənin ərazisində yaradılan 51 seçki məntəqəsini, o cümlədən Hacıqabul rayonu üzrə 18 İƏD üzrə nümayəndəlik, 15 bələdiyyənin ərazisində yaradılan 44 seçki məntəqəsini, Kürdəmir rayonu üzrə 2 İƏD üzrə nümayəndəlik və 2 bələdiyyənin ərazisində yaradılan 7 seçki məntəqəsini əhatə edir.
Seçki dairəsi üzrə seçicilərin siyahısı tam dəqiqləşdirilmişdir. Seçici siyahıları dəqiqləşdirilən zaman 36 nəfər qeydiyyatdan çıxan, 170 nəfər vəfat edən, 123 nəfər hərbi xidmətə göndərilən seçici siyahıdan çıxarılmış, eyni zamanda 28 nəfər yeni qeydiyyata düşən, 126 nəfər hərbi xidmətdən tərxis olunan, səsvermə gününə 18 yaşı tamam olan 519 nəfər, o cümlədən Hacıqabul rayonu üzrə 434, Kürdəmir rayonu üzrə 85 nəfər seçici siyahısına əlavə edilmişdir. Yeri gəlmişkən qeyd edək ki, bələdiyyə seçkiləri günü - yanvarın 29-da 3 seçicinin 18 yaşı tamam olacaq.
Onu da öyrəndik ki, 63 saylı Seçki Dairəsinin əhatə etdiyi məntəqələrdə 80-100 yaşlılar 714, o cümlədən Hacıqabul rayonu üzrə 622, Kürdəmir rayonu üzrə 92 nəfər, 100 yaşdan yuxarı isə 2 seçici qeydə alınmışdır. Seçici siyahılarının tam dəqiqləşdirilməsi zamanı seçki dairəsi üzrə seçicilərin ümumi sayının 51 min 457 nəfər olduğu müəyyən edilmişdir ki, onun da 43 min 499 nəfəri Hacıqabul, 7 min 958 nəfəri Kürdəmir rayonunun payına düşür.
Seçki dairəsinin əhatə etdiyi bütün seçki məntəqələrində, o cümlədən səsvermə otağında və digər otaqlarda normal iş şəraiti yaradılmışdır. Bütün seçki məntəqələri səsvermə gününə tam hazırdır. Onlar lazım olan telefon-rabitə, fasiləsiz enerji təminatı ilə təmin olunmuşdur.
Namizədlərə gəldikdə, bizə verilən məlumata görə, seçki dairəsinə müraciət edən 182 nəfərin namizədliyi qeydə alınmışdır. Seçkilərin keçirilməsini isə 573 nəfər müşahidə edəcək.
Seçkiqabağı təşviqatın aparılması və kütləvi tədbirlərin keçirilməsi ilə əlaqədar bütün seçki məntəqəsinin ərazisində Seçki Məcəlləsinin müvafiq maddələrinə uyğun olaraq DSK-nın təklifi və Hacıqabul Rayon İcra Hakimiyyəti başçısının sərəncamı ilə yerlər müəyyənləşdirilmişdir. Eyni zamanda qeydə alınmış namizədlər, siyasi partiya, siyasi partiya bloklarının səlahiyyətli nümayəndələri, onların vəkil edilmiş şəxslərinin seçicilərlə görüşlərinin keçirilməsi üçün "Sərbəst toplaşmaq azadlığı haqqında" qanun çərçivəsində açıq və qapalı yerlər müəyyən edilmişdir. Bunlardan əlavə, seçki praktikasının təkmilləşdirilməsi və səsvermə prosesində şəffaflığın təmin edilməsi məqsədilə rayon mərkəzindəki 8 məntəqədə veb-kameralar quraşdırılmışdır.
63 saylı Hacıqabul-Kürdəmir DSK aşağı seçki komissiyaları üzvlərinin təlimatlandırılması ilə əlaqədar treninqlərin təşkil olunmasını və onların peşə hazırlığı üzrə digər proqramların mütəmadi olaraq həyata keçirilməsini də təmin edir. İnsan hüquqlarının müdafiəsi sahəsində görülən tədbirlərin genişləndirilməsi üçün Prezidentin 2011-ci il dekabrın 27-də imzaladığı "Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramı" sərəncamına əsasən və Təqvim Planına uyğun olaraq dairə seçki komissiyasının üzvləri və məntəqə seçki komissiyalarının sədrləri üçün ixtisaslaşdırılmış kurslar keçirilmişdir.
Seyran CAVADOV,
"Azərbaycan"
