“Müstəqilliyimiz əbədidir” çoxcildliyindən: Azərbaycan Xalq Cümhuriyyəti qurucularının xidmətləri heç vaxt unudulmayacaq  

“Heydər Əliyev. Müstəqilliyimiz əbədidir” çoxcildliyinin təkrar nəşrinin 12-ci kitabı çapdan çıxıb.

AZƏRTAC xəbər verir ki, bu kitabda yer alan materiallar 1996-cı il aprelin 2-dən mayın 26-dək olan dövrü əhatə edir.

Çoxcildliyin bu nəşrində Ümummilli Lider Heydər Əliyevin çıxışları, nitqləri, bəyanatları, müraciətləri, müsahibələri və məktubları toplanılıb. Həmin materiallarda Azərbaycanda hüquqi, demokratik dövlət quruculuğu prosesindən, ictimai-siyasi, iqtisadi, mədəni həyatın bir çox sahələrindən, xarici ölkələrlə əlaqələrdən geniş bəhs olunur.

Kitabda Prezident Heydər Əliyevin Lüksemburqa, Belçikaya, Norveçə səfərləri, həmin səfərlərdə keçirdiyi görüş və danışıqlarda Birləşmiş Millətlər Təşkilatı Təhlükəsizlik Şurasının Azərbaycanın işğal olunmuş ərazilərindən erməni işğalçı qüvvələrinin qeyd-şərtsiz çıxarılmasını tələb edən qətnamələrinin həyata keçirilməməsi ilə bağlı beynəlxalq birliyə müraciəti haqqında materiallar yer alıb. O zaman aprelin 25-də Osloda keçirilmiş mətbuat konfransında Ümummilli Lider Heydər Əliyev demişdi: “Sülhə nail olmaq üçün hər bir ölkə, o cümlədən Ermənistan da beynəlxalq hüquq normalarına əməl etməlidir. Bu baxımdan biz sülh əldə etmək üçün çox güzəştli, konstruktiv təkliflər irəli sürmüşük. Təkliflər ondan ibarətdir ki, Azərbaycan Respublikasının işğal olunmuş ərazilərindən Ermənistan silahlı qüvvələri çıxmalıdır. Azərbaycanın ərazi bütövlüyü, sərhədlərinin toxunulmazlığı təmin olunmalıdır, işğal edilmiş torpaqlardan didərgin düşmüş, zorla çıxarılmış Azərbaycan vətəndaşları o torpaqlara, öz yer-yurdlarına qayıtmalıdırlar”.

Nəşrdə Ulu Öndər Heydər Əliyevin Şuşanın və Laçının Ermənistan silahlı qüvvələri tərəfindən işğal edilməsinin dördüncü ildönümündə bu rayonlardan məcburi köçkün düşmüş əhali ilə görüşündəki nitqinin mətni də yer alıb. Ulu Öndər həmin nitqində demişdi: “Dörd ildir ki, biz bu rayonlardan məhrum olmuşuq. Ona görə də bu çox ağır dərddir. Bu dərdi biz hamımız çəkirik. Bilirəm ki, şuşalılar, laçınlılar daha çox dərd, qəm içindədirlər. Çünki onlar həm də yerlərindən, yurdlarından didərgin düşdüklərinə görə ağır həyat tərzi keçirirlər. Təəssüf ki, bunlar hamısı həyatımızın reallığıdır. Biz bunlara dözürük, amma əminik ki, bütün torpaqlarımız azad ediləcək, o cümlədən Şuşa da, Laçın da azad olunacaq, şuşalılar, laçınlılar öz evlərinə, yurdlarına, torpaqlarına qayıdacaqlar. Buna heç şübhə yoxdur”.

Vurğulamaq yerinə düşər ki, Ulu Öndərin böyük inamla səsləndirdiyi fikirlər bu gün reallığa çevrilib. Vətən müharibəsində qazanılan Qələbə nəticəsində Azərbaycanın ərazi bütövlüyü təmin edilib. “Böyük Qayıdış” Proqramı çərçivəsində Şuşa və Laçın yenidən öz doğma sakinlərinə qovuşur.

Bu cildə Ümummilli Lider Heydər Əliyevin 28 May - Respublika Günü (indiki Müstəqillik Günü) münasibətilə 1996-cı il mayın 26-da keçirilmiş tədbirdə söylədiyi nitqi də daxil edilib. Ulu Öndər o zaman demişdi: “Bu, Azərbaycan xalqının milli bayramıdır. Məhz ona görə ki, ilk dəfə müstəqil Azərbaycan dövləti, demokratik cümhuriyyəti dünyaya elan olunubdur. Azərbaycanın dövlət müstəqilliyinin, milli azadlığının gələcəyi üçün böyük əsas, təməl qoyulubdur. Biz bu gün, bu bayram günü о illərdə, ağır və çətin şəraitdə Azərbaycan xalqının qabaqcıl, mütəfəkkir insanlarının xidmətlərini böyük minnətdarlıq hissi ilə qeyd edirik. İlk Azərbaycan Demokratik Cümhuriyyətinin qurulmasında, yaşamasında, onun böyük milli irs kimi yaranmasında iştirak edənləri biz bu gün minnətdarlıq hissi ilə qeyd edirik. Onların xidmətləri Azərbaycanın tarixinə həkk olunub, bu xidmətlər heç vaxt unudulmayacaqdır”.

On ikinci kitabda Ulu Öndərin, həmçinin Azərbaycanın dövlət müstəqilliyinin möhkəmləndirilməsinə, ölkənin bazar iqtisadiyyatına keçid dövründə yaranmış çətinliklərin aradan qaldırılmasına, kənd təsərrüfatının inkişaf etdirilməsinə dair keçirilmiş müşavirələrdəki nitqlərinə, erməni təcavüzünün ağır nəticələrinin aradan qaldırılmasına, daxili və xarici siyasətin başlıca istiqamətlərinə dair materiallara geniş yer verilib.

Kitabın buraxılışına məsul “Azərnəşr”in baş redaktoru Əlövsət Ağalarovdur.